2011年9月19日星期一

落山落水

琴日提到「衣錦夜行」,意思係夜媽媽著到鬼火咁靚有乜用,前後deep V加透視又點,唔通揾鬼睇咩!另外亦有「衣錦還鄉」,意思都係差唔多。對於我呢啲酸葡萄當飯食嘅人嚟講,咁嘅態度其實都幾膚淺吓。不過中國人鄉土觀念比較重,發咗達唔返鄉下威吓,點都係覺得有啲美中不足。算啦,貪威識食係人嘅天性,講真都無可厚非嘅。不過如果要威,喺邊度威都係一樣啫,點解一定要返鄉下呢?哈哈,講咗一大堆廢話都未入到正題添,其實我係想講個「衣」字應該點讀。

「衣」喺呢度係動詞,解作穿著,應該讀做「意」。小學係咁教,中學又係咁教,粵語殘片都係咁讀,基本上以前係唔會有人讀錯。唔知點解,近年好多人都將「衣錦還鄉」讀成「醫錦還鄉」,其中又以後生一輩居多。

又好似「鳥為食亡」,正確讀音係「鳥為痔亡」。不過喺印象中,除咗中文先生,好似未聽過有人讀得啱。

仲有「春風風人」,第二個風字應該讀成「諷」。呢個詞比較少人用,我就完全冇聽人讀過。不過相信會讀成「春風瘋人」嘅,應該佔咗絕大部分。

至於「仁者樂山,智者樂水」就更加唔使講,個個都讀成「仁者落山,智者落水」。當然啦,既然喜愛山水之勝,自然會登山涉水,咁「落山落水」都講得通嘅。其實正確讀音係「仁者咬山,智者咬水」,不過「咬」要讀第六聲。特別提一提普通話讀音,個「樂」字應該讀成「要」(yao4),即係「仁者要山,智者要水」。哈哈,真係至理名言,智者梗係要水啦,不過係「水為財」個「水」囉。當然啦,呢句只係題外話,其實我係想講陳雲林。佢舊年喺重慶舉行嘅陳江會,就引述過「仁者樂山,智者樂水」做開場白,不過竟然讀成「仁者勒山,智者勒水」,真係咪以為淨係香港人先會讀錯音!

語文嘅嘢係薪火相傳,由我嘅小學年代到而家,只不過係短短幾十年,點解有啲正確讀音會咁快就失傳咗呢?究竟係而家啲中文老師冇教,定係年輕一輩嘅老師連自己都搞錯呢?抑或係呢一代嘅學生根本就唔聽先生教,話知你講一百次都唔會記得?

我當然知道語文係有機體,會不斷自我演化,而約定俗成更係其中規律。不過咁係咪代表我地要對啲語文上嘅基因突變視若無睹?如果對呢啲「自我演化」採取放任態度,又會唔會變成冇標準可循呢?

當然啦,正音的確有需要,不過我亦唔贊成矯枉過正。就好係之前嘅正音運動,夾硬摷番千幾年前嘅「正音」出嚟,我就認為過咗火嘞。如果有啲字嘅「正音」,根本已經冇任何在世嘅人知道,而當代嘅字典又冇收錄,我就覺得冇必要「為正而正」啫。講開正音,有啲字「正」完之後真係令人好唔習慣。如果我講「音衡」,你地又知唔知我噏緊乜呢?




6 則留言:

  1. 「音衡」係咩,我都烏啄啄。

    係年輕一輩嘅老師教錯?抑或係呢一代嘅學生根本唔聽先生教?我就話兩者都有。尤其後者,依家學生嘅遊魂度其高,又喜歡自說自話,老師講乜佢地冇興趣聽,啲老師又唔理學生係咪用心聽,於是你嘈佢嘈,嘈完落堂收工,咁就叫教完書上完堂,真係令人唏噓!

    回覆刪除
  2. 仲有,啲相好正,你真係踏盡天涯咯,幾大州去勻晒!

    回覆刪除
  3. laulong,
    哈哈,如果我講「欽敬」,係咪聽得順耳好多呢?啲學生學唔到正確嘅嘢,第日佢地做咗老師自然唔會教得啱,呢個係惡性循環!仲有,多謝你讚我啲相呀!話就話只有南極洲未踏足過,不過其餘六大洲都只係去過好少地方,絕對講唔上踏盡天涯囉!

    回覆刪除
  4. 我好多字都唔識,所以我唔識你哩度講嗰啲,係正常嘅:P

    相好靚!

    回覆刪除
  5. 真係要向你多多學習!睇完呢篇又識多咗野!

    d相真係正~更利害你巳踏足六大洲~

    回覆刪除
  6. Coffee,
    恭喜恭喜,證明你仲好後生!嗰啲正音係我地呢啲老餅先識架咋!

    minor,
    唔使咁客氣喎!講真我都唔敢肯定啲讀音啱唔啱架,不過校長都冇當場指正,咁我就當過咗關架喇!至於踏足六大洲云云,其實都只係跟鴨仔團,走馬看花,玩得一啲都唔深入架!

    回覆刪除