2010年9月28日星期二

姿整男

早排睇咗集「星期二檔案」,主題叫做「人工型男」,講幾個「型男」點樣扮靚。睇完之後差想寫信去廣管局投訴,因為個標題有誤導成份。節目裏面講嗰幾條友,根本冇一個稱得上型男,叫做姿整男就差唔多!

其實男人貪靚好正常,有時姿整吓都無可厚非。扮靚亦唔應該有性別界限,男人化妝、做facial、甚至整容都冇問題。不過嗰幾個「型男」就真係好惡頂,連我咁冇所謂嘅人都接受唔到。

最難頂嘅係佢地個個都好女性化,講得難聽就係乸型。不過「乸型」有歧視成份,都係用返「女性化」好。無論係佢地講嘅腔調,抑或係小動作都好女性化,直頭比女人更女人。佢地講嘅時候扭扭擰擰,表情動作多多,真係要幾可愛得幾可愛。其中有一個仲大拋媚眼,勁放生電添。而另一個更犀利,連心態都十足十女人咁。佢話有一次俾人飛咗之後就走去整容,執靚個樣等個舊愛見到會後悔。男人根本唔會咁做,俾人飛咗就肯定係第一時間過件啦。只有女人先會咁執著個舊愛點睇。

另外一樣惡頂嘅係班友過度膨脹嘅自信心。明明執完之後都只係普通料,佢地就覺得自己係天姿國色,可以顛倒眾生。其中一個做模特兒嘅話,有一次做嘅時候化咗個妝好鬼死靚,塊面滑到好似豆腐花咁。結果佢做完就特登唔返屋企,喺條街度四圍蕩,盡情將塊豆腐花面晒俾路人睇。另外一個做市場推廣嘅就話佢嘅上司係女人,佢嘅上司嘅上司又係女人,連佢嘅上司嘅上司嘅上司都係女人。佢個靚樣就令佢得到上司嘅賞識,喺工作上比一個同期入職但係外型冇咁突出嘅男同事有優勢。唔係卦,莫非佢班女上司個個都係les嚟嘅?

最激都算係一個29歲嘅美容顧問,佢由22歲開始不斷整容,成塊面執過晒,絕對係整到阿媽都唔認得。佢唔肯公開易容前嘅相,話怕行出街會引起騷動喎。吓,騷動?有冇咁嚴重呀!

講起整容,其實我都好想整走對超級無敵大眼袋。不過我又唔敢試,一來怕阿媽唔認得,更怕會好似MJ咁,搞到塊面爛晒。真係諗起都嚇親,唔好搞我!

10 則留言:

  1. 唔知其他女bloggers點睇,我就完全接受唔到男人女性化的外表及言行,我冇睇該節目,如果話啲女上司剩係因為個執過的樣子就很睇起了,重用了,真夠低B了!

    你貼圖個男人咪好好睇睇咯,男人該要似番個男人,就算執都應執到男性化啲,好似古天樂照燈一樣,去除了青靚白淨,型好多!Anyway,這只是我個人的觀點。:p

    回覆刪除
  2. 廿幾三十歲人一條皺紋一啲鬚根都冇,又白雪雪,真喺好怪異,好似未發育咁。

    回覆刪除
  3. haha,我專登摷翻條片睇,頭兩三個乸型我真係頂唔順!

    但話時話,我都想整吓個鼻。

    回覆刪除
  4. Coffee n Tea,
    我都係好似你咁諗,覺得唔會有女人鍾意比自己更有女人味嘅男人。如果個男人日日同自己研究化妝護膚,絕對係似姊妹多過似夫妻。呢集真係好有娛樂性,tvb.com仲有得睇,睇完包保笑到你傻。事先聲明,笑爆嘴我唔負責架!

    Eric,
    班友搞到自己男不男女不女咁,真係詭異到無倫。哈哈,忽然諗起葵花寶典同東方不敗添,救命呀!

    laulong,
    橫掂班友都整開容,不如引刀成一快,做個真女人啦!至於校長你,個樣夠殺架喇,唔使整喎!

    回覆刪除
  5. 我懷疑果幾個男人,經過「化學去勢」,閹佐既。有乜理由咁皮光肉滑,兼而娘娘腔,成個電視劇裡的太監咁架!

    回覆刪除
  6. 佛爺:
    哈哈,我都懷疑呢班友可能食埋避孕丸添!至於太監,我諗都冇佢地咁姣屍躉篤!

    回覆刪除
  7. 有一個仲有老婆添!!岳靈珊啊,哈哈哈。

    回覆刪除
  8. Eric,
    哈哈,佢老婆同我心目中小師妹嘅形象爭好遠喎!

    回覆刪除
  9. 食埋避孕丸....

    kaka, 笑死我!

    回覆刪除
  10. laulong,
    有人為咗靚,真係乜都敢死架!好似大隻佬猛食類固醇,完全唔理副作用有幾大!

    回覆刪除