淫褻物品

今日想介紹吓北歐風物，同大家睇睇挪威嘅人像雕塑藝術。不過由於尺度所限，相都處理過，唔可以原汁原味咁俾大家睇。我驚萬一明肛社諸公（或豬公）睇到，走去淫嬸處投訴，咁就大煲嘞。你地知啦，發布色情物品係嚴重罪行，實要洗定個八月十五啦。寫blog呢無聊，冇理由要攞個八月十五嚟教飛啫。

講返雕塑，女嗰件係擺喺奧斯陸市政廳前面嘅廣場，男嗰件就放喺韋格蘭雕塑公園，都係遊客必到嘅景點。無論本地人又好，遊客又好，都見到佢地有帶埋細路去睇，似乎唔覺得有乜好避忌。咪以為淨係西人先係咁開放，好多亞洲遊客都係咁架。如果喺香港，呢兩件雕塑實會俾淫嬸處評為淫褻物品啦。因為兩件雕塑都係三點盡露，而且重要部位又冇刻意簡化，仲要擺埋個大開中門嘅姿勢添。

淫嬸處豬公當然唔會理係咪藝術品，亦都唔會關心作者想表達乜。佢地有一套簡單而明確嘅標準，總之按本子辦事就掂。其實咁嘅手板眼見功夫，使鬼嗰班有識之士做咩，求其個阿嬸做都得啦。一套侏儸紀嘅標準，加埋一班豬玀紀嘅人，真係唔出事先怪。

結果真係出事嘞，淫嬸處豬公居然搞笑到將大名鼎鼎嘅大衛像列為不雅物品，要幫佢著返條褲仔先可以公開展出。雖然事件最後俾法庭擺平咗，但係就已經笑死晒班簋佬。香港仲話係國際都會，其實喺呢方面完全追唔上國際步伐，甚至比大陸更保守。

講到大衛像，忽然諗起一單陳年舊事。記得中一歷史教科書有一張大衛像嘅相，女同學都唔覺得有問題，不過就有個男同學無聊到用水筆幫大衛加咗條泳褲仔。估唔到見多識廣嘅淫嬸處豬公，思維竟然會同上世紀嘅一個初中生完全冇分別。

本來有個咁嘅淫嬸處已經夠頭痕架嘞，但係偏偏又有明肛社呢衛道組織喺度推波助瀾。佢地雙劍合璧，真係天下無敵，誓要將香港帶返去石器時代。明肛社提倡嗰清規戒律真係十分惡頂，連自慰都話唔俾。本來人地教派嘅我都唔理得咁多，但係佢地成日高調咁投訴呢樣，投訴嗰樣，連非教徒都要搞埋，我就睇唔過眼嘞。

最經典就係幾年前嘅中大學生報情色版事問卷事件，到而家仲記憶猶新。份問卷問埋晒關於亂倫、人獸、多P、同埋性幻想嘅，不過裏面就冇繪影繪聲嘅描述，亦見唔到有鼓吹呢嘅意圖。呢禁忌唔係話唔講得，如果真係想探討呢問題，或者更深入去做學術研究，喺學生報發表絕對冇問題。不過我就見唔到份問卷有乜學術成份，我覺得班學生只係貪玩，想觸及一社會禁忌啫。咁嘅內容當然唔叫得做雅，只會令人覺得無聊同埋品味低俗，俾人砲轟都好正常。但係明肛社竟然小題大做到走去淫嬸處投訴，而學生又死都唔肯認錯，單就越搞越大。後來淫嬸處仲將嗰期情色版評為二級不雅，有關學生可能要負上刑事責任。好彩後尾法庭推翻咗淫嬸處嘅不雅評級，班學生先可以甩身。

睇返成件事，學生、明肛社、同淫嬸處都令人好反感。先講明肛社，明明係芝麻綠豆嘅小事，但係就要搞到上淫嬸處，分明係想置學生於死地，枉佢地仲成日講神愛世人！到淫嬸處嘞，佢地又係用埋晒豬玀紀標準，將低俗無聊評做不雅，真係唔知佢地個腦生咗喺邊度！評級成日俾法庭推翻，難為佢地又唔覺得瘀，真係佩服到五體投地！至於學生，佢地係始作俑者，受教訓係絕對應該。不過佢地死唔認錯，仲要扯埋言論自由同學術自由嚟講，真係不可救藥！講言論自由都算嘞，佢地有自由發表的咁嘅，人地都有自由鏟佢地。至於用學術自由嚟做擋箭牌，呢樣先俾佢地激死。如果真係有人以為中大嘅學術水平低到咁離譜，就絕對係累街坊，連我呢個中大校友都映衰埋！我交咗咁多年稅，原來係資助咁嘅人讀大學，條氣真係好唔順！