冷漠

眨吓眼，為期半年嘅上海世博已經曲終人散。近年好怕去人多嘅地方，所以由頭到尾都冇諗過要去睇吓，不過就有留意傳媒嘅有關報導。一般意見認為上海世博喺硬件上搞得好成功，但係亦暴露咗國民質素嘅不足。想講吓其中一個例子，可能大家都仲會有印象。

世博啱啱開始嘅時候，無線個記者去做咗個實驗，孭住個冇拉好拉鍊嘅背囊四圍行，睇吓有冇人會提醒佢。結果過咗廿幾分鐘，連一個都冇。不過如果就咁結論話中國人嘅質素低，又未免武斷咗。嗰時世博啱啱開幕，只可以用兵荒馬亂嚟形容。個個掛住衝鋒陷陣，鬼有人留意你個背囊有冇拉好咩，除非係嗰想打你主意嘅扒手啦。

當然，我都相信有人係視而不見嘅。始終，「各家自掃門前雪」係中國人嘅固有觀念。而且喺大陸，好心著雷劈嘅例子真係多不勝數。如果因為想幫人而惹禍上身，就唔係好值得嘞。我會話呢係冷漠，至於算唔算係低下嘅品格，咁就見仁見智喇。

講到冷漠，我絕對相信香港比上海係有過之而無不及。等我又講吓一單親身經歷。

話說有一次去搭火車，要行一段大直路先到閘口。離遠已經見到一個女人，喺最左邊嘅閘機搞咗好耐都出唔到閘。我諗佢應該唔係本地人，因為佢唔知閘機上面嘅紅交叉同綠箭嘴係點解。佢喺一部入閘專用嘅閘機，梗係出唔到閘啦。當時人來人往，出閘嘅有，入閘嘅都有，就係冇一個人提吓佢。到我行到埋閘口，佢都仲係未搞掂。由我見到佢開始計，起碼有廿幾人出閘入閘，竟然冇人諗住要幫佢。其實都係開句聲啫，又有幾難呢。我入閘之後就同佢講，叫佢去右邊嘅閘機試吓。我係用廣東話同句講嘅，不過佢應該聽得明，因為佢唔使幾秒就出咗閘，消失喺人群之中。

本來幫到人自己都會開心，而且連舉手之勞都唔算，只係開句聲啫。不過個女人嘅反應就出乎我意料之外，唔只唔該都冇聲，根本連望都冇望係邊個同佢講。搞到我覺得自己好似傻仔咁，對住空氣自言自語。當然，我明白施恩莫望報，而且呢都唔算係乜恩惠，佢講一聲唔該對我又唔會有乜實際好處。不過人地幫咗你，起碼都要望人一眼，或者點吓頭，表示收到。呢係待人接物嘅基本常識，根本就唔使人教。

自問唔係嗰只問耕耘嘅人，我幫人當然唔係為咗要得到乜報酬，但係起碼都要知道人地收到。一小小嘅表示（例如點吓頭）就足夠，已經係一種鼓勵，係令到我繼續幫人嘅動力。講真，世界上又有幾多人好似阿福咁，有無私奉獻、捨己為人嘅高尚情操？

冷漠會造成惡性循環，因為呢樣有傳染性。人與人嘅相處，要有互動先至可以持續。所謂「人人為我，我為人人」，就係一個互動嘅良性循環！

同場加映：臭罌出臭草續集
哈哈，啱啱喺壹仔睇到篇同癲狗有關嘅，臭罌出臭草又多咗個例證嘞！