2010年11月22日星期一

蝸居樂與怒

琴晚集「星期日檔案」叫做「蝸居樂與怒」,講八十後嘅置業煩惱,以下係轉載TVB網站嘅內容簡介:

面對遙不可及的樓價,八十後的年輕人各自謀算,有人為買樓苦惱,也有人樂於蝸居,不甘心做房奴。

二十九歲劉國勳,北區區議員,月入二萬多;一家四口自小住在三百多呎粉嶺公屋,現在仍跟妹妹上下格床,同睡一房;考慮購買居屋,但居屋也不便宜。

二十九歲Emily,高級網頁設計師,月入一萬八;跟兩位女伴,分租中環舊樓一個六百多呎單位,很想有自己的「家」,但夢想跟現實仍有一大段距離。

二十六歲阿賢,港大畢業,做社區發展工作,月入一萬三;在旺角月租四千一、面積一百多呎的「劏房」居住。住「劏房」覺得似過客,但阿賢又不甘心做房奴,一世人為了層樓打工。


首先,個簡介已經有問題,節目裏面根本就冇人「樂於蝸居」,全部都係被迫嘅,睇佢地全程埋怨就知啦。

先講嗰個肥仔區議員,其實佢都唔係買唔起樓。金融海嘯樓價跌嗰時佢又唔買,成日想等樓價跌多,摸底入市。到樓價升返,佢又唔想追,淨係識得喺度嘈。睇唔通個市,除咗怨自己仲可以怨得邊個?不過佢就離譜到埋怨地產商冇盡社會責任,話佢地應該賺少,唔好賣到咁貴喎。咁白痴都可以做到區議員,可想而知選民係乜質素,諗落都幾恐怖!

樓價係由供求關係決定,有人出得起價,地產商做乜要賤賣,你當佢地開善堂呀?如果冇人買,地產商自然會減價,就算要蝕都係咁話。而且好多地產商都係上市公司,要對小股東負責架。好似我自己都曾經係新X基嘅小股東,如果佢地由商業機構變成善堂,又對唔對得住我?就算地產商真係肯做善事,受惠嘅都係嗰炒家,你當佢地食齋架?我好想嗰位區議員撫心自問,當佢而家已經有層樓喺手,佢會唔會以低於市價賣出去益街坊?其實好多人都係咁嘅心態,樓價跌又唔敢入市,樓價升又嫌貴,買唔到樓絕對正常。沙屎嗰陣通街都係平樓,又唔見佢地買,敢入市嘅咪又係嗰班投資者!

跟住講吓個女子,佢已經移民咗去楓葉國,回流係因為覺得香港多機會。係人都知楓葉國居住環境一流,咁仲走返嚟做乜?香港係點嘅環境佢又唔係唔知,自己揀嘅又怨得邊個?要怨都怨點解楓葉國唔為國民創造多機會啦。

至於嗰個做區發展工作嘅,我就覺得係一個好自我中心嘅憤青。佢自己一個搬咗出嚟住,租一間百零呎嘅劏房。因為租貴,令到佢要犧牲一嗜好。佢就話港府嘅政策挑戰佢嘅居住極限,又話社會好似係進步咗,但係佢嘅生活質素反而倒退緊。

我以前一家六口住喺三百零呎嘅公屋,簡直係完全冇私人空間,嗰種擠迫法唔知佢又想唔想像得到?而家公屋絕對唔使咁迫,仲唔係有進步?百零呎嘅劏房其實都唔錯啦,起碼叫做有個私人空間,仲想點呀?想得到一,梗係要犧牲另外一架啦,成日諗住不勞而獲。人地住洋樓養番狗係人地本事,想改善生活質素就努力錢啦。其實政府都唔知對佢幾好,資助佢讀大學。做多幾年,等累積交嘅稅夠冚嗰筆數先至講啦。

人成日埋怨樓價高,話好難儲夠首期,想政府隊冧個樓市。佢地又知唔知,原來儲筆錢賣樓仲辛苦呀,我就試過嘞。而家咁多人買唔到樓,都未聽過有人因為咁而自殺。幾年前通街負資產嗰陣,就真係令到好多人燒炭嘞。而且經濟嘅,係一環扣一環架,樓市冧咗會牽連好大。想突首落重藥?咪發夢啦,俾個天佢做膽都唔敢!

6 則留言:

  1. >>咁白痴都可以做到區議員,可想而知選民係乜質素...

    所以咪話咯,質劣平庸嘅大多數點可以選出人才呀,再加上參選嗰啲都唔係人才,選啲廢契出黎咪誤吓蒼生咯!

    回覆刪除
  2. >>北區區議員,月入二萬多;一家四口自小住在三百多呎粉嶺公屋,現在仍跟妹妹上下格床,同睡一房;考慮購買居屋,但居屋也不便宜。

    他已比很多人好,肯動下腦筋的話,改善居住空間不成問題。肯定他自己都不知自己想點,剩係識嘈嘈嘈!

    回覆刪除
  3. 月入兩萬真喺幾好㗎啦。用下個腦啦尊貴議員。

    我覺得呢,做議員嘅應該身先士卒,「盡社會責任,應該賺少啲」,每個月捐一半薪水出嚟,俾啲有需要嘅市民,起帶頭作用囉。

    楓葉國呢,其實機會唔少㗎,起碼而家經濟好過美國,如果一樣都要挨,點解唔留喺楓葉國呢。我估主要都喺唔捨得香港嘅生活掛。

    回覆刪除
  4. 這些怨天尤人的怪物根本無得救!

    回覆刪除
  5. 啱啱睇晒嗰節目,嗰個做社區發展工作嘅,頭腦真喺有趣,竟然話而家冇家嘅感覺,你喺有一個家㗎,喺你死都要搬出嚟,唔同你父母一齊住嗟。

    回覆刪除
  6. laulong,
    係呀,如果選民只係放眼喺一己嘅利益,而議員又缺乏長遠目光,淨係識俾選民牽住個鼻走,真係唔亂就有鬼啦!好不幸,香港正係朝住呢個方向發展!

    Coffee,
    哈哈,我就知佢想點喎!佢想政府隊冧個樓市,等佢可以摸底入市。等佢做咗業主之後,就會反對任何進一步抑壓樓價嘅措施架喇!

    Eric,
    作為區議員,佢梗係要為市民(當然包括佢自己)爭取福利架啦。至於提供福利嘅,就梗係香港政府啦,有乜理由要佢小市民付出一分一毫啫!楓葉國可能都係適合退休人士多,後生女梗係鍾意香港啦。不過咁,有得必有失呢個道理,我諗佢未必明囉。至於嗰個做社區發展工作嘅,我都話佢極度自我中心架啦。對於佢嚟講,家,有佢自己一個就夠!莫講話小小一個家啦,連宇宙萬物都係以佢為中心運轉架!

    佛爺:
    哈哈,你有落後於形勢喇!而家怨得越多,著數就越多架!

    回覆刪除