2010年9月25日星期六

兩單新聞

今日想講吓兩單唔算好新,而且大纜都扯唔埋嘅新聞。

第一單發生喺遙遠嘅沙地阿拉伯,係好普通嘅傷人事件。話說有條友同人打交,整到對方癱咗。咁濕碎嘅,本身冇乜好講,值得講嘅係判刑方面。法庭原本已經判咗個兇徒坐監,但係個受害人唔順氣,要求以伊斯蘭法「以眼還眼」嘅原則嚟處罰個兇徒。於是個法官就周圍問醫院,睇吓有冇辦法用外科手術整癱一個人,例如切斷脊柱神經。結果冇醫院敢制,但係單就揚咗,俾人權組織大肆評擊。

伊斯蘭法「以眼還眼」嘅原則好簡單易明,懲罰方式係針對犯人嘅罪行。例如整盲人隻眼,懲罰係挖眼。又例如偷,懲罰係斬手。除咗「以眼還眼」嘅方式,伊斯蘭法仲有好多嚴厲嘅罰則,喺現代人眼中簡直係匪夷所思。好似褻瀆伊斯蘭教同叛教都係死罪,通姦更要死於亂石之下添。唔好以為伊斯蘭社會淨係嚴於男女之防,其實男男之防都係咁,搞機一樣死得。

好明顯,以現代人權標準,伊斯蘭法嘅罰則係過於嚴厲。懲罰方式唔止殘忍,而且仲冇得返轉頭,就算發現錯判都冇得補救。死刑當然係啦,挖眼斬手一樣係。又因為「以眼還眼」實在太簡單直接,亦都間接令到任用私刑嘅情況好普遍。不過呢始終係人地嘅事,而且又好遙遠吓,唯有冷眼旁觀啦。

跟住講單冇咁遙遠嘅,相信好多人都仲會記得。話說有個安老院嘅護理員,因為不滿患老人痴呆嘅阿婆成日失禁,竟然餵阿婆食C。單因為有安老院嘅員工睇唔過眼而揚咗,結果個護理員俾人判咗幾個月監。法官仲話佢無良缺德,必遭天譴添。不過佢家人就覺得判刑太重。

呢個護理員唔止無良,仲非常不負責任。喺得安老院做,都預咗要處理失禁架啦。如果老人家個個都有自理能力,仲使鬼入安老院咩,到時佢聽乞米都得啦。佢對一個唔識自保,而且冇表達能力嘅阿婆下咁嘅毒手,直頭係無恥到無倫。怕惡係人之常情,冇得話啱唔啱。不過欺善就唔同,可以話係引致社會各種不平現象嘅主因,絕對神憎鬼厭。

個護理員家人嫌判刑太重?好簡單啫,不如參考吓伊斯蘭法,實行「以C還C」!

8 則留言:

  1. xiao zhu,
    哈哈,以C還C只不過係隨口噏。但係我相信天理循環,嗰個護理員第日有同樣遭遇都唔出奇。

    回覆刪除
  2. 我愈想愈覺得你的AQ (Ass Quotient)臀部商數,有創意過Dr. Paul Stoltz的AQ (Adversity Quotient)逆境商數。嘻嘻!

    回覆刪除
  3. 佛爺:
    我嘅創意梗係唔止得咁多啦,我仲打算整個「糞商」(SQ)用嚟量度人嘅無良程度,同埋「食C指數」(ESI)用嚟反映社會嘅荒謬程度添。不過具體計算方法仲未有,到我諗到嘅時候就會寫篇介紹吓架喇。

    回覆刪除
  4. haha, 「糞商」(SQ),同埋「食C指數」(ESI), 最啱用黎量度特區政府班廢官,個個有徵,甚至爆標!

    回覆刪除
  5. laulong,
    係呀,仲有班扮民政棍同埋環保塔利班!

    回覆刪除
  6. 食C指數,可改為食「紙」指數,全中文,順一點。

    回覆刪除