2011年10月3日星期一

半世瓜

苦瓜又叫涼瓜,相信冇人會唔知。不過苦瓜原來仲有一個好奇怪嘅別號,叫做半世瓜,可能就唔係個個都知嘞。

叫做半世瓜,係因為人到中年先會開始鍾意食苦瓜。事實上,我又真係未見過有細路喜歡食呢樣嘢。人生難免有高低起落,經歷得多,自然唔會將一時嘅逆境當成世界末日,甚至會覺得苦日子值得回味,因為咁至更能體會苦盡甘來嘅可貴。所謂少年不識愁滋味,啲細路當然唔會懂得欣賞乜嘢叫做苦後回甘。

其實我都唔算好鍾意食苦瓜,只可以話係唔抗拒。不過近排就食多咗,因為據聞苦瓜有降血壓同降膽固醇嘅功效。今年驗身竟然發現血壓偏高,而膽固醇就更唔使講,多年嚟都徘徊喺爆燈邊緣,食多啲苦瓜應該會有幫助。

苦瓜味道青澀,唔適宜清炒,用豆豉調味就最夾。配料方面,我會揀濃味嘅肉類或海鮮,整得最多嘅係豉汁涼瓜炒牛肉。另外又會用嚟炆燒鴨,但係就唔使落豆豉。啲苦瓜索咗香濃嘅燒鴨汁,送飯絕對一流。不過燒鴨勁多飽和脂肪,就算配埋苦瓜都唔會係健康嘅菜式。至於海鮮,可以配魷魚、墨魚、帶子、或者蜆,總之可以用豉椒炒嘅海產都得。我就最鍾意豉汁涼瓜炒蟹,蟹嘅鮮味滲晒入苦瓜裏面,真係好正架。不過要注意一點,苦瓜同蟹都係極度寒涼之物,寒底嘅人就唔好試嘞。話時話,其實我都唔係好知自己係寒底定燥底添。

人地話苦瓜炒之前要先飛水,咁可以去除苦味,不過我就從來都係生炒。一來係因為懶,費事搞咁多嘢。而且苦瓜冇晒苦味,仲算唔算係苦瓜呢?如果真係咁怕苦,不如食絲瓜、節瓜、翠玉瓜算啦。但係有一種整法我一定唔會試,就係搾汁飲,真係諗吓都會打冷震!



7 則留言:

  1. 苦瓜d味道....我仲未接受到。

    回覆刪除
  2. Ebenezer,
    哈哈,咁就證明你仲好後生囉!

    回覆刪除
  3. 苦瓜乾沖茶,降膽固醇最好,而且竟然有茶味!

    回覆刪除
  4. 咩事呀!講咗咁耐終於唔抵得我嘅苦瓜汁喇,其實苦瓜配蘋果或木瓜榨汁,OK好飲架,我曾飲過好多,後來胃頂唔順才冇再飲了。

    你呀,唔使講都係燥底啦!苦瓜炒蟹寒性超強,你竟然甘之如飴,如果寒底人(如我),早受不了,我哋寒底人食蟹時都一定要食姜。

    回覆刪除
  5. laulong,
    等我試吓先,或者加糖加奶都得喎!

    Coffee,
    哈哈,講真我都唔知自己係咪燥底架!其實只要飲食均衡,特別啲嘅嘢間中食吓應該唔會有問題嘅!

    回覆刪除
  6. 乜苦瓜咁勁,唔知喎!但我在童年已經很喜歡吃了。

    回覆刪除
  7. 佛爺:
    哈哈,你好早熟喎!

    回覆刪除