2011年9月3日星期六

由演唱會講起

「我睇開陳逆迅演唱會, 你無啦啦叫我去睇林瘋!」

喺香港要極速爆紅,原來一啲都唔難,只要有創意就得。一個普通到唔恨嘅肥仔(跌個招牌落嚟都隨時責死十幾件嗰種),竟然可以一夜成名,就係因為講咗上面嘅警句。

話說肥仔睇緊陳逆迅嘅演唱會,點知佢偶像無啦啦發老脾,唱到一半竟然辭演。佢臨走前仲講話會開過另一場演唱會,叫啲粉屎一定要大聲啲encore。主辦單位為免出現冷場,又唔想勞民傷財,就建議由支持度僅次陳逆迅嘅林瘋頂上,此之謂遞補機制。

肥仔迷陳逆迅已經迷到short short地,完全唔理佢係因為中途坐地起價,同主辦單位傾唔掂數先至辭演。對於遞補機制嘅安排,肥仔覺得唔可以接受,係剝奪咗佢嘅選擇權利,一於要反對到底。其實佢都算斯文喇,只係遊吓街、舉吓牌啫。而另一啲粉屎就激得多,班友走去主辦單位嘅諮詢大會踩場,初則叫囂掟,繼而拆屋打人,絕對深得佢地偶像嘅真傳。

對於遞補機制,支持同反對嘅聲音都有。反對者只著眼於選擇權利,而支持者就主要考慮資源浪費同辭演人士嘅態度問題。其實雙方著眼點唔同,亦各有理據,並冇出現一面倒嘅情況。如果任何一方認為自己擁抱真理,唔肯坐低傾之餘仲要用武力威嚇對方,又點算係文明社會嘅應有態度呢?!

雖然我都覺得陳逆迅中途辭演係不負責任嘅行為,而且搞過另一場演唱會又浪費資源,不過我並唔認為遞補機制係治本嘅方法,真係唔搞好過搞。除咗會引起啲死硬粉屎激烈反彈,亦會令一啲人權大過天嘅教條主義者不滿。

偶像嘅不負責任行為,其實源自粉屎嘅不負責任態度。如果唔係有粉屎嘅支持,啲偶像想玩都冇得玩。單純針對辭演再演嘅措施,唔能夠解決根本問題之餘,仲會引起反效果,似乎係得不償失。

忽然又諗起另外一樣完全唔啦更嘅,但係就可以解釋到呢種不負責任嘅心態。試過任食火鍋嘅都知,好多人鍾意叫到成檯都係,但係最後食剩嘅仲多過落咗肚嗰啲。食剩嘅當然係送晒去堆填區啦,你地話幾浪費呢!以前好多火鍋店都會貼出告示,話剩番嘅火鍋料要逐兩罰錢。而家呢類告示已經少咗好多,亦未見過有人切實執行,因為根本執行唔到。

啲客俾咗錢,梗係認為自己有選擇權利,鍾意點叫都得。叫少咗只係會令火鍋店賺多啲,而叫多咗對自己又冇任何影響,梗係唔會益啲無良商人啦。至於話食剩要罰錢,一來惹人反感,同趕客無異。而且所有制度都有機會俾人鑽空子,只要將食剩嘅倒晒落鍋底煲湯,咁就罰無可罰啦。

至於啲火鍋店,梗係圍過條數,計埋食剩咗嘅都仲有得賺啦。喺任食制度下,個個都爭取自己嘅最大利益,結果就皆大歡喜。講到浪費,喺個人層面根本就唔適用,要從宏觀角度先睇到。對於地球資源嚟講,任食制度真係造成好大浪費!不過又有幾多人會為咗珍惜地球資源而犧牲個人利益呢?!

同樣道理,偶像要玩辭演再演,啲死硬粉絲一定支持到底。雖然話要嘥錢搞多場演唱會,但係主辦機構係大家夾份營運嘅,錢係已出之物,用剩又冇得回水。咁豈有唔搞之理,最好就搞多十場八場添。

講到尾,問題唔係要點防止或者懲罰啲偶像玩,而係點先可以令啲死硬粉屎明白,佢地嘅偶像係浪費緊整個香港嘅資源!好不幸,有啲人係永遠唔會講得佢地明,又或者,佢地根本就冇打算聽其他人講啲乜!

8 則留言:

  1. 所以我就覺得啲日本仔很乖咯,選咗自民黨出黎,就話之佢一年半載就換個首相,佢地都唔會話俾人剝奪選舉權。到咗民主黨上場又係咁,唔通日本仔嘅祖先係來自順德嘅?

    回覆刪除
  2. laulong,
    啲日本仔真係幾乖架,就算有災難發生,在野陣型嘅政客都冇即刻發難,一切以救災為先。如果喺香港,啲政棍唔第一時間走出嚟抽水先奇啦!話我陰謀論都係咁講,班友肯定日日求神拜佛,希望大陸同香港爆多啲大鑊!

    回覆刪除
  3. 原來真係有呢場演唱會架?我一直以為係政治騷中一句經典說話。

    嗰位super star Libra,乜水?(我都好市井架)

    回覆刪除
  4. Coffee,
    哈哈,陳奕迅演場會梗係有啦,仲N咁多場添,睇佢發到個豬頭樣就知道!而陳逆迅演場會,當然係虛構架啦!至於SuperStar Libra,即係天秤星號,坐過一次都怕怕,真係悶到嘔茄!

    回覆刪除
  5. 個肥仔娶佐老婆,一年後,個老婆回娘家,要肥仔再大紅花橋過門再娶.年年如是,肥仔年年都有得選擇,娶番同一個老婆.

    點解呢?

    因為肥仔心理變態,結婚唔夠一年,支炮仔就失靈,五姑娘都幫唔到手,要再次「沖喜」,支炮仔至High番起.

    結論:肥仔可能性變態,所以經常要搞選舉,等支炮仔High D。嘻嘻!

    回覆刪除
  6. 佛爺:
    年年有得選秀女,係男人都想!不過鑊鑊都揀番同一個,就算唔係心理變態,都肯定係悶人一個!我建議佢都係唔好睇陳逆迅喇,不如轉睇啲肉女歌星仔,起碼可以平衡番啲心理!

    回覆刪除
  7. 哈哈,我初初睇重以為你真係講演唱會添呀!講開任食,我好耐之前喺美國讀書,果度已經興“ All You Can Eat" (命名好直接,同“任食”有得揮),記得食日本嘢的 All You Can Eat,都有罰款制,例如叫壽司又唔食飯,諸如此類,我同朋友仔們都好守規矩㗎,真係唔會叫多餘的,其實叫咗唔食,真係幾折墮㗎,就算唔駛罰錢都唔應該囉!

    回覆刪除
  8. SKII,
    哈哈,講到自助餐同任食日本嘅壽司,嗰舊飯通常都係勁難食架!如果唔食舊飯要罰錢,有時真係幾無辜吓啫!

    回覆刪除