最緊要好玩

早幾日喺日月報睇到有關政改嘅街頭訪問，有個男人話政府個方案好唔掂。佢話後生仔本來最鍾意玩，而家佢地唔去玩，反而喺度搞抗爭，就證明呢個係爛方案。我唔評論佢對政改方案嘅睇法，只係覺得佢對而家𡃁仔實在太唔了解。

而家𡃁仔做出一對抗行為，唔一定係有針對性，可能只係因為覺得好玩。好似𡃁仔喺課室搞破壞，唔係因為阿sir教得唔好，而係因為佢地覺得咁樣好威，可以得到朋輩認同。

同樣道理，80後搞街頭抗爭，亦好可能只係出於反叛心態，要挑戰權威，覺得咁樣好威。而且搞街頭抗爭，個舞台大得多，快感當然亦大得多。有幾好玩？睇吓佢地嘅抗爭方式就知啦，花款多到無倫。有暴力韓農式，有黑社會晒馬式，有潑婦罵街式，有典地瞓街式，有嘉年華會式，有苦行式，有拜苦路式，有化裝舞會式，仲隨時加插警花警草選舉，絕對可以滿足每一個80後嘅唔同需要。自從世界杯開鑼之後，仲有埋吹烏烏式，絕對緊貼潮流脈搏。計我話，何止好玩過上網打機，直頭係爽過上深圳索K添啦。

歌仔都有得唱：其實開心好簡單，最緊要好玩！