大殺傷力武器

首先聲明，本文絕無歧視女性或中年女性之意圖，所針對者只限於文中提及之某不知名阿嬸及另一知名阿嬸！

琴日有位網友講開俾人屈激氣，絕對感同身受。其實俾人屈係家常便飯，有時都唔嬲得咁多。但係有一次俾人屈就真係好激氣，雖然事隔多年，到而家諗返起都仲係好嬲，因為係關乎一個男人嘅清白。居然有個阿嬸屈我非禮佢！

話說好多年前（當時廿幾歲），有晚收工後如常咁搭火車返屋企，點知就出事嘞。架火車就快到站，人已經企晒喺門口等落車。雖然嗰晚唔係好多人搭火車，但係近門口嘅位置都幾迫吓，我就同前面嘅人保持住一呎唔夠嘅距離。忽然發覺有人想從後斜斜地咁攝入我前面個位，我望吓，原來係個阿嬸。再睇真，估佢都應該有五十幾年歷史，而且係自從出廠之後都冇保養過嗰隻。見佢著得幾斯文吓，睇嚟係個超齡OL。

想攝我個位？真係發夢冇咁早！我即刻向前移動少少，將個位收窄到得返幾吋，睇佢仲有冇得攝。有人可能會覺得，俾人攝個位有幾蝕底啫。其實呢個唔係有幾蝕底嘅問題，呢個係原則嘅問題。我唔鍾意人著數，亦都唔喜歡俾人佔便宜。呢個係我嘅原則，就係咁簡單！

火車停定，車門打開咗，令人意想唔到嘅事亦都發生。阿嬸居然強攻，得返幾吋嘅位都要硬攝入嚟！莫講話我根本冇意思讓佢，就算有都嚟唔切啦，結果佢個膊頭就撞咗埋我度。其實同呢個阿嬸有身體接觸已經覺得好嘔心，仲諗住返到屋企要即刻用1比99漂白水沖涼。點知一落咗車，阿嬸就當眾大鬧，話我非禮佢！雖然當時佢用嘅唔係「非禮」呢兩個字，佢係用「博懵」，聽起嚟好似冇咁嚴重，其實意思係一樣。結果搞到個個望住晒，好似睇馬騮戲咁，而家諗起都仲覺得瘀到爆。阿嬸一路行一路鬧，來來去去都係「鹹濕仔」、「博懵」、「無恥」呢幾句，冇厘新意。我當然唔會示弱，就用「八婆」、「你貴庚呀」、「你照吓鏡啦」、「我要博懞都個好嘅啦」呢幾句回敬。講真，其實都係新意欠奉，個個男人遇到呢情況都會咁講。不過當時真係好嬲，根本就發揮唔到任何創意。就係咁一路行一路對罵，直到出咗閘，場鬧劇先至結束。真係完全唔明白呢個阿嬸，搞場咁嘅馬騮戲出嚟，佢自己唔覺得尷尬嘅咩？

俾人屈非禮當然嬲，而俾一個雖無過犯面目可憎嘅阿嬸屈就仲嬲。我當年雖然講唔上玉樹臨風，但係起碼五官無缺、四肢齊全，使非禮一個咁樣質素嘅阿嬸？簡直係天大嘅侮辱！仲有，阿嬸鬧我係鹹濕仔，絕對係更大嘅侮辱！嗰時廿幾歲，點都算係一個佬啦。一個男人俾人話係鹹濕佬，真係冇乜所謂，但係鹹濕仔就唔同嘞。鹹濕仔會令人想起嗰未經人道但係又發女人寒嘅宅男，佢地叫X又唔夠膽，淨係喺火車地鐵趁人迫揩吓女人油，就已經興奮到有高潮。俾人叫鹹濕仔，你話嬲唔嬲？！

事後諗返，當時冇堅持要個阿嬸報警真係好失策。如果報咗警，還我清白，就唔使嬲到今日啦。不過都係諗吓啫，佢根本冇可能敢報警。

忽然諗起另外一個阿嬸，佢都係有鋪咁嘅癮，鍾意屈人非禮。不過佢就出名好多，因為夠騎呢，我次次喺電視見到佢都搞到噴晒飯。呢個阿嬸屈人非禮屈出癮，直頭係樂此不疲，其中一個「受害人」仲係同樣以騎呢見稱嘅臘鴨會議員添。真係天下之大，奇人異士多不勝數！

女人絕對唔係弱者，因為佢地有兩件大殺傷力武器，就係佢地嘅身體同把口。只要佢地肯犧牲少少，拋個身出嚟，然後大嗌非禮，男人就隨時會搞到一身蟻，水洗都唔清。諗落都幾恐怖吓，只要喺攻擊範圍內，絕對係防不勝防。呢種大殺傷力武器有冇被濫用就唔知，我自己都只係中過一次招啫。唔好講笑，即刻塊木掂吓先！