2011年10月24日星期一

阿美阿美

阿美阿美幾時辦嫁妝,我急得快發狂;
今天今天妳要老實講,我是否有希望。
雖然我是個窮光蛋,人又長得不怎麼樣;
但是妳要想一想,看看自己的長相。
阿美阿美不要再徬徨,少女的青春短;
今天今天妳不要倔強,快做我的新娘。
雖然我沒有汽車洋房,吃得粗茶又淡飯;
只要妳陪我作伴,包妳白白又胖胖。

唔知仲有冇人記得「阿美阿美」呢首歌呢?如果你有印象以前聽過,絕對唔係一件好事,因為咁就證明你已經一大把年紀!

早幾日無啦啦摷番隻台灣校園民歌CD出嚟聽,又重溫咗呢首歌,彷彿返到去幾十年前。隻歌其實唔算好好聽,但係就幾輕鬆得意,應該算係一個男人嘅求婚宣言。不過如果有男人真係咁樣求婚,條友實注定一世要做寡佬,因為佢對女人完全唔了解。

首先,爆晒自己嘅缺點出嚟,已經係策略上嘅重大失誤。咁都算嘞,最大鑊係居然誠實到連對方嘅短處都講埋,叫人地「看看自己的長相」。大家都知啦,批評女人個樣絕對係大忌。唔會有女人覺得自己唔靚,就算有唔滿意,都只係因為仲未夠完美啫。而且,講到對方再唔嫁就實聽攝灶罅,呢種恐嚇式口吻,莫講話女人,就算男人都唔會接受啦。最後話「包妳白白又胖胖」,又係犯咗死罪。「白白」當然冇問題,不過提到「胖胖」就死得人啦。當然,啲歌詞只係為咗搞笑,相信現實中絕對唔會有人咁樣求婚。但係呢個世界乜人都有,我就遇過類似嘅嘢,不過唔係求婚,而係箍煲。

話說九十幾年前,有次同人喺屋企小聚,佢竟然要求我配多條鎖匙俾佢。只係識咗兩三個禮拜就想入宮,佢都算進取喇,其實嗰陣同佢都未算正式拍拖。當然啦,呢個只係我自己嘅睇法,或者佢覺得已經係老夫老妻都唔定。我亦冇求證過佢點諗,因為第一時間已經決定要飛佢。呢種人肯定好黐身,唔飛佢第日實有排受。所謂合則來,不合則去,只係兩三個禮貨仔啫,對於雙方都應該唔會係乜嘢重大打擊。點知佢反應大到超乎想像,竟然晒地,捉住我對腳唔肯放。咁大個人仲玩地,再拖落去都唔知會搞埋啲乜嘢大龍鳳出嚟。呢種人絕對招惹唔過,真係唔飛佢都冇天理啦。我都知佢冇咁易放棄架喇,但係點都估唔到佢會發表一番令人啼笑皆非嘅箍煲宣言。佢竟然狂數我七宗罪,話我有咁多缺點佢都唔介意,問我有乜理由飛佢喎。至於嗰七宗罪係乜,咁私人嘅嘢,梗係唔方便講啦。

真係唔講都唔知,原來我一直咁委屈咗佢。呢番箍煲宣言更加堅定咗我要叮佢走嘅決心,因為只有放手,佢先有機會揾過個完美嘅男人,我咁做都係為佢好咋!都唔明點解啲人會咁自我中心,明明想箍煲,都要講成係偉大嘅自我犧牲,想唔俾人掃出街都幾難啦!


12 則留言:

  1. Ebenezer,
    哈哈,如果淨係俾人飛,咁咪好蝕底!

    回覆刪除
  2. hahaha, 衰得你呀!係入咗你寢宮三個禮拜?都唔短喇!陰功,你搞到人要生要死!

    不過你心硬係好嘅,我心軟,所以咪死得好慘咯,唉~~~

    回覆刪除
  3. laulong,
    哈哈,間中小聚吓啫,我唔當咁係入宮架!呢件係地啫,都未算要生要死。不過咁,搞到要生要死嘅都試過,嗰件就耐啲,有半年。

    回覆刪除
  4. haha, 真係女人殺手!

    唔知女 blogger 會唔會搭咀呢 XDDD

    回覆刪除
  5. 你呢d題目好惹火架,小心!小心!

    回覆刪除
  6. laulong,
    哈哈,殺手我就一定唔敢認!有時我飛人,有時人飛我,大家有來有往,好公平啫!至於入得嚟嘅女網友,都好通情達理嘅,相信唔會俾人鬧到狗血淋頭啩!

    Ebenezer,
    哈哈,都係買定個保險,等我自插咗先:我係賤男!咁就冇人會再鬧啦!

    回覆刪除
  7. 三個禮拜好似氳左d,不過你正確~~~

    回覆刪除
  8. 三個禮拜好似短左d,不過你正確~~~

    回覆刪除
  9. Arm:

    識得三個禮拜,問你取鑰匙,都好正常喎!我有一個表姊,識得一日就同個男生同居,三日就去排期結婚。

    聽講美國內華達州,上午結婚,可以下午離婚,好方便架!嘻嘻!

    回覆刪除
  10. 乜佢咁呀~攪你唔掂就數你!?

    你個case,令我想到之前有單新聞,有個女人比飛後,跟住個女人唔死心,自己買個單位係男方同一座住,而且不斷騷擾男方兩年,最後要攪到上庭

    回覆刪除
  11. 熱血:
    哈哈,梗係正確啦,因為之前衰過,其實係從錯誤中學習!

    佛爺:
    結婚就真係唔可以兒戲嘞,因為唔止係承諾,仲有法律約束力添。最近就有單富豪離婚官司,為咗分身家搞到對簿公堂,你話幾無謂呢!

    minor,
    嗰單嘢我都有留意,我就覺得個女人可能精神有啲問題嘞。與其嘥咁多時間搞個男人,不如將啲精力用嚟幫自己扮靚,溝過第二條仔好過啦!

    回覆刪除