2010年11月27日星期六

禽獸不如外傳

「虐兔女事件」引起大陸網民廣泛關注,有人仲發起人肉搜索,誓要將「虐兔女」摷出嚟公審。單又一次證明群眾力量有幾偉大,唔使幾日,搜索結果已經喺網上公布咗。有人話虐兔女叫做葉X婷,又有人話佢叫做黃X婷,更有人話係網站為咗谷點擊率而拍嘅。今日睇報紙,又有另一種講法。話主角叫做黃小小,係受僱拍虐待小動物嘅視頻,觀眾對象係國外嘅變態人。真係莫衷一是,都唔知信邊個好。

不過點都好,有一點就可以肯定,涉事嘅一干人等都係喪心病狂嘅變態怪物!佢地有可能係發過高燒,燒壞咗個腦。又有可能係受過扑頭黨襲擊,俾人扑到short咗。總之唔理佢地有乜動機,或者係乜令到佢地咁變態,呢都只係佢地嘅個人問題。不過好奇怪,竟然有人歸咎佢地嘅DNA。

自從條片曝咗光,網民嘅留言多不勝數,絕大部分都係鬧爆個虐兔女。但係有人喺狂鬧之餘,仲話係中國人DNA嘅問題。竟然拉埋中國人嘅遺傳基因嚟講,都算離奇喇。所謂樹大有枯枝,中國有好似虐兔女呢變態人有乜咁出奇,最重要係我地見到主流意見都係譴責呢種變態行為嘅。唔通呢班發表「DNA理論」嘅人係盲嘅,所以佢地睇唔到?好明顯,班友只係借題發揮啫。更離奇嘅係,喺呢類留言之中,大部分都係用中文打嘅,班友又點解要惡意唱衰自己嘅民族呢?

我知道有好多人對中國政府、共產黨、或者部分內地人好不滿,成日喺網上發表狠批中國嘅言論。如果係有針對性嘅批評,我覺得絕對冇問題。不過部分人就硬係鐘意借題發揮,有親乜都要拉埋中國政府、中國人、甚至成個中華民族落水。真係奇怪,唔通佢地自己唔係中國人?當然,可能有部分的確唔係中國籍。而另外有,雖然係中國籍,不過就死都唔肯認。真架,我相信今時今日仲有好多香港人唔肯承認自己係中國人。點都好,話係華人就冇得唔認啦。

咁點解身為華人又會發表咁嘅言論呢?可能因為佢地恥為華人啩,所以要不遺餘力咁同中國劃清界線。如果真係咁,我會覺得佢地好可憐,直頭係可憐蟲!唔好誤會,我唔係講緊乜民族大義。事實上,我並唔讚成鼓吹民族主義。淨係睇吓蘿蔔頭,就知極端民族主義有幾恐怖!

民族呢樣,生出嚟係咁就係咁,大家都冇得揀。生為華人,唔需要引以為榮,亦冇理由要覺得羞恥。如果真係恥為華人,唔想做華人,都唔係話唔可以。不過淨係染金把頭髮唔夠架,起碼要學好外語。用華人嘅語文講出一侮辱全體華人嘅(例如上面提到嘅DNA理論),只會俾人覺得好可憐。因為佢地擺脫唔到身為華人嘅事實,但係又唔肯接受現實。

唉,真係一堆可憐蟲!

6 則留言:

  1. 說得好!香港很多人不了解國家,卻罵國家上癮,更有甚者是打著愛國之名,卻做著逆反之事(當然還比不上那無恥之尤的自認李漢奸)。

    這班人實在不配活在這片土地上,更不配飲用我們的江河水!

    回覆刪除
  2. laulong,
    我都好增嗰班友,中國政府同香港政府做親乜都鬧,鬧得嚟又冇充分理據,同潑婦罵街完全冇分別!

    回覆刪除
  3. 這點我同你們二位睇法都一樣,點解中國政府同香港政府做親乜嘢都鬧?好多時又冇更好的建議喎,剩係識鬧鬧鬧!

    回覆刪除
  4. Coffee,
    點解?係因為人性中嘅兩樣:無良同無知!無良嘅政棍為咗政治利益大派糖衣毒藥,而無知嘅盲毛就將毒藥當糖咁食!

    回覆刪除
  5. 乜都罵,比人一種他們是神經佬的感覺!

    回覆刪除
  6. 佛爺:
    班友嘅人生樂趣就係鬧人,睇怕真係唔係好正常!

    回覆刪除