2011年10月28日星期五

肥胖是福?

如果我話「肥胖是福」,相信一定會俾人當黐線。以現代人嘅觀念,肥胖絕對唔係福氣,因為會同一啲惡疾扯上關係,例如心血管疾病同糖尿病。不過中大嘅一項研究就有驚人發現,原來對於長者嚟講,越肥竟然會越長命!

嗰個研究以四千名六十五歲以上嘅長者為對象,男女各佔一半,統計佢地喺2001至2008年嘅死亡率。結果發現,越肥嘅男性長者,死亡率越低。而死亡率最低嘅組別,平均腰圍有成三十八吋。至於女性長者,肥瘦就同死亡率冇明顯關係。

越肥反而越長命,肯定同一般人嘅理解有好大出入。據研究人員推測,脂肪有助增強抵抗力,亦可以睇成係身體嘅儲備,幫到長者捱過大病。有關人員仲建議六十五歲以上長者食多啲高營養嘅嘢增肥,例如蛋、奶、雪糕等。至於點解女性長者又唔係咁,就仍然係個不解之謎。

呢個研究完全顛覆咗我對健康生活嘅理解,搞到而家有啲不知所措添。自從幾年前發覺自己多咗條士啤胎,我已經搣甩咗掃街嘅惡習,同最鍾意食嘅炸大腸、牛雜、八爪魚鬚等等講拜拜。連即食麵都係揀非油炸嗰啲,至愛嘅滿漢大餐牛肉大碗麵就掂都唔敢掂。晏晝嗰餐就淨係食粟米同生果,簡直健康到無倫。雖然一直都去唔番我目標嘅廿八吋腰,不過條士啤胎亦冇繼續發大。點知原來三十八吋腰先係最健康,咁點算呢,係咪唔使再忍口呢?

不過咁,三十八吋腰真係諗起都得人驚,第二啲唔講,淨係著褲已經夠煩。通常啲肥佬著褲只係得兩個情況,一係褲頭跌到落私處,行兩步都驚會甩。一係就要將褲頭掹到上心口,核突到冇人有。而且有個三十八吋肚腩都好大鑊啫,仲辛苦過女人陀仔,就算有得執都執輸過人啦。所以呢個最健康嘅體型,都係咪搞我嘞。

其實對於我呢啲準長者嚟講,呢個問題可以唔使考慮住,過到六十五歲先諗都未遲。是福不是禍,是禍躲不過,就當唔知有個咁嘅研究,費事煩!

8 則留言:

  1. 你快d増肥啦,唔係好易死架^^

    回覆刪除
  2. Ebenezer,
    哈哈,我未夠65歲,唔增得肥住架!

    回覆刪除
  3. 睇完不過我都不是好信,所以你都係睇定啲先喇!

    回覆刪除
  4. 晚年保有多一些肌肉,長多一點脂肪是無妨的,但決不能過多,尢其要少吃肉,肥同血管裏有過多膽固醇是兩回事。

    回覆刪除
  5. 類似研究喺外國我都睇過,結論喺如果老年人太瘦喺仲衰過太肥。因為正如你所引述,有多少儲備會幫到長者捱過大病,尤其喺長期臥床或進食有困難嘅人。仲有嘅喺有好多癌症病人喺因為太瘦(cachexia)而死嘅。
    正如劉兄所講,晚年有多少肌肉就最好啦。

    回覆刪除
  6. 咁要睇下豬長命,還是馬騮長命囉!嘻嘻!

    回覆刪除
  7. 若人人鍾意食馬騮腦,咪馬騮短命咯!

    回覆刪除
  8. Coffee,
    信唔信都係咁話架嘞,我點都唔會接受到自己有38吋腰囉!

    laulong,
    哈哈,我都想喺晚年有一身肌肉,不過脂肪就咪搞嘞!仲有,猴腦千祈咪食呀,好高膽固醇架!

    eric,
    哈哈,我都唔想太肥或者太瘦,淨係想喺65歲時可以有38吋胸同28吋腰啫!

    佛爺:
    梗係馬騮長命啲啦,因為好多人鍾意食乳豬架!

    回覆刪除