2011年9月11日星期日

今日一分鐘

奧巴馬都算叻仔喇,趕得到喺911事件十周年之前做低拉登。佢話嗰次行動係反恐戰嘅重大勝利,令公義得到彰顯。啲美國佬仲興奮到上街慶祝,喺時代廣場載歌載舞,直頭開心過巴西嘉年華。不過佢地係咪開心得太早呢,學陳姣文話齋,辣低咗一個拉登,伊斯蘭世界仲有千千萬萬個拉登!題外話,其實阿蕉應該考慮去美國發展,因為嗰度啲人都好天真好傻,實唔會有人歧視佢架!

喺高呼公義得到彰顯嘅同時,啲上街慶祝嘅美國佬又有冇認真諗過點解會有911事件呢?佢地可能唔會明白,對於好多伊斯蘭世界世界嘅人嚟講,911正係伸張公義嘅一日!美國佬嘅中東政策、用國際公義嚟做掩飾嘅霸權主義,先至係導致911事件嘅主因!

對於美國佬嘅強權欺壓,中東佬豈會有唔嬲之理?面對美國佬嘅強大軍力,連號稱世界唔知第幾大軍事強國嘅伊拉克都不堪一擊,啲中東佬梗係唔會硬撼啦。恐怖襲擊正正就係一種低成本高效益嘅報復手段,試問人地又點會唔用呢?

恐怖主義恐怖之處在於防不勝防,任何一個老弱婦孺都可能係人肉炸彈,隨時可以將附近嘅人炸到血肉橫飛。咪以為恐襲一定要需要靠乜嘢高科技或者強大嘅組織力,其實只要有人唔怕死就有得搞。一個炸彈、一枝槍、一把刀、甚至一樽汽油,一樣可以好攞命,總之一個夠本,兩個有賺。對於啲恐怖分子嚟講,肯定係賺多蝕少!

我當然理解啲人因乜要搞恐襲,不過明白還明白,我點都係堅決反對呢種行徑,無論背後有乜嘢原因都好。首先,恐怖主義令人人自危,施襲者絕對唔會得到第三者嘅認同,只會令自己被孤立,對要爭取嘅嘢一啲幫助都冇。對於施襲者嚟講,所做嘅只係一種發洩,除咗臨死前嘅一刻快感,根本就別無得著。而且,恐襲會禍及無辜,炸彈冇眼,連自己友都會炸到粉身碎骨。好似911死難者當中,其實有好多都係伊斯蘭教徒。當然啦,啲恐怖分子會話爭取公義梗要負出代價,一定會有人犧牲。又係題外話時間嘞,其實班V煞廢青嘅思維真係同啲恐怖分子好相似喎。唔知佢地有冇諗過去阿富汗或者伊拉克朝吓聖呢,跟塔利班或者阿爾蓋達學吓嘢,肯定會對佢地嘅實戰技巧大有裨益架!

講到尾,拉登都只係一個人,絕對係恐怖主義嘅全部。如果以為對冧咗佢就可以天下太平,咁就未免太天真喇!只要呢個世界仲有霸權主義,只要有人唔識得尊重生命,恐怖主義自然唔會消失!

講到呢度,就等我用以下一分鐘為所有911死難者默哀!


6 則留言:

  1. Oh,我尋晚睇咗 ATV World 播返果日現場的 documentary,好恐佈,原本想寫吓,結果又唔知點寫好,冇寫到。

    我同你一樣,明白點解佢哋咁憎美國,但無論如何,唔認同呢啲恐怖嘅報復手法,死傷嘅人全部係無辜嘅,尤其是因為之後的倫敦 bomb attack,同後來在印度酒店,都有我身邊識嘅人,真係唔知幾時你同我都可能遇上!

    回覆刪除
  2. 誰都有父母生,誰都有親人,始作俑者是罪魁禍首!

    回覆刪除
  3. 叫班V煞廢青去阿富汗或者伊拉克朝吓聖!萬一佢地學裝炸彈時,誤爆身亡,佢地屋企人就要叫香港警務處長辭職,點解唔派警察去阿富汗幫佢地拆蛋?佢地係香港衝出馬路,都有警察封路保護佢地喇!嘻嘻!

    回覆刪除
  4. SKII,
    係囉,啲恐怖分子直頭累街坊!而家機場啲安檢搞到鬼死咁麻煩,指甲鉗(有指甲銼嗰啲)唔俾hand carry,想帶樽水又唔得!不過上次坐土航,飛機餐用嘅係金屬刀叉,殺傷力點都大過指甲銼,咁做乜啲安檢要搞到咁嚴呢?!

    Coffee,
    從第三者角度睇,敵對雙方唔一定係一邊啱一邊錯,可以兩邊都係邪惡架!本來話知佢地鬼打鬼,不過最弊係會殃及池魚呢!

    佛爺:
    我建議班廢青去阿富汗或者伊拉克深造,當然係存心靠害啦!去得嗰啲地方,都咪使旨意有命返香港!如果可以令班廢青從此消失,就算要犧牲一哥都絕對值得架!

    回覆刪除
  5. >>美國佬嘅中東政策、用國際公義嚟做掩飾嘅霸權主義 ...

    我諗起五六十年代的共產主義國際化,嗰時中蘇共千夫所指,依家世人卻對美國用武力強權推銷西式民主不吭一聲,真的令人失笑!

    回覆刪除
  6. laulong,
    呢啲咪雙重標準囉!事實上,嗰啲越係話自己熱愛民主嘅人,就越係支持雙重標準!

    回覆刪除