2010年9月29日星期三

老到懵咗?

你老到懵咗?呢句我地成日聽到,我自己就間中都會用嚟鬧吓老而不,好似李XX同陳XX之流。不過鬧人老到懵其實好惡毒吓,因為老人痴呆真係好慘,病情嚴重嘅簡直生不如死!

早幾日提到一個老人痴呆嘅阿婆因為失禁而俾個無良護理員餵食C,真係好得人驚。令人震驚嘅唔止係個護理員咁喪盡天良,更加係因為老人痴呆症嘅可怕。

呢個病會令人記憶力衰退,唔記得自己住喺邊,甚至連親人都唔認得。表達能力亦會受影響,嚴重起嚟仲會語無倫次添。最可怕嘅係會喪失自理能力,會大小便失禁,甚至連著件衫咁簡單嘅都做唔到。

好似上面提及嗰單,阿婆好明顯係冇自理能力同表達能力,結果就任人魚肉。我又會諗,呢個病會唔會影響埋人嘅感官同基本認知能力呢?會唔會根本分辨唔到C嘅味道呢?又抑或會唔會冇咗對臭味抗拒嘅本能呢?我冇做過查證,只係亂咁諗吓啫。

琴日又睇到新聞話因為藥費太貴,高錕校長停藥幾個月,結果導致病情惡化。睇完單新聞真係令人好唔安樂,高錕校長一個咁好嘅人,唉。我又諗,如果以高校長嘅家境都覺得藥費貴,好似我呢草根階層,如果得到呢個病都唔知點算好!

講開又真係好驚吓,我發覺自己近來好冇記性。買唔記得找錢,煮飯唔記得㩒掣,炒餸唔記得落糖,煲湯唔記得落蜜棗,連整我最拿手嘅XO醬都衰咗,居然唔記得落蝦乾。有一次去超市買仲經典,填送貨單嘅時候竟然諗唔起自己個地址!唔得,真係越諗越驚!

聽人講打麻雀可以預防老人痴呆,都唔知真定假。不過我已經連手指都斬埋,行唔通。哈哈,唔知寫多blog又有冇幫助呢?

後記:
上文提及嘅李XX同陳XX係兩條棍,至於係兩條乜棍就不便說明嘞。而相裏面嗰位老人家,只係旅行時影嘅,並唔係話佢有老人痴呆。



17 則留言:

  1. 政棍?攪X棍?

    老人癡呆喺應該會令人嗅覺味覺失靈。不過就好難肯定喺因為嗰病丫,定只不過喺器官退化。
    啱啱今年有篇報告話可以用嗅覺靈敏度去驗有冇老人癡呆,不過都仲喺用老鼠做嘅實驗。

    高校長嘅情況真喺好令人心噏。用咁多腦嘅人都會老人癡呆,睇怕打麻雀打橋牌打乜都好都冇乜用囉唉。
    其實我諗高校長唔喺有太多積蓄,啲沓水舊生可以諗諗佢。

    寫多啲網誌就一定好啦!

    回覆刪除
  2. 寫多啲網誌啦!腦動,手動,對週邊事情還有感覺,再用文字去表達出來,這一連鎖反應很能深層鍛鍊思維,所以keep住寫網誌對人的大腦一定非常有益。

    回覆刪除
  3. Eric,
    其中一條棍係狀棍,而另外一條真係唔講得,不過可以俾貼士。世界上有兩樣唔可以批評,絕對係掂親都死。其中一樣係種族,而第二條棍就係同另外嗰樣有關。高錕校長攞咗諾貝爾獎,應該頂得一陣。貢獻社會唔表示要犧牲自己,我絕對支持高太用獎金嚟幫高校長醫病!至於老人痴呆,既冇得預防,又冇得根治,真係驚都冇用,唯有唔好諗咁多啦!

    Coffee,
    哈哈,承你貴言!不過我又驚寫咁多無厘頭,人地唔係覺得我老人癡呆,而係覺得我發神經!

    回覆刪除
  4. 看你的分析力,無理由有癡呆症。若果有,就可能只是「入廚癡呆症」而已!嘻嘻!

    回覆刪除
  5. 佛爺:
    哈哈,承你貴言!「入廚癡呆症」我又真係唔驚,煮唔好食又冇乜嚴重後果嘅。咪住,之前好似有單新聞話有個男人嫌佢老婆煮唔好食,結果就斬死個老婆。「入廚癡呆症」原來都可以致命架!

    回覆刪除
  6. 你應該繼續寫博客,你的不少分析很獨到,觸發我的思考和靈感!

    回覆刪除
  7. 佛爺:
    唔使咁客氣喎,你嘅創意我都好佩服架!

    回覆刪除
  8. 別人笑我太瘋顫 我笑他人看不穿!

    共勉!

    回覆刪除
  9. Coffee,
    係呀,好似喺動物園,你見到隻動物覺得好得意,其實隻動物見到你都覺得好趣緻。

    回覆刪除
  10. haha, 政棍唔駛多講都明,另一條係神棍嘛!嗰條友,我見到佢前面就嬲到佢後面,又係我一見就想嘔嘅人。

    至於癡呆,打麻雀都唔救得幾多。始終都係多睇報刋多思考著數,跟手鬧吓啲政棍訟棍神棍,得閒又插吓啲癲狗長毛賊廢傳媒,仲有啲廢官...

    哇,咁多嘢被我鬧,個腦係咁轉,想癡都難!

    回覆刪除
  11. laulong,
    講開神棍(你都算大膽喇),真係唔明白點解一牽涉到宗教就全無理性可言。至於老人痴呆,我都相信思考多會有幫助,不過都只係延緩,根本講唔上預防。如果命中注定,真係避無可避!

    回覆刪除
  12. 哈哈,哦原來如此!一時醒唔起添!佢個教呢排都爆咗好多醜聞出嚟,嗰教主要猛咁say sorry。上幾個禮拜仲喺本鎮開咗個壇作法,不過要收錢先可以入場嘅,都唔平㗎,有啲怪囉。

    回覆刪除
  13. Eric,
    嗰醜聞根本就係佢地嘅傳統,雖然近年爆咗咁多出嚟,其實都只係滄海一粟!講到斂財,真係一都唔怪。西方有十一奉獻,中國有添香油,總之就非財不行啦!死嘞,講咗咁多唔掂得嘅添,我驚會俾人插!

    回覆刪除
  14. 睇到最後幾條留言,才知陳XX係邊個。

    不過咁,佢可能係有老人暴戾症。但佢有神稟,所以稟神都以為佢正常!嘻嘻!

    回覆刪除
  15. 佛爺:
    呢條友講一套做一套,真係稟神都冇句真!

    回覆刪除
  16. 以前參選過一個古老教堂,個男修道院有一條地下秘道通去另一個女修道院,呢嗰秘道喺現代被人發掘出來時喺佈滿嬰兒骸骨嘅。。。喺幾百年來嘅骸骨。

    回覆刪除
  17. Eric,
    聽聞好多f***er投身鉸會其實係要掩飾佢地嘅真正身分,橫掂佢地根本都唔想結婚。喺鉸會呢咁封閉嘅地方,真係為所欲為,鍾意點玩就點玩!又聽聞話鐘鉸界其實好黑暗,人成日勾心鬥角,手段仲毒辣到唔係常人可以想像嘅添!

    回覆刪除