綠色荒謬

我唔係講緊民進黨，雖然佢地又真係好荒謬吓。

我好鍾意綠色，因為睇落好養眼。似乎環保人士都好鍾意綠色，所以環保組織成日叫做綠色乜乜，綠色物物。本來用綠色代表環保都好合理，但係有環保分子嘅荒謬就令我覺得佢地侮辱咗呢隻顏色。

環保組織成日開口和平，埋口和平，但係作為就好霸道，有時仲會用埋暴力添，好彩呢情況香港比較少。佢地成日話人唔環保，但係自己示威就出動大量banner，有製造垃圾之嫌。雖然我唔敢肯定banner係唔係用完即棄，但係次次行動都會有特定主題，用得返嘅機會就真係微囉。除咗呢，仲有以下嘅荒謬。

荒謬1：魚翅婚宴，人情七折
竟然教唆人地喺朋友嘅大喜日子玩，真係冇品。對食翅反感咪唔好去飲囉，做乜要搞寸人地個party先。一係就索性絕交，連人情都慳埋。總之喺人地個婚宴搞事就絕對無可以接受。咁嘅屎橋，都唔知係邊個諗出嚟架。睇嚟呢條友除咗一班志同道合嘅環保先鋒之外，冇可能會有其他朋友。

荒謬2：保持室內25.5度
我都唔知商場同埋公共交通工具搞乜，夏天就凍過殮房，冬天又熱到焗爐咁。室溫保持喺25.5度真係好舒服，絕對值得提倡。不過如果淨係按本子辦事，唔識靈活變通，又會出現問題。有個朋友同我講，而家去親康文處嘅室內運動場打波都熱到想死，因為佢地將冷氣校細咗，令到室溫保持喺25.5度。正常情況梗係冇問題啦，但係打波打到㷫合合就唔同咁講法。而家呢個弱勢政府，行政僵化，又驚俾環保人士插，真係冇計。睇怕要熱死一兩件，呢個情況先可以改善。

荒謬3：驗葉唔驗梗
話說有次XX和平驗到有菜心農藥超標，佢地都不知幾開心咁公報結果，因為又係一次環保嘅重大勝利。點之後來俾人督爆，原來佢地只驗菜葉唔驗菜梗，並唔係標準做法，有誤導之嫌。計我話，邊度係誤導，直頭係存心欺騙觀眾。唔知佢地驗橙又會唔會齋驗橙皮，唔驗橙肉呢？

其實環保荒謬仲有好多，真係罄竹難書。不過又唔好以為我係反對環保，只係我嘅理念同嗰環保塔利班有唔同啫。我覺得最緊要係珍惜資源，唔好浪費。好似手提電話，唔壞我都唔會換。我牛仔褲閒閒地著十幾廿年，穿窿都照著。款式過時？有乜所謂啫。不過咁，如果會令到我好唔方便嘅，就打死都唔制。好似去超市買，我會自備購物袋。但係去街市買餸，就唔會用環保袋。買魚嘅話仲一定要兩個膠袋添，如果唔係魚腥水實滴到周圍都係。唔環保？見仁見智啦！