2010年9月12日星期日

綠色恐怖

唔好諗咗去第度,我係講緊環保啫。

冇幾耐之前,喺美國嘅發現頻道總部發生咗一單槍手挾持人質事件。槍手係一個極度支持環保嘅亞裔男人。佢走去搞事,都係為咗宣揚環保。遽聞佢好不滿發現頻道喺節目裏面叫人生多仔,同環保原則背道而馳。佢講得好過癮,話人類BB仔係寄生蟲,生仔係危害地球嘅行為。佢仲話連昆蟲都係忠嘅,只有人類係奸嘅。

好明顯,呢條友係太過沉迷喺佢嗰套環保理論,搞到自己short咗。其實唔止環保係咁,所有都係,如果過度沉迷同執著,就算原本係好嘅都會變得好恐怖。好似政治、宗教、民主、自由,通通都係。曾特首都講啦,極端民主就會變成文革。問你驚未!

講返單,雖然美國唔係菲律賓,事件最後都係以流血收場。唔同嘅係只有個傻佬流血,佢俾人一槍搞掂咗。不過對於佢嚟講,都可以話係求仁得仁喇。佢成日都想地球少人,起碼而家少咗一個啦。

2 則留言:

  1. 贊成贊成!膠袋徵稅已接近混帳,不作豁免的停車熄匙更是會害死人的政策,邊個係恐怖主義教主,邱騰華個蠢驢咯!

    回覆刪除
  2. laulong,
    政府係無能,不過罪魁禍首都係嗰環保塔利班同埋班代表民意嘅尊貴議員!

    回覆刪除