夢碎香江

早兩日睇咗集「星期日檔案」，叫做「少數少年夢」，講一香港土生土長嘅少數族裔青年喺實現佢地嘅夢想時遇到嘅困難。

喺其中一個個案裏面，有個南亞裔青年發夢都諗住要做警察，但係因為中文水平唔達標而衰咗，最後做咗跟車送貨。另外有個求職個案，喺電話傾都冇問題，但係面試就見光即死。雖然節目裏面冇講到明，不過問題癥結係種族歧視就呼之欲出。

我敢講香港係歧視之都，真係乜都有得歧視。不過少數族裔工處處碰壁，係咪一句種族歧視就可以解釋晒呢？等我又分享吓一請人嘅經驗。

以前請人會喺南早登英文廣告，通常登一次會收到過百封求職信。求職者當中梗會有英語人，南亞裔嘅有，彬彬都有，不過簋就冇。梗係啦，我請嘅係user support呢的散仔位，簋點會有興趣啫。講開又講，而家唔用得個鬼字，真係好冇癮！收到呢英語人嘅信，我會即刻攞去碎咗佢，直頭連做filing都費事。咁係咪種族歧視？我絕對唔認架！咁份工係咪唔識中文唔得？又唔係嘅，公司有好多簋，而且個個同事都識講英文，所以識英文至係主要條件。不過咁，我自己係土砲出品，英文只係有限公司。如果請個英語人返嚟，成個部門就即刻要轉台，盞煩到自己。而且呢散仔位要求唔高，求其有個大學學位就掂，我有大把選擇。我會專攻嗰啱啱浸完鹹水返嚟嘅，佢地嘅叫價仲低過嗰土砲名牌大學生。

所以呢，講到工，唔係話個求職者勝任就掂，最主要都係睇個僱主仲有冇其他更好（或者更適合）嘅選擇。呢個係競爭力嘅問題，唔一定關種族歧視嘅事。而家香港人浮於事，都唔知幾多後生仔唔到做，僱主真係大把選擇啦。所以少數族裔想到份滿意嘅工，一定要好過土產先有機會。

講真，喺香港又唔係話唔識中文就一定唔掂。都唔知幾多簋嚟咗香港幾十年，咪又係一隻中文字都唔識？不過人地層次唔同，唔恨得咁多架喇。而家講緊嘅嗰南亞裔係草根階層，如果唔識中文就肯定唔夠人爭。你鍾意叫呢做種族歧視又好，叫乜都好，總之全世界都係咁架嘞。又睇吓華人移民去花旗國，如果唔識英文，咪注定要成世踎喺唐人街洗碗！當然啦，有米嘅除外。

移得民去一個地方，就要接受人地嘅文化，融入人地嘅社會。如果連莊閒都唔識分，真係冇人幫得到架。當然啦，有米嘅又係除外。我都知歧視無處不在，要融入一個異族嘅社會真係談何容易。但係呢個係冇可能一朝改變嘅現實，除咗主流社會要多包容，少數族裔更要加倍努力。始終求人不如求己，等運到只有死路一條！