2011年10月30日星期日

凡城

校長話佢有地震緣,去過嘅地方都會成為地震高危區。真係好得人驚呀,竟然有個計時炸彈近在咫尺!為咗全港市民嘅福祉,我強力建議校長移民去日本!唔使質疑我嘅動機嘞,我擺明係有私心,想靠害蘿蔔國啦!

話時話,其實我自己嘅腳頭都唔好得幾多。去過土耳其兩次,返到香港冇耐當地都發生強烈地震。1999年去土耳其中西部玩,途經首都安哥拉。返嚟大約兩個禮拜,安哥拉地區就發生7.4級地震。今年去土耳其東部,7月底仲喺凡城玩緊。事隔唔夠三個月,凡城地區又發生7.2級地震。都算好彩喇,兩次都俾我避過咗!

講開凡城,印象最深嘅唔係嗰度啲景點,而係當地嘅特產凡貓。呢種貓特別之處在於兩隻眼唔同色,一隻藍色,一隻黃色。不過又唔係所有凡貓都有鴛鴦眼,有時一竇貓仔裏面都未必有一隻。嚴格上嚟講,鴛鴦眼係屬於一種遺傳缺陷。不過物以罕為貴,就係有缺陷先值錢。專做遊客生意嘅商店都會養番一兩隻凡貓看門口,吸引啲人入去睇吓,咁當然係鴛鴦眼嘅先有吸引力啦。

話時話,我就覺得嗰啲做生招牌嘅凡貓好慘囉。成日俾一大班人圍住,當怪獸咁睇,真係唔嚇死都煩死。有啲唔生性嘅遊客仲用閃光燈影相,隨時凡貓都會變成盲貓。都唔明點解啲人硬係有鋪閃光癮,喺暗少少嘅環境就一定要閃。其實一般相機嘅內置閃燈只係可以用嚟補吓光,如果作為主要光源根本就唔係好掂,不如校高啲ISO好過啦。

睇番啲凡貓相,真係令人有啲懸念,唔知佢地而家點呢?天災無情,我自己都算執番身彩喇,希望喺凡城接觸過嘅人同凡貓都冇事啦!





8 則留言:

  1. 我以前喺溫哥華都試過兩次小地震,都有啲轟轟聲㗎。不過兩次都冇乜點理,電視照繼續睇。。

    回覆刪除
  2. eric,
    早排唔知邊度地震,香港都有人感覺到震動,不過我就一啲都唔覺。

    回覆刪除
  3. 我以為你講我們網友校長,哈哈!
    你直情腳頭好啦,要震都等你走咗先震!
    貓眼靚,靚色貓眼更靚!

    回覆刪除
  4. 嗨,啲相好靚!

    貓好敏感,除非俾人関在籠裏,否則該晨早就了咗出屋架喇,該可以倖存。

    汶川同日本雲仙,尤其前者,時常記住!

    回覆刪除
  5. Coffee,
    哈哈,當然係講緊laulong校長啦!其實有地震緣都冇乜所謂,最緊要係唔好撞到正啫!

    laulong,
    哈哈,唔好意思呀,攞咗你嚟開玩笑添!人地話小動物有預知災難嘅第六感,而且啲貓又動作敏捷,如果唔喺籠裏面,都應該冇事嘅。

    回覆刪除
  6. 咁既貓,係寵物店肯定好值錢。

    回覆刪除
  7. 佛爺:
    哈哈,唔只值錢,仲好嘥錢添!聽講話凡貓係破壞王,最鍾意就係拆屋!

    Ebenezer,
    正如所有不平凡嘅人都係凡人!

    回覆刪除