2011年10月16日星期日

雙重雙重標準

聲明:本人絕對無意批評任何宗教,所針對者只某神人而已!

我當然唔係老到懵咗,連重複打咗「雙重」兩次都唔知。其實係早兩晚睇電視新聞,有啲人竟然重複示範乜嘢叫做雙重標準!

凸首第一次喺新垃圾會大樓開會,就俾癲狗破口大罵,咬住唔肯放。又真係估佢唔到,凸首竟然高姿態還擊,發展成對罵局面。跟住長毛又加入戰團,結果同癲狗一齊俾主席憎肉成逐出議事廳。後來有扮民議員不滿凸首冒犯議員同主席處事不公,集體拉隊離場抗議。

單嘢真係令人失笑,凸首同癲狗簡直就係潑婦式對罵,絕對有失兩人嘅身分。尤其是凸首,明知自己口齒唔伶俐,鬧人都鬧到口窒窒,就獻醜不如藏拙啦。如果真係想還拖,唔該佢一早諗定想鬧乜嘢,喺屋企背熟啲台詞先。至於癲狗長毛,齋鬧梗係滿足唔到佢地嘅獸性啦。長毛喺俾人拖出議事廳之前,就把握住最後機會掟咗隻雞蛋上台。被趕離場之後,兩條友又合演一場馬騮戲,除咗憎肉成張相落嚟,再向張相掟番茄。最搞笑嘅係佢地掟番茄竟然就住就住,一啲激情都冇,驚死掟大力啲會整爛張相。其實整污糟會議廳幅牆同憎主席張相,係咪已經算刑事毀壞呢,我就冇研究過嘞。

以上提到嘅只係凸首同某啲議員當眾出醜,其實冇乜大不了。不過扮民議員嘅反應就唔同嘞,完全暴露晒佢地嘅醜惡本質。多位扮民議員事後指摘凸首,批評佢侮辱議員。梁渣傑話就算議員講嘅嘢唔合官員心意,亦應該受到尊重。而李乜人就話憎肉成擦凸首鞋,令到議員俾人踩到上心口。呢啲分明係雙重標準啦,癲狗媽叉凸首就係講嘢唔合佢心意,凸首回敬番就係侮辱議員。如果話議員俾人踩到上心口,咁凸首簡直係俾人喺頭頂疴咗篤屎添啦!仲有嗰件逃緊生,佢都有份批評凸首。之前一哥俾癲狗用件衫兜頭掟,事後揾逃議員投訴,佢就扮晒盲人,話乜都睇唔到。上次就發晒雞盲,今次又突然變番耳聰目明,睇嚟條友連生理上都有雙重標準!

真係唔明投票選呢啲扮民議員出嚟嘅選民係乜嘢心態。癲狗長毛大舊鑊鑊都搞事,俾人趕出議事廳,都唔知佢地有幾多次可以正正經經開完個會。而其他扮民議員又成日玩集體離場抗議,垃圾會嘅議事效率想唔低都幾難啦。唔通呢啲就係選民想見到嘅嘢?如果真係咁,啲選民究竟係熱愛民主,定係想搞無政府主義呢?

差啲講漏咗添,癲狗鬧凸首其中一句係「公然與全香港市民為敵」。我根本從來都冇投過票俾癲狗,未得我授權就公然代表埋我,呢條友都算無恥喇!

嗰晚仲有另一單新聞,擾攘多年嘅校本條例司法覆核終於有定案,天主教教區終審敗訴。

講到校本條例,其實我嘅態度好中立吓。究竟學校管理係咪要增加民主成分同透明度,我真係冇乜意見。不過對於單司法覆核官司,我就好睇唔過眼嘞。

單官司係某神人堅持要打嘅,理由係校本條例會削弱辦學團體(教會)嘅辦學理念同自主權。如果呢個理由係由第二啲人講出口,我都唔會有乜嘢反應。不過由神人提出,我就真係好唔順氣。

根據校本條例,由教師、家長、校友出任嘅校董只會佔四成,影響力其實好有限。極其量只可以俾啲意見,對於一啲重大決策,根本就冇能力否決。所謂民主成分,恐怕係裝飾性多於實用性。

大家都知,神人瞓晒身為港人爭取民主,甚至不惜發動教徒上街遊行,都可謂不遺餘力。但係點解喺自己嘅地頭,佢會連少少裝飾性嘅民主都容納唔到呢?神人堅信香港人有足夠智慧普選特首同垃圾會,點解又會咁信唔過嗰啲有機會成為校董嘅教師、家長、同校友呢?佢明明反對功能組別呢啲小圈子選舉,點解喺自己嘅學校又奉行絕對委任制呢?以上問題有兩個可能答案。一係神人當咗自己係神,咁佢做嘅一切當然冇人可以質疑啦。一係佢持雙重標準,只許州官放火,不許百姓點燈。

我自己就傾向相信後者,而且會從陰謀論嘅角度諗,會唔會係佢轄下嘅學校有啲黑箱作業唔想俾外人知呢?本來教會嘅嘢,黑唔黑箱都與人無關,不過學校嘅運作係由公帑資助,提高少少透明度都好應該啫。事實上,教會學校又真係有啲嘢好特別。聽聞有虔誠教徒,大學畢業就喺某教會學校任教,兩年已經升咗主任,五年仲做埋校長添。睇怕只有教會學校先會出到呢啲神童。不過呢,如果係非教徒,就算教足一世都未必可以做到校長。講真,教會學校有又好似未試過有非教徒出任校長喎。話時話,唔知有冇宗教歧視呢樣嘢嘅呢,得閒問吓平機會先。當然啦,非教徒無啦啦入教會學校教書,升唔到職都係自己攞嚟嘅!

