臭罌出臭草

之前講開隻疴屎簋醉酒行兇單，好多人覺得判四年幾監太輕，唯獨有個人就認為條友係無辜嘅。居然咁白痴，究竟係乜水嚟？咪係條友個老豆囉！佢同記者表示好不滿個裁判結果，仲批評香港嘅司法，話刑事定罪率離譜到有九成咁高。

唔通真係臭罌出臭草，個仔咁白痴無良係得到佢老豆嘅遺傳？幾十歲人，又做咗人老豆，照理都應該識諗架啦。有腦嘅都知單有輸冇贏，條老坑應該勸個仔認罪，起碼可以博減刑先啦。再識做嘅就教個仔向死者家屬道歉，博吓輿論同情。可能條老坑都係以為佢地嘅膚色夠照，實冇事嘅。結果錯判形勢啦，真係愚不可及！

仲有，條老坑講都唔經大腦，都唔知佢有冇諗過刑事定罪率高係代表乜。等我話俾佢知啦，係代表律政司做夠審慎，唔夠證據唔會亂起訴人。如果條老坑祖家嘅刑事定罪率超低，咁又代表乜呢？咪即係有殺錯冇放過，係又告，唔係又告囉。唔知邊度嘅司法先有問題呢？

至於臭罌出臭草呢個講法，我一向都覺得有道理。我絕對相信對兒童影響最大嘅父母嘅身教。自私自利、無惡不作嘅父母係冇可能教得出孝悌忠信禮義廉恥樣樣有齊嘅仔女，就算佢地本質幾好都係咁話。

不過對於性格係咪可以遺傳，我就從來都唔敢肯定。但係睇返呢單，似乎又有啟示喎。據聞隻疴屎簋一早就跟住佢阿媽改嫁去咗花旗國，咁佢冷血無良應該唔係條老坑訓練出嚟架啦，真係遺傳嘅講唔埋喎。咪住，會唔會佢阿媽同埋後父都係咁嘅人呢，所以先教到佢咁賤格？成家冇個好人咁大鑊，唔會卦！