死局

冇睇到曾特首同余大狀嘅世紀大辯論直播，因為唔覺得會有睇頭，亦唔會有實際意義。到今朝先睇電視新聞，一如所料，曾特首輸得好肉酸。民調亦顯示政改方案嘅支持度跌咗。講辯才，曾特首同余大狀爭九十幾條街。佢亦應該知道香港人絕對係鍾意糖衣毒藥多過佢苦口良藥。都明知輸硬，真係唔明佢點解要搞呢壇。本來民主黨都有機會轉軚，而家睇怕凍過水啦。咁搞法，今年又好大機會要原地踏步。而且有可能影響埋2017同2020嘅選舉安排，因為如果政制停滯不前就好明顯唔符合基本法要求嘅循序漸進原則。我就當然冇所謂啦，不過唔知班熱血民主鬥士又會搞乜大龍鳳出嚟啫。到時日日遊行無罪示威有理，就真係煩都俾佢地煩死。

講真，香港有乜本錢同中央玩，都唔知班友點解硬係唔明。扭吓計就可以，真係硬撼就多多都唔夠死啦。呢個係現實，絕對唔係憑決心同意志可以改變到。其實而家只有兩條路，一係接受現實，一係搞革命。我就打死都唔信班友敢搞革命。好簡單，走去問吓李Ｘ人，問吓佢當年點解可以返香港。不過要佢地接受現實一樣係咁難。睇怕香港都係要一直吵吵鬧鬧，直到2047。真係死局一個！