2010年9月27日星期一

攞架嚟丟

四年一度嘅英聯邦運動會又嚟喇!今次輪到印度主辦,喺首都德里舉行。令人估唔到嘅係,個運動會都未開始就已經好戲連場。

首先,印度搞呢個運動會花費咗60億美元,超支十幾倍。咁嚴重嘅超支,唔知算唔算史無前例。如果係嘅話,就保證今屆運動會起碼可以產生一項世界紀錄。

運動員嘅安全問題亦都引起關注。早前就發生咗單槍擊事件,有兩個台灣記者受咗傷,據聞係激進回教組織所為。而且當地又爆發登革熱,令到有運動員以安全理由退出。

雖然個運動會搞得咁豪,但係就出現疑似豆腐渣工程。有個場館嘅天花竟然冧咗,而一條連接主場館嘅行人天橋亦都遭遇同樣命運。好彩係開幕前冧啫,唔係就死得人多喇。

距離開幕只得一個禮拜,但係選手村居然仲未搞掂。就算係起咗貨嗰,據選手講,根本就唔住得人。地方污糟唔在講,房裏面連蛇都有,張床仲離譜到一坐落去就冧咗。但係最估佢唔到嘅都係床單上面竟然有動物嘅腳印。你話有人嘅腳印都唔出奇,有動物嘅腳印就真係耐人尋味嘞。

不過最最最離奇嘅都唔係呢,而係一個印度官員。呢個商業和工業部長喺加拿大駁斥外界對印度嘅批評,話係誇張失實同不可接受。佢嘅理由係世界上冇任何建設係完美嘅。至於嗰運動員退出,佢唔認為同安全問題有關,而係運動員自己冇信心攞牌。佢仲警告貿易伙伴要尊重印度呢個新興經濟大國,如果唔係睇吓邊個蝕底。呢條友都算極品中嘅極品,佢嘅一番偉論絕對係由極度自卑演化成極度自大嘅完美示範。

印度呢個新興超級經濟大國本來想藉呢次英聯邦運動會顯示國力,威一次俾人睇。點知搞到千瘡百孔,變成國際大笑話。人要有自知之明,國家都係一樣。總之面係人地俾,架係自己丟!

咪住,印度貪污風氣盛行,豪花60億搞壇咁嘅,都唔知有幾多係俾人貪咗落袋。唔通呢個先係官員咁積極爭取主辦英聯邦運動會嘅主因?哈哈,呢個只係得啖笑嘅陰謀論,唔當得真架!

5 則留言:

  1. haha, 咁鬼爛嘅國際運動會一定唔會喺中國發生,但有啲香港中國人仍然唔會認為中國叻架,佢地只會話,係印度屎啫!

    回覆刪除
  2. 英女王都唔敢去啦,哈哈哈。

    回覆刪除
  3. laulong,
    有香港人真係反中反到上晒腦,總之中國政府做親嘅都係衰,連地震都係天譴。至於印度,屎就好肯定,相信冇人會反對。

    Eric,
    國家元首最好都係唔好去,萬一舉行開幕禮嘅時候個看台冧咗就大鑊喇!

    回覆刪除
  4. 所以阿前事頭婆咪隊查理斯去囉,反正都冇人鍾意佢。哈哈。

    回覆刪除
  5. Eric,
    哈哈,阿媽竟然推個仔落火坑,陰謀論!講起呢個王子,佢又真係幾騎呢吓。就算帝制仲可以保留,佢都唔會有機會身登大寶!

    回覆刪除