鯰魚

而家至寫鯰魚會唔會遲咗呢？冇辦法啦，早排又唔得閒寫。

又話係二百年一遇嘅超強颱風，點知呢條鯰魚完全冇料到。打風嗰幾日淨係天陰陰，連雨都冇滴，真係一句「也無風雨也無晴」就可以概括晒呢個風嘅表現。個風咁不濟，我諗有人會好失望。

首先，嗰班天譴論支持者冇咗個借題發揮嘅大好機會。突首啱啱發表咗份「盡失民心」嘅施政報告，跟住就嚟個超強颱風，仲唔係天譴？！我諗班友一早就寫定晒社評或者blog之類，一等有乜死人冧樓，就可以話係突首累街坊。而家乜事都冇，佢地唔失望就有鬼啦！

另外，有人諗住有日假放，可能仲連麻雀腳都約埋添。結果眼鏡跌到一地都係，又要繼續返工，唔失望先奇啦！不過失望還失望，呢始終係天意，要怨就只可以怨個天。

但係斑友竟然遷怒李+x，話係乜「李氏力場」令到佢地冇咗日假。本來呢咁嘅無聊，真係一笑置之啦。奇就奇在居然有好多人附和，搞到單喺網上熱爆。原來香港真係咁多無聊人，你都唔好話唔得人驚！如果李+x真係有特異功能，第一時間就整死你班成日喺度搞針對嘅無聊人啦，等你班友仲有機會發噏風？！

講真，呢班友唔止無聊，仲好冷血添。打風絕對唔係好事，就算冇死人冧樓，都起碼會有人屋企水浸。而且都唔係人人可以放假，仲有好多人要冒住生命危險返工架。真係想個風打得成，咪靜雞雞祈禱話俾上帝知囉，使乜咁高調講出嚟啫。好似慌死冇人知道佢地係冷血動物咁，你話奇唔奇？

不過更離奇嘅都仲有，天文台居然高調回應，話「發出熱帶氣旋警告時，一定會以市民的安全為首要考慮，強調絕對不會受任何經濟或商業活動影響」。個風究竟有幾大威力，係咪值得俾個八號波佢，個個都有眼睇。咁無聊嘅都要走出嚟回應，唔通天文台長真係好得閒，食飽飯冇做？呢個政府有幾無能，絕對可見一班！

香港有班咁嘅無聊人，又有個咁嘅無能政府，真係想唔死都幾難！