一世穿一次

女人有乜係一世穿一次？如果你嘅答案係處女膜，證明你智力正常。如果你嘅答案係結婚戒指，恭喜晒，你IQ爆棚，有資格成為金牌填詞人。

彭羚首「小玩意」就有以下歌詞：

「一世穿一次，小玩意」

小玩意指結婚戒指。歌詞出自新一代金牌填詞人之手，借小玩意帶出小女人恨嫁心情，創作意念相當唔錯，得到一致好評。

但係，有好嘅創作意念就可以唔使理文字上嘅運用？好似「一世穿一次」呢句，個「穿」字就用得好有問題。戒指可以「戴」，可以「套」，睇情況而定，但係「穿」就好怪，而且會引起一其他聯想。

另外又有咁嘅歌詞：

「還學陳舊文藝戲口吻細聲說：做我內子」

粵語殘片我由細睇到大，就從來未聽過男主角講「做我內子」。「內子」、「內人」、或者「賤內」都係男人對外人提起自己老婆嘅時候用，同老婆或者家人絕對唔會咁講。粵語殘片嘅對白當然唔會犯呢低級錯誤。題外話，女人提起自己老公嘅時候用「外子」，但係點解又唔可以用「外人」或者「賤外」嘅呢？

再睇吓，呢段先搞：

「你用無限濃情蜜意，來造迷人玩意，還在沒名份手指」

我諗「沒名份手指」係指無名指。真係搞笑，手指又可以有乜名分？如果改成「沒名字手指」會好，不過都係唔通架喇。「無名指」已經係嗰隻手指嘅名，唔可以話佢冇名，亦都唔可以亂咁幫佢起個新朵。咁嘅歌詞絕對係標奇立異，嘩眾取寵，一字記之曰：爛！真係難為嗰個才子寫得出。

個個都話而家𡃁仔語文程度低落，將矛頭指向語文科教師。我就覺得佢地有冤枉，唔通嗰所謂才子才女真係一責任都唔使負？近排一個二個偶像派歌星明星除左寫blog之外，仲爭住出書，搶𡃁仔錢。有個二打六美女奀星就出咗本愛情小說，點知裏面別字連篇，俾人笑到面黃。𡃁仔鍾意追潮流，捧偶像，又唔俾心機聽書，自然受偶像嗰套多過阿sir嗰套啦，語文水平唔低落先至奇。