禽獸不如

哈哈，今日又有好介紹俾大家嘞，就係以下呢條片：
http://www.youtube.com/watch?v=kMt4HxmAy_o

柿餅大家都知道係乜，但係兔餅你地又有冇見過呢？仲有，衣冠禽獸係點人人都知，不過禽獸不如嘅人又有冇見識過呢？如果你地冇見識過，睇吓條片就知架喇。不過咁，自問大膽嘅先好睇，因為內容真係好得人驚！

話說近日內地網站流傳一條叫做「變態美女虐殺小動物」嘅視頻，裏面見到一個據聞來自四川嘅「美少女」點樣虐殺一隻可愛嘅兔仔。「美少女」嘅行為令人髮指，俾網民鬧到爆，仲話要發起人肉搜索添。

如果你唔敢睇條片，唔緊要，就等我簡單咁描述吓啦。條片嘅主角係一個長髮「美少女」同一隻嬌小可愛嘅黑白兔仔，配角係兩個旁觀嘅女子。至於條片係乜人拍嘅就唔知嘞，條友一直都冇出鏡。

條片開始嘅時候，「美少女」喺兔籠攞隻兔仔出嚟，好有愛心咁同佢玩，仲對住鏡頭say hello，場面都不知幾溫馨。佢跟住攞起塊厚玻璃，對住鏡頭扮咗個鬼臉，氣氛就變得有詭異嘞，似乎預告有唔尋常嘅會發生。不過點都估唔到，佢竟然將塊玻璃壓住隻兔仔，然後一坐落去，仲要不停咁un吓un吓添。最後「美少女」攞開塊玻璃，反覆檢視件製成品。照估佢都應該好滿意，因為隻兔仔已經變成一塊兔餅！

條片能夠引起廣泛關注，主角「美少女」嘅落力演出當然係關鍵，佢將乜叫做人面獸心示範得淋漓盡致，令人嘆為觀止！不過兩位女配角亦功不可沒，如果唔係有佢地嘅歡樂氣氛襯托，條片都唔會有咁震撼！

講真，話嗰幾個「美少女」人面獸心都唔係好恰當，用禽獸不如嚟形容佢地就fit晒嘞！不過咁，你地又唔好以為我係嗰動物維權人士喎。我相信弱肉強食係自然規律，就算係可愛嘅兔仔，用嚟做食物根本冇問題。但係以虐殺為樂，就絕對唔係動物嘅本能。

喺動物世界，食物係好珍貴嘅，因為得來不易。禽獸捕殺獵物，係為咗生存。佢地唔會濫殺，因為對自己一好處都冇。更加唔會以虐殺為樂，因為咁做只會浪費精力。可能只有人類係例外，會享受虐殺其他動物、甚至同類。我話嗰幾個「美少女」禽獸不如，絕對唔係無的放矢架，因為連禽獸都唔會好似佢地咁虐殺小動物。

本來我唔係好認同人肉搜索，覺得係一種網上集體暴力。不過今次都希望網民可以摷到嗰幾個「美少女」出嚟，等佢地試吓俾人集體蹂躪嘅滋味！