講番單官司,神人話過輸咗就可能會放棄辦學權,唔知佢嘅繼任人會唔會尊重佢呢個意願呢?

6 則留言:

  1. 嗰兩條爛鬼根本就想俾人趕,只不過長毛就意料之外地早咗,佢都show time 都未到,所以拿拿林扔咗個雞蛋,都叫做冇嘥。趕咗出去咯,咪可以歎吓茶,度吓波馬,或者打電話同個温心老契調吓情,哈,有公帑支持去 hea, 真係幾過癮!

    至於那個白痴神人,社會就要民主,好讓班販民可以奪權;佢教會囉喎,梗係要繼續專權喇,睇佢祈禱時好似上身咁,就知佢有徹徹底底嘅精神病!

    回覆刪除
  2. 垃圾會單嘢,簡單一句:羣魔亂舞!

    三隻狗只要鍾意就可以隨便掟人,隨便弄汚地方,冇人敢郁佢;反觀見過d細路四處恐嚇人,無聊掟嘢,一樣弄汚地方,就俾人拉咗入男童院。香港政府,係唔係對一般古惑仔就絶不手軟,對垃圾會嘅黑社會就諸多包庇先?!

    回覆刪除
  3. 後來我都上網睇返當日條片,特首如果一早預定要還擊,唔該做定功課、背好台詞,所謂兵來將擋,土來水淹嘛!唔使口窒窒到咁難睇吖。

    回覆刪除
  4. 天主教會追求民主?係民主道路才削去教會的暴政呀!有興趣可以睇下本人的拙作 《同性戀與基督教》

    唔知一D香港戇居友,諗佐D乜野?

    回覆刪除
  5. 近年我愈來愈唔知點投票好,啲議員做啲野都唔 constructive,而投比癲狗派果啲人,第一次我以為佢哋想睇吓有啲“衝擊”之下,個議會會有啲新想法,但明顯地係 destructive 居多,真係唔明點解啲人又繼續投!

    另,教會嘅野,我小學時讀天主教學校,雖然而家又比M唸天主教學校,但我一直接受唔到佢哋果套,冇成為教徒。但講真,比起基X教,天主教已經算係咁,至少我身邊識嘅天主教徒全部係講道理嘅人,但大部份基X教徒好偏激,完全包容唔到不同想法和聲音!

    另,到訪過你的網上相薄,靚到冇朋友!有啲相冇註明 Armadillo.版權所有,唔識分這些是否你的。

    回覆刪除
  6. laulong,
    班友當然係致力爭取俾人趕出議事廳啦,如果唔係點會鑊鑊都帶埋咁多道具(例如雞蛋,番茄等)去開會啫!遲啲玩到冇嘢好玩,話唔定會出埋掟屎淋尿添!唔出奇架,要搞到垃圾會臭氣熏天,根本就係佢地嘅唯一政綱!至於嗰位神人,因為有宗教作為後盾,本來我都唔想講佢架。不過校本條例單嘢,佢實在做得太肉酸喇,想唔窒佢兩句都唔得!

    Ebenezer,
    垃圾議員同屋邨童黨做埋同一樣嘢,但係就受到截然不同嘅對待,咁當然係雙重標準啦!講真,其實政府都好想郁嗰班議會垃圾,只不過有心無力啫,鬼叫我地有咁多雙重標準嘅扮民議員同選民咩!

    Coffee,
    睇嚟凸首真係冇乜自知之明,成日用自己嘅弱項挑戰人地嘅強項。就好似上次電視辯論咁,居然揀個牙尖嘴利、捩橫折曲嘅狀棍做對手,直頭買棺材唔知訂!

    佛爺:
    當宗教同政治扯上關係,非教徒自然可以睇得清楚啲,因為旁觀者清!神人咁高調介入香港嘅政治議題,根本就係玩緊火!

    SKII,
    呢啲根本就係冷戰思維,即係「敵人嘅敵人就係朋友」!好多人投票俾癲狗長毛,其實只係發洩對政府嘅不滿,想班高官冇好日子過啫!教會啲黑暗嘢,我都聽過唔少,不過事不關己,我都好少理。身邊亦有啲信教嘅朋友(其實我都唔知佢地係信天主教定基督教),但係就好少傾到宗教問題,佢地都好識做!至於啲相,首先多謝你嘅欣賞!除咗有我自己出現嗰啲,其他當然係我親手影架啦!

    回覆刪除