老到懵咗？

你老到懵咗？呢句我地成日聽到，我自己就間中都會用嚟鬧吓老而不，好似李XX同陳XX之流。不過鬧人老到懵其實好惡毒吓，因為老人痴呆真係好慘，病情嚴重嘅簡直生不如死！

早幾日提到一個老人痴呆嘅阿婆因為失禁而俾個無良護理員餵食C，真係好得人驚。令人震驚嘅唔止係個護理員咁喪盡天良，更加係因為老人痴呆症嘅可怕。

呢個病會令人記憶力衰退，唔記得自己住喺邊，甚至連親人都唔認得。表達能力亦會受影響，嚴重起嚟仲會語無倫次添。最可怕嘅係會喪失自理能力，會大小便失禁，甚至連著件衫咁簡單嘅都做唔到。

好似上面提及嗰單，阿婆好明顯係冇自理能力同表達能力，結果就任人魚肉。我又會諗，呢個病會唔會影響埋人嘅感官同基本認知能力呢？會唔會根本分辨唔到C嘅味道呢？又抑或會唔會冇咗對臭味抗拒嘅本能呢？我冇做過查證，只係亂咁諗吓啫。

琴日又睇到新聞話因為藥費太貴，高錕校長停藥幾個月，結果導致病情惡化。睇完單新聞真係令人好唔安樂，高錕校長一個咁好嘅人，唉。我又諗，如果以高校長嘅家境都覺得藥費貴，好似我呢草根階層，如果得到呢個病都唔知點算好！

講開又真係好驚吓，我發覺自己近來好冇記性。買唔記得找錢，煮飯唔記得㩒掣，炒餸唔記得落糖，煲湯唔記得落蜜棗，連整我最拿手嘅XO醬都衰咗，居然唔記得落蝦乾。有一次去超市買仲經典，填送貨單嘅時候竟然諗唔起自己個地址！唔得，真係越諗越驚！

聽人講打麻雀可以預防老人痴呆，都唔知真定假。不過我已經連手指都斬埋，行唔通。哈哈，唔知寫多blog又有冇幫助呢？

後記：
上文提及嘅李XX同陳XX係兩條棍，至於係兩條乜棍就不便說明嘞。而相裏面嗰位老人家，只係旅行時影嘅，並唔係話佢有老人痴呆。