2011年9月18日星期日

人渣!又見人渣!

人渣度度有,香港特別多!只要打開報紙港聞版,就會睇到一個又一個嘅人渣故事,而且日日有嚟,鑊鑊新鮮!

中秋夜玩燒巴士,實在令人懷疑係童黨所為。不過既冇目擊證人,巴士站嘅攝錄機又擺空城計,諗住單案就算係神探L都破唔到啦。點知事隔兩日,打開報紙已經見到警方破咗案,拉咗幾件十三四歲嘅塞豆窿。初初仲以為香港警隊真係有讀心神探,而且識得隔空發功添,如果唔係點會咁快破到案。睇埋落去,原來係班童黨自己攞嚟衰,竟然沙膽(或白痴)到喺網上公布自己嘅威水屎,仲提供埋第一手獨家圖片,一張巴士起火嘅相。咪以為呢啲犯法嘢冇人敢搭嘴,竟然有個女粉屎讚班童黨叻仔!

人渣真係冇年齡同性別界限,十三四歲嘅仔妹已經沙膽到燒巴士,再過多幾年仲有乜嘢唔敢死呢?!香港咁多善心人,實會有人幫班小人渣辯護,話佢地只係年少無知,一時貪玩。當然啦,十幾歲人話大唔大,話細唔細,可能有好多複雜嘅是非概念都未必識分。莫講班豆,就算好多接近三張嘅80後都唔識分啦。不過燒巴士係犯法,會俾差人拉,相信連小學一年級都應該知啩。好,又當班小人渣係一時衝動,但係事後將啲威水屎放上網俾同道中人(渣)分享,就足以證明佢地唔覺得自己有錯啦。呢種正正就係「富貴不還鄉,如衣錦夜行」嘅心態,其實班PK仔都不知覺得幾光榮!燒咗三架巴士咁大件事,當然係全香港人人都知啦,不過最弊就冇人知係佢地做呢。如果唔放上網威俾啲鄉親父老睇吓,肯定仲辛苦過谷精上腦,實會幾晚瞓唔著。哈哈,竟然將項羽同班小人渣扯上關係添,罪過罪過!

究竟啲仔點解會變成人渣嘅呢,唔通又係社會嘅錯?當然啦,同社會風氣唔多唔少都有啲關係。就睇吓班80後廢青,圍垃圾會、強佔馬路、胸襲凸首、狙擊政府高官,有邊樣唔係暴力行為?你又唔好理,呢啲暴力行為直頭叫好又叫座,除咗少數愛國報紙,其他傳媒竟然係讚多彈少,都不知幾多民鼠打手走出嚟護航。啲仔自然係有樣學樣啦,話唔定仲嚟個青出於藍添。早排班V煞廢青搗亂遞補機制諮詢會場,又拆屋又打人,班仔梗係覺得好威格,睇完豈有唔學之理呢?而且佢地會以為戴咗面具冇人認到,就好似喺網上唔會有人知道佢地嘅真正身分一樣,所以先會大膽到將自己嘅威水屎公諸同好。其實班廢青所做嘅,唔止係破壞緊呢一刻嘅社會秩序,更係荼毒緊香港嘅下一代!

當然啦,班仔嘅家長亦難辭其咎,有乜理由屋企有件小人渣,佢地竟然會懵然不知!有個教書嘅朋友同我講過,話佢學校有啲仔不知幾頑劣,都唔明點解有細路可以曳成咁。不過當佢見到啲仔嘅家長,一切謎團就解開晒,講得難聽啲,咪臭罌出臭草囉!對於啲細路嚟講,成年人嘅身教肯定最具影響力,如果家長冇做到好嘅示範,就算學校點教都唔會有用!

講到壞嘅示範,就一定要提吓癲狗嘞。條友喺議會嘅暴力作風當然唔使多講,大家都好清楚。啱啱喺譴責V煞廢青暴力行為嘅動議辯論當中,條友竟然無恥到話係官迫民反,簡直係將暴力行為正義化!咁唔係教壞細路係乜!呢條友,人渣兩個字絕對受之無愧啦!唔得,要更正,既然係癲狗,咁當然係狗渣啦!

5 則留言:

  1. 張相你影架?

    有個朋友在學校做事,有學生沒有做功課被留堂,而其家長致電投訴,認為學校留佢仔堂是非法禁錮!

    回覆刪除
  2. 哩個世界真係好怪,講自己睇法就係抽水,4:16 你明唔明乜嘢叫抽水?係咪要讚嗰班死0靚仔同黃癲狗先至唔係抽水?

    唉,成日蒙住塊面做人,你一定好鬼醜怪,咁醜怪都唔係罪黎嘅,但你介意咯,怕俾人知你個死樣咯咪咪出黎行咯,鬼鬼祟祟,你真係好可悲!

    回覆刪除
  3. 癲狗呢班友真係開了一個壞先河,其實係傳媒病態做成,助長粗獷文化,才使暴力升級!

    回覆刪除
  4. 匿名君:
    咁耐冇嚟留言,搞到我有啲掛住你添!仲諗住過幾日寫番篇尋人啟事,睇吓揾唔揾到你,我係講真架!點知我一鬧隻癲狗,你就飛身撲出嚟護主,真係得來全不費工夫!哦,我而家知道召喚你嘅方法喇!哈哈,忽然諗起召喚獸(或通靈獸)添,唔知你有冇睇火影忍者呢?

    Coffee,
    張相喺基多影架,係隔住馬路偷影嘅,不過都係俾嗰兩個擦鞋童發現咗!遲啲等我問個教書朋友攞多啲料,寫番個怪獸家長系列先!

    laulong,
    蒙面人自甘做癲狗嘅打手,簡直係助狗為虐,為狗作倀,本來好應該狠狠咁插佢幾嘢!不過其實佢都好慘架,要無時無刻留意住網上有冇得罪癲狗嘅言論,然後撲出嚟反咬,睇怕真係冇覺好瞓!咁我地就唔好令佢太難堪啦,話晒佢都係一個可憐人!而且嚇到佢以後唔敢再嚟,咁我地咪少咗個人消遣囉!

    佛爺:
    台灣議會拳來腳往、泰國街頭惡鬥連場、英法意希暴亂不絕,呢啲就係我地見到嘅民主典範嘞!睇嚟班友一定要搞到香港同呢啲民主國家看齊先安樂囉!

    回覆刪除