2010年9月14日星期二

把幾火

今日睇新聞又俾人激親,真係把幾火!

話說有個住喺公屋嘅綜援阿婆,因為唔順政府02同07年嘅「免收差餉及公屋租金」紓解民困措施冇佢份,走去告政府。原本小額錢債審裁處已經判佢輸咗,但係佢啱啱喺高院上訴得直。如果社署唔提出上訴嘅話,佢就會有二千幾蚊落袋。二千幾蚊梗係濕濕碎啦,最甘嘅係如果社署認輸,政府隨時要攞三億幾出嚟俾有同樣情況嘅公屋綜援戶。

主審法官話雖然綜援戶唔使交租,但係喺免租措施裏面冇受惠。佢又批評社署同房署喺帳目上「左袋入右袋」,根本就幫唔到最窮嘅綜援戶,唔合乎紓解民困嘅目標。對於咁嘅官,除咗叫佢去食,都唔知仲有乜好講。

紓困措施係有針對性嘅,話明係免租措施,梗係舒緩公屋戶喺租金方面嘅壓力啦。綜援戶根本都唔使交租,喺呢方面仲有冇困好紓啫!而且紓困措施又唔係只得免租一款,仲有綜援出雙糧同其他好多花款架,又點可以話幫唔到最窮嘅綜援戶啫!

講起綜援出雙糧又係把幾火!所謂紓困措施都係喺經濟不景嘅時候推出,幫受影響嘅人渡過難關。攞綜援嘅個個月坐喺度就準時有糧出,唔使驚會失業。咁經濟差又對佢地有乜壓力,有乜影響?壓力就冇,但係影響就有喇,不過係好嘅影響啫。因為物價平咗,佢地份糧會好使。咁佢地又憑乜會有雙糧出,就憑夠惡?呢個只係原因之一,最主要係我地有一個軟弱無能嘅政府同一班樂於「為民請命」嘅尊貴議員。

錢冇人會嫌多,個個都想賺到盡。但係攞著數都要出師有名,俾個有邏輯嘅理由先得格。事實係,政府為咗買民意,議員為咗買選票,乜荒謬都做得出。可以預見,隨住政制民主化,類似嘅荒謬仲會陸續有嚟。不過我又唔驚普選,因為我相信「置諸死地而後生」。衰過之後,納稅人自然會識得點揀,到時就撥亂反正。除非到時攞綜援嘅佔咗大多數,咁就真係死得嘞。哈哈,話時話,會唔會真係有咁嘅機會呢?

4 則留言:

  1. 我都係咁話,香港依家畸晒形,一味喺度揾納稅人同中產老襯。多得啲政客、街頭鬥士同廢官咯!

    唔係講笑,我真係想移民架,唔想俾上高啲人玩。

    回覆刪除
  2. laulong,
    其實好多中產係自己攞嚟嘅,居然糾纏喺意識形態咁虛無縹緲嘅度。班扮民政棍就左右逢源,一方面同中產講民主,另一方面就幫草根攞到盡著數。至於移民,我就諗都冇諗過。「物離鄉貴,人離鄉賤」,真係至理名言嚟架!

    回覆刪除
  3. 我唔係好明?公屋綜援戶免唔免租對他們本身有影響嗎?公屋綜援戶的租金等唔係一早由社署包埋嘅咩,使交唔使交,唔係政府部門之間的左手交右手咩?

    唔明!請賜教!:)

    回覆刪除
  4. Coffee n Tea,
    好似賓賓咁,明明已經包食包住,都要爭取納入最低工資保障。冇嘅,著數個個都想要,邊會有人嫌多啫。最緊要係識得判斷呢要求合唔合理。我地當然識,最弊係個白痴法官唔識,真係冇佢收!

    回覆刪除