2010年6月17日星期四

看你橫行到幾時

我要普選特首!2012年我都覺得太遲,最好聽日就選!

最理想係選到長毛或者癲狗,退而求其次,大狀黨人都好,再唔係任何一個扮民成員都得,甚至陳巧文或者隨便一個熱血80後我都會收貨。呢班友高舉民主義旗,日日硬銷真普選,真係睇到人好煩。都唔明點解人會話曾特首硬銷佢嘅政改方案。相對於呢班友嘅推銷手法,曾特首嘅所謂硬銷簡直係軟性到無倫啦。如果選到上述人士做特首,絕對係香港嘅福氣!首先,唔使再日日睇佢地做大戲,樂得耳根清靜。而且可以俾熱愛民主嘅香港市民見識吓呢班友嘅治港良方,到下次再選嘅時候就可以成熟啦。到時班友俾人用選票趕落台,體現政黨輪替,香港民主進程就基本上可以追上一眾亞洲民主國家,好似菲律賓,印度,巴基斯坦,泰國等等。

成日聽到人話置諸死地而後生,以前覺得好抽象,而家開始有體會喇。

2 則留言:

  1. 唉,真係置諸死地而後生,我走路 lu, 走去星加坡!

    回覆刪除
  2. 星加坡已經喺多方面超越咗香港,對於安分守己嘅人嚟講,真係相當唔錯嘅選擇.

    回覆刪除