2011年10月11日星期二

抹黑

有咁耐風流就有咁耐折墮,平時高高在上嘅一班民鼠法律精英,終於都有機會試吓做過街老鼠嘅滋味嘞!

話說琴日有人搞咗個名為「聲討狀棍黨,還港人65億,反對外傭擁有居港權」嘅大遊行,據聞有超過二千人參加。而且唔同地區仲出現咗一啲參照狀棍黨宣傳品一貫式樣製作嘅橫額,內容包括「熱烈慶賀 狀棍黨資深大律師李志喜 成功爭取外傭永久居港權」同「透過司法覆核 成功阻大橋 阻沙中 令700萬港人受惠」。

對於被惡搞,一向牙尖嘴利、鬧人唔使本、有佢講冇你講嘅狀棍黨黨灰梁渣傑就開腔回應,表示「針對公民黨的抹黑行動已明顯升級,假冒橫額以圖擾亂視聽,手法鬼祟,企圖分化社會及妄顧選舉條例,以不正當手法意圖影響區議會選舉選情」,仲話已經報咗警添。佢又重申:「外傭擁有申請權並不代表他們自然獲得居港權,如果硬將『獲得申請權』變作『擁有居港權』,根本就是誤導市民,意圖分化社會,煽動群眾情緒。」

真係「聽棍一夕話,勝讀十年書」,簡直令我茅塞頓開,即刻對千百年來好多歷史人物有咗革命性嘅全新理解。原來吳三桂一直都被誤解咗,話佢係漢奸賣國賊,其實只係一小撮人針對佢嘅抹黑行為。

冇錯,吳三桂係放咗清兵入關,不過咁並唔係導致明朝覆亡嘅原因。吳三桂只係開咗道門,而清兵識行識走,入唔入關完全係佢地自己嘅決定,絕對唔關第三者事。就算清兵入咗關,亦唔表示佢地可以輕易霸佔漢人嘅花花江山,唔通明朝軍隊唔識抵抗外敵?講到尾,明朝覆亡完全係因為啲軍隊冇用啫。吳三桂一直背負住漢奸嘅惡名,都算係千古奇冤喇!

不過咁,將梁黨灰同呢位權傾天下嘅野心家相提並論,又未免太抬舉咗佢。人地話歷史會不斷重複,要揾另外一個歷史人物同佢比較,其實一啲都唔難,我就即刻諗起黃婆嘞。

黃婆雖然係同西門慶搭咗條瓦坑路,不過潘金蓮紅杏出牆、武大郎死於非命都完全唔怪得佢。西門慶會唔會上潘金蓮,只係取決於小西門慶嘅態度,黃婆根本控制唔到。而潘金蓮勾佬,都係因為武大郎冇實個老婆。至於武大郎慘死,雖然值得可憐,不過鬼叫佢唔夠西門慶打咩,要怨就怨自己太無能囉。講到尾,最無辜都係黃婆,無啦啦俾武松打死,好彩今日終於沉冤得雪喇!

話時話,近排喺電視見親梁黨灰,都覺得佢好八婆嘴臉。攞佢同黃婆呢個淫媒比較,相信唔會有人反對喇啩!

11 則留言:

  1. 恕我直言,你忍心攞自己張小天使嚟較飛,就真係抹黑了咯!

    回覆刪除
  2. Coffee,
    哈哈,冇所謂啦,到下次有適合嘅題材,將整容前嗰張相放番出嚟咪得囉!

    回覆刪除
  3. 你用吳三桂放清兵入關黎形容訟棍黨搞外傭居港權係好貼切嘅!

    訟棍黨哩啲賣港行為,仲衰過吳三桂!今次睇佢地氣急敗壞,我心都涼咯!

    回覆刪除
  4. laulong,
    哈哈,古有漢奸,今有港賊,此之謂超時空瑜亮配,激死人冇命賠!

    回覆刪除
  5. 我都認為以吳三桂形容狀棍好貼切。狀棍最大問題是自大,以為係人都以為狀棍係神,講乜,係人都會信。

    回覆刪除
  6. 佛爺:
    你又咪話喎,香港人真係好迷信架!只要係一啲所謂核心價值(例如民主、公義、人權、法制等等),啲乜棍物棍敢講出口就有人信架喇,仲當班友神咁拜添!

    回覆刪除
  7. 我以前覺得呢個黨 okay的,但最近呢兩單,真係...

    回覆刪除
  8. 用吳三桂做比喻﹐可以話貼切又可以話唔貼切

    吳三桂放清兵入關前﹐明朝已經覆亡﹐至少李自成已入京﹐帝女花場大龍鳳都去到香夭﹐崇禎已經自殺。

    如果用來比喻香港情況﹐公文袋係吳三桂的話﹐李自成咪係垃圾會入面班咆哮三人組﹖

    回覆刪除
  9. SKII,
    狀棍黨嘅路線越來越偏激,都唔知班友點諗架!佢地從來都冇為中產爭取權益,而家仲連基層都得罪埋,要爭班廢青客,佢地同癲狗長毛根本就冇得揮!

    文少:
    哈哈,所以呢,我最後都係決定將條狀棍同黃婆呢個淫媒配成一對!至於嗰三件垃圾,當然唔可以同李自成比,睇佢地琴日掟番茄都就住就住,驚死整爛憎肉成副畫,真係搞笑到無倫!

    回覆刪除
  10. 好明顯,佢地只得廢靑支持。

    唉,現在最多政黨關心嘅人,只係廢靑,其他港人嘅意見,唔會有人理架,呢d就係班黑社會大佬爭取嘅「民主」?

    回覆刪除
  11. Ebenezer,
    而家無論係政府、政黨、抑或傳媒,都已經將民意量化,所指嘅係音量。邊個嗌得最大聲,自然就最能夠代表民意啦!

    回覆刪除