2010年7月12日星期一

沙白

呢排唔知抽起邊條筋,好鍾意食貝類海產,琴日就買咗貴妃蚌同沙白。講起沙白就把幾火,買咗兩斤,竟然有超過一半係死嘅,仲要係死到發晒臭,肉已經半溶化嗰種。

買嘅時候睇唔出有問題,亦聞唔到有異味。梗係啦,街市魚檔本身已經係腥腥臭臭,而買呢又冇得逐隻揀,買到咁嘅貨色真係非戰之罪。返到屋企先聞到陣屍臭味,但係已經太遲啦。冇辦法啦,唯有逐隻聞吓,又試吓撬唔撬得開,結果揀完之後剩返唔夠一半。

最後沙白攞咗嚟白灼,肉睇起上嚟完全冇問題。點知試第一隻就覺得有異味,結果全部要報銷。都唔知係心理作用定係沙白浸得死屍水太耐,總之就博唔過啦。雖然唔係貴(30蚊兩斤),不過就真係好激氣。仲搞到我成晚形住形住,覺得周圍都係死屍味。

都唔知人乜心態,咁嘅貨色都可以攞出嚟賣。話明係街市,做嘅都係街坊客,來來去去都係嗰班人。賣埋咁嘅,人地下次仲會返嚟幫襯咩?唔通賣晒嗰幾十斤沙白就收夠籌,以後可以唔使撈?我就已經將嗰個魚檔剔出咗食品供應商名單,永不錄用!


4 則留言:

  1. haha, 我也鍾意食蜆,只遺憾在唸中大時冇去掘蜆,此情永世不再!

    回覆刪除
  2. 我都唔知中大有得摸蜆添。因為係走讀生(嗰陣住沙田,四年都冇宿舍),中大附近有乜都唔係咁清楚,連波仔記都只係去過一次咁多。至於摸蜆,淨係喺愉景灣試過(如果冇記錯,應該係二白),蜆有手板咁大隻。其實蜆唔會咁大隻,嗰應該係蚌嚟嘅。

    回覆刪除
  3. Armadillo 都係中大人。

    波仔記我都係去過一兩次,傳聞裏的波仔妹 O.K. 喇!倒是每年系際混聲比賽後都會去大埔狂歡,食完就行大埔道番中大,感覺好正!

    回覆刪除
  4. 哈哈,嗰陣唔只走讀,仲成日走堂,所以對大學嘅歸屬感真係同宿生爭好遠!

    回覆刪除