2010年7月4日星期日

KY哥

怪事年年有,今年特別多。作風一向低調嘅KY哥呢排唔知係咪食錯藥,頻頻發表意見,仲要多數都係民生議題。最搞嘅係鑊鑊都要同政府唱反調,鋤得仲落力過扮民班友。雖然話插政府已經成為一種時尚,但係佢身為痕政會議成員,冇理由自己都插埋一份啫。如果佢覺得政府嘅施政有唔妥,應該喺痕政會議裏面提出,如果唔係要呢個乜鬼會議嚟托咩。一係就俾吉屎嚟睇吓,好似田大少咁劈炮唔玩,但係佢又唔捨得喎。佢玩得嚟完全唔依遊戲規則,好多人都睇佢唔順眼。早兩日,同係政壇重量級嘅犯婦人就不點名批評佢唔適合做突首。其實曾突首一早就同傳媒呻過吓。但係KY哥血統優良,絕對稱得上根正苗紅,而曾突首只係微不足道嘅前朝餘孽,真係睬佢都有味啦。

究竟KY哥做乜要搞咁多出位呢,唔通佢short咗?係就係short咗,不過係恨做突首恨到short咗啫。話時話,佢嘅策略又真係好奇怪。佢身為痕政會議成員,政府嘅決策唔可以話唔關佢事,係咁踩政府嘅施政又對自己有乜好處?我冧佢梗係金庸迷,深明七傷拳嘅要訣,就係:「先傷己,後傷人」。佢嘅主要勁敵係糖糖司長,狂踩政府一方面可以打擊對手,又可以爭取民意支持,始終係利多於弊。但係下一屆突首選舉仍然係小圈子遊戲,搞咁多谷民意又有乜用?我諗佢計過條數,知道2012勝算唔高,2017至係主要戰場。講能力,佢肯定高過糖糖呢個二世祖多多聲,但係佢就衰在人緣勁差。話明係小圈子選舉,當然係軟實力緊要啦。不過呢條友係一個機會主義者,相信佢2012一定會參選,除非係阿爺叫佢唔好搞寸個party啦。如果佢參選就真係好戲連場喇,到時大家可以睇吓佢玩變臉玩得幾出神入化。

講咗咁耐,究竟邊個係KY哥?呢條友嘅真名當然無係叫KY啦,不過佢份人咁滑頭,簡直係滑不留手,唔係搽咗KY係乜?仲要係由頭搽到落腳嗰隻添。

不過諗深一層,又可能真係冤枉咗佢喎。條友奸到出汁,仲使乜搽KY啫。

2 則留言:

  1. 講料就 KY 哥高唐唐九皮!其實睇阿爺心態啫,商人特首、政務官特首都唔掂,再揾唐唐難保又不是亂局,所以 KY 哥都唔係冇行情架!

    回覆刪除
  2. 如果今日已經可以普選特首,而候選人只得兩個,一個奸,一個蠢,你會點揀?

    我就會鬧爆個奸嘅,但係最後都會揀佢。至於個蠢嘅,只可話好遺憾,政治根本唔啱佢玩。

    回覆刪除