2011年10月19日星期三

神馬都是浮雲

如果話曾凸首一無是處,相信好多人會贊同。但係大家有冇諗過,其實佢都有一個優點。佢起碼言行一致,都算係一個端人,好過嗰啲口蜜腹劍、口是心非嘅扮民政棍多多聲。佢話自己視民望如浮雲,做出嚟嘅嘢又真係貫徹晒呢個宗旨架。

早兩日喺一個公開場合,凸首提到深層次矛盾,就話係永遠解決唔到嘅問題,仲舉咗人口老化同貧富懸殊做例子。佢咁講嘢,民望想唔低都幾難啦。

就算佢講嘅係事實,市民都肯定唔會接受。乜都話解決唔到,咁使鬼佢做凸首咩,我做都得啦,橫掂我都唔識點解決嗰啲問題。事實上,相信好多人都會咁諗,搞唔掂就請佢退位讓賢,揾個搞得掂嘅人坐佢個位。

凸首嘅問題已經唔係喺說話技巧方面,而係佢根本就缺乏政治智慧,枉佢仲話自己係政治家。最經典莫過於之前喺一個電台節目,竟然將極端民主同文革相提並論。結果當然係俾班扮民政棍瘋狂抽插,扑到佢體無完膚啦。咁都冇所謂嘞,最多瘀吓啫,其實佢講乜嘢,班友都一樣會照插架啦。

話佢冇政治智慧,係因為佢唔知文革唔講得。阿爺根本就唔想人提起文革,之所以將文革定性為動亂,就係要一槌定音,等啲人唔好再糾纏不休。我當然唔知事後有冇人打佢小報告,不過連咁基本嘅嘢都唔識,都唔知佢點做凸首!

有個視民望如浮雲嘅凸首,又有班視港人福祉如浮雲嘅政棍,你話香港會點呢?當然係「神馬都是浮雲」啦!

話時話,對於上面提到嘅深層次問題,我又真係有解決辦法喎。只要大幅削減公營醫療資源,啲人就唔會咁長命,人口老化問題自然會迎刃而解。要解決貧富懸殊問題亦好簡單,即刻炒晒班問責局長,揾而家喺中環露緊營嗰班廢青頂上,嚇走晒啲有錢佬,咁堅尼係數想唔跌到接近零都唔得啦!


4 則留言:

  1. 即係咁,發動第一次世界大戰的德國皇帝威廉二世,戰敗之後走佐佬。跟著成立的威瑪共和國,係無能既!谷到德國人去支持希特勒!在第二次世界大戰未曾爆發前,希特勒真係打救佐德國人架喎!

    香港人選隻癲狗、長毛、或者麻雀館睇場的屠君狠出黎做凸首,可能未來五年都會係欣欣向榮架喎!

    回覆刪除
  2. haha, Arma, 你真係好鬼絕呀,唔想貧富懸殊,趕走晒投資者,黎個均貧就真係唔再貧富懸殊咯!

    凸首,特醜也....

    扮民,販民也....

    haha !

    回覆刪除
  3. 政治係好陰險的,他不能口蜜腹劍、口是心非,所以他不是政治家。

    回覆刪除
  4. 佛爺:
    好可惜,香港唔會有咁嘅福份!癲狗長毛班友只係樂於做佢地嘅永遠反對派,因為咁至合乎佢地嘅最大利益。要佢地做凸首,真係打死都唔制啦!

    laulong,
    哈哈,更絕嘅都有呀,仲係一次過解決晒所有問題添。只要凸首即刻宣布香港獨立,中央就會派解放軍屠城,總之就走嘅走殺嘅殺,香港就會由七百萬人口變番做七十萬,班80後又機會試吓前人經歷過嘅經濟起飛,仲點到佢地唔滿意?!

    Coffee,
    人地話忠忠直直終須乞食,凸首已經算唔錯架喇,可能係佢祈得禱多啦!

    回覆刪除