2010年7月18日星期日

麻雀接二連三事

照妖鏡
有人話麻雀檯係一塊照妖鏡,真係好有道理。唔怕你道行高深,識得七十二般變化,坐得落嚟就一定會現形。有人平時好斯文,但係打到興起就爆粗掟牌乜都齊。又有人平時好大方,但係打起牌嚟就好賴貓。明明莊家已經打咗第一隻牌,人先至發覺自己小相公,但係就死都要人俾佢摸返隻牌。或者隻牌打咗出街又係都要攞返。又或者輪到自己摸牌但係俾人叫碰,明明只係啱啱攞起隻牌,都要死唔蝕底甩一甩先放返落去。又見過男人老狗居然滿口啋啋揚揚,但係平時都不知幾man。如果閣下俾我講中咗就真係得罪晒喇。總之有則改過,無則嘉勉啦。我自己申報,我係爆粗同拍爛檯嗰隻!

醒目仔
唔好以為醒目仔打牌就一定掂,我就識得一個世界仔,做都算幾精叻,但係打牌就好低能吓。話說有一鋪牌已經去到終局,最後嗰隻牌輪到醒目仔打。其中一家有碰有上,根本冇可能係大牌。另外兩家都係十三隻齊全,而地下么九又寥寥可數,擺明有人做緊十三么啦,仲極有可能兩家都係添。其實醒目仔已經見到風頭火勢,衰就衰在佢手上全部都係么九牌。佢諗咗好耐,卒之打隻東(其實我都唔記得係咪東,當住係先啦)出嚟,俾我食咗十三么。見佢諗咗咁耐,我地就睇吓佢究竟揸住乜牌啦。點知唔睇由自可,一睇就笑到個個反晒艇。原來佢手上仲有另外一隻東,佢係見到東最熟章所以先打出嚟,因為地下已經有兩隻東。其實地下出咗兩隻,佢自己又手揸一對,只要攬住對東唔放就點打都唔會輸啦。雖然佢出沖俾我,但係我都忍唔住鬧咗佢一聲死蠢!

大小相公
做咗大小相公真係好不幸。但係大家有冇諗過,其實下家先係最無辜!如果真係咁不幸做咗大小相公,最緊要係不動聲色,千祈唔好自動投案。我就會全程用手遮住左右兩邊,等人地數唔到牌。點解要咁做?最主要係唔好俾其他人知道打少一家,等佢地有返顧忌。尤其是係上家,如果知道下家廢咗仲唔肆無忌憚咩。仲有係必要時(當然係好緊急嘅關頭啦)可以碰人卡窿,搞喎佢鋪大牌。如果一早現咗形就冇呢支歌仔唱啦。

塘邊鶴
有人好討厭塘邊鶴,而我就覺得冇乜所謂。因為我鍾意打花章,你睇得明咪睇囉。真係有師奶話睇我打牌睇到頭都暈。其實齋睇都冇問題,最衰係口眼並用嗰隻。例如見你打隻六萬,佢就話點解唔打七萬,係都要唱晒你牌出嚟先安樂。又有人睇到兩家牌,但係就一都唔避忌咁俾意見。最誇張嘅係見過有條友睇睇吓忽然起身,圍住張檯行咗個圈,晒其他三家牌,跟住又坐返低繼續做軍師教路。最搞係有次打雀局,有個企堂唔知係咪冇做,居然睇埋一份。睇都算嘞,仲要彈我地屎章,真係火都嚟埋!

竹館
雖然打咗幾十年牌,但係就從來冇入過竹館。自問係一等良民,咁雜嘅地方真係唔敢去。而且喺竹館打牌要好正路,有得上要上,有得碰要碰,又唔可以亂拆牌,完全唔係我嘅風格。我有時會發雞盲,有時會手抽筋,又有時會走吓偏鋒,如果喺竹館就實俾人打都得啦。

白痴Game
自從戒咗打牌之後,唯一接觸到麻雀嘅機會就係玩Mahjong Titans,即係下面幅圖嗰個game。不過呢個game真係唔好玩,睇到眼都花。仲要十鋪有九鋪都係死局,白痴到無倫!

3 則留言:

  1. 呵呵,原來係高手,但為甚麼要戒呢?有節制便可以了!

    回覆刪除
  2. 最衰就係塘邊鶴,真係氣頂!

    回覆刪除
  3. laulong,

    高手我就絕對唔係,不過都未算好屎章,普普通通咁啦。但係我就勁黑仔,打親都輸,唔戒就破產都有份!


    佛爺,

    如果係熟人都冇乜所謂,最憎係嗰三九唔識七又聲氣多多嘅塘邊鶴!

    回覆刪除