2010年6月24日星期四

鹹魚返生

政改呢壇真係睇到人好煩,日日吵吵鬧鬧,來來去去三幅被,冇厘新意。估唔到呢幾日居然高潮迭起,直頭係鑊鑊新鮮鑊鑊堅,仲好睇過婆媽電視劇。

本來大狀黨黐埋癲狗幫度,已經係同佢地嘅理性中產形像格格不入。仲要衰埋壇變相公投,余大狀當然難辭其咎,變成死魚一條,爭在仲未發臭啫。聽講話大狀黨裏面有人要發起倒魚行動,諗住有好戲睇啦。點知個BT曾好做唔做,幫余大狀搞咗場個人show,自己仲做埋客串嘉賓。場show真係精彩到無倫,余大狀七情上面,以感性出名嘅香港人個個睇到拍爛晒手掌。本來已經由死魚過渡到鹹魚嘅余大狀即刻鹹魚返生,仲封埋做民主女神。更估唔到嘅係中央會突然對白鴿黨嘅區議會改良方案開綠燈,一班建制派又跟風轉軚。今次輪到白鴿黨頭痕,好明顯民意buy晒余大狀嗰套,但係又唔可以唔支持自己提出嘅方案,明知係屎都要踩落去。結果搞到俾激進民主派圍攻,黨裏面更面臨分裂(好似個X家富咁,已經表明退黨),白鴿即刻變成燒乳鴿。唔知係白鴿黨命不該絕定係癲狗幫有心幫忙,班友居然敢鬧華叔,公然挑戰香港人嘅同情心同正義感。一班扮民議員仲即刻同癲狗幫劃清界線,真係世界仔。睇嚟白鴿黨想鹹魚返生,一定要靠華叔撐住。不過華叔有重病在身,呢次真係辛苦晒佢喇。

香港人咁感性又同情心爆棚,唔知第日會選個點樣嘅特首出嚟呢?可以想像,如果聽日即刻選特首,近排搞到周身蟻嘅X雲大師肯定高票當選。論感性,論演技,余大狀絕對拍馬都追唔上。




2 則留言:

  1. hahaha, 阿 Arm, 你啲相裏面嗰啲係死魚噃!

    死魚大狀在我心目中永遠是一條行將發臭的死魚。有啲人我真係唔想多望半眼架,癲狗、長毛、廢業、死余...全部面目可憎!

    回覆刪除
  2. 哈哈,我都錯唔晒架,因為鹹魚亦可以解做屍體。

    有人話麻雀檯係一塊照妖鏡,其實政壇都一樣,係龍係蛇,一目了然。當然啦,有視障嘅人除外。

    回覆刪除