2011年10月9日星期日

屎坑對

話吟詩作對係風雅之事,相信唔會有人異議。但係呢個世界乜人都有,當人地喺度吟風弄月,有人就反其道而行,以廁所做題材,用對聯談屎說尿。叫得做屎坑對,當然難登大雅之堂,不過作為遊戲文字嚟睇,其實有啲都幾有趣味架。以下就係一啲喺網上揾到嘅屎坑對:

天下英雄豪傑到此俯首稱臣,
世間貞烈女子進來寬衣解裙 。

腳踏黃河兩岸手拿機密文件,
前面機槍掃射後面炮火連天。

大開方便之門,
解決後股之憂 。

有小便,宜;
得大解,脫 。

暢通上下,
雅集東西 。

來前百步緊,
出後一身鬆。

靜坐覓詩句,
放鬆聽清泉。

最適低吟淺唱,
不宜濫炸狂轟。

小坐片刻,便會放鬆意念,
清閒一會,即成造化神仙。

前頭蛟龍施甘露 ,
後面鳳凰下金蛋 。

板斜尿流急,
坑深糞落遲。

嚴格嚟講,有部分連對聯嘅基本要求都未做到,好似字詞性質對唔上,平仄亦有問題。不過話明係遊戲文字,只求得啖笑,都唔使咁認真啦。但係最尾嗰副直接用到屎尿呢啲字,就未免落於下乘嘞。

睇見人地吟屎詠尿,我又有啲技癢添,雖然墨水有限,都膽粗粗試吓。以下係我自擬嘅一副屎坑對:

細味風起雲湧,
靜聽水落石出。


喺呢度解釋一下:「風起」指「break wind」,「雲湧」指「吞雲吐霧」,「水落」指「揸水」,「石出」指「爆石」,即係有齊晒廁所嘅四大元素(屎尿屁煙)。

當然,我都知道平仄唔啱,而且趣味欠奉,不過玩吓啫,冇所謂啦!總之我嘅宗旨就係:不作無聊之事,何遣有涯之生?!

8 則留言:

  1. 真係呀,想唔笑都唔得了!

    回覆刪除
  2. 你的對很不錯啊!

    屎坑經歷,在國內真係不得了。人說若國家的厠所都普遍先進,此國必強,祖國還未可以咯!

    回覆刪除
  3. 除了屎尿果兩句,其他的都好有「韻味」喎!嘻嘻!

    回覆刪除
  4. 我又寫﹕
    天天早上返工
    夜夜晚上出恭

    回覆刪除
  5. Coffee,
    笑多啲好呀,可以平衡吓香港嘅緊張生活,對健康有益架!

    laulong,
    從廁所(尤其是公廁)真係可以睇到一個國家嘅先進程度同埋國民質素架!以中國而言,睇到嘅係城鄉差距的確好大!如果唔將城鄉差距拉近,恐怕會造成社會不穩,後患無窮!

    佛爺:
    哈哈,呢啲係另類有味文字,同你嗰啲唔同!

    文少:
    哈哈,生活咁有規律,你一定唔係講緊自己嘞!

    回覆刪除
  6. 幾好睇呀!又好笑!我上次睇已經想留言,但趕時間,睇完就走咗!

    回覆刪除
  7. SKII,
    哈哈,笑多啲好呀,香港嘅生活真係太緊張喇!

    回覆刪除
  8. 頭等大事需解脱
    小事一宗莫延遲

    回覆刪除