2011年10月6日星期四

黌宮孽史

哈哈,今日再追打豺大媽!都未開始寫已經遇到一個難題,就係標題應該用「艷史」、「秘史」、定「孽史」呢?

對於男歡女愛,我嘅態度(或者講睇法會貼切啲)一向好開放。只要雙方係成年人(指心智而言),而當中又冇強迫成份,其實喺邊度玩同點玩法都唔係問題。好明顯,當年喺北大學生會辦公室發生嘅係一件好香豔嘅事,用「艷史」嚟形容應該最貼切。不過要將豺大媽同個「艷」字扯上關係,就點都過唔到自己嗰關囉。

「秘史」就比較中性,又可以勾起讀者嘅好奇心,其實用嚟做標題都唔錯。但係呢啲嘢有幾「秘」,我就完全確定唔到。我自己冇試過喺大學圖書館、實驗室、學生會呢啲地方搞嘢啫,不過話唔定大部分大學生都試過呢。所以「秘史」都係不用為妙,費事俾人話我無知啦。

至於「孽史」,當然係負面詞啦,本來唔應該用嚟形容男女之事。但係搞嘢不設防,中咗招就走去落仔,而且仲要係三番四次,咁唔係造孽係乜?!

其實做咗就做咗,豺大媽自己有冇檢討過,根本就唔關人事。不過佢硬係不甘寂寞,係都要挖番自己嘅臭屎出嚟講,仲要將責任推卸落其他人身上。一時話自己少不更事,一時話買唔到避孕用品,一時又話係迫於社會壓力先至墮胎,總之就唔好怪佢。咁都算嘞,佢要懺悔就懺到夠,有冇誠意其實無關痛癢。最頂唔順係佢講到自己不知幾偉大,忍痛自揭臭屎係為咗拯救受一孩政策迫害嘅中國婦女同嬰兒。佢咁做已經超越咗喺自己面上貼金嘅程度,直頭係將成塊金條塞埋入私處添啦!

冇錯,一孩政策的確帶嚟咗好多社會問題,遲啲有機會不妨講吓。不過豺大媽落仔,根本就唔關一孩政策嘅事,完全係佢自己不負責任啫。只係貪圖一夕歡愉,唔通佢地(包括埋封蟲德)事前冇諗過會有中招嘅風險?到中咗招嘞,又係咪一定要落仔呢,斷估生出嚟都唔使拉去打靶啩?講到尾,佢地只係唔想為自己所做嘅嘢承擔責任啫。如果只係一對普通少男少女,我最多都係話佢地無知識淺。不過佢地係領導89學運嘅靈魂人物,主宰住中華民族嘅民主發展,理應有足夠嘅智慧同承擔去處理呢啲私人事務。如果連修身齊家都搞唔掂,仲學乜人講民主大業呢?!佢地領導89學運,會唔會都係抱住同搞嘢一樣嘅心態呢?總之想搞就搞,事前唔使評估風險同計算後果,過程中唔使考慮應變,事後就一走了之。要澄清一點,我絕對無意侮辱89民運,呢個係死罪,隨時會株連九族,我擔當唔起!我講緊嘅只係作為學生領袖嘅嗰一對夫婦啫!

忽然諗起一單咸豐往事,可以攞嚟做個對比。以前有個同級嘅中學女同學,我諗佢應該比同級平均年齡大一兩歲,而且發育得表較早,由中一開始已經係一個巨人大姐姐。因為唔同班,其實我同佢唔係好熟,不過就覺得佢有啲嘢好與眾不同。究竟係點特別法又講唔出,因為嗰時細個,有啲概念仲未好清晰,只係覺得佢同其他女同學有好大分別。而家講番當然冇難度啦,就係風情萬種囉。澄清吓先,我係指佢嘅意態,而唔係講佢個樣。

去到中四嗰年,忽然冇見佢喺學校再出現。後來聽同學講,先知道佢原來退咗學,因為俾人搞大咗個肚,據聞經手人唔係同校學生。咁都合理嘅,我地係第一屆,最大嘅男生都只係讀緊中四,邊有本事搞大佢個肚喎。咪笑呀,嗰陣嘅中四男生真係好純情,隨時連打飛機都唔識架!

又過咗好多年,聽啲舊同學講嗰位女同學已經抱埋孫添,嗰時佢都只係三十幾歲。原來佢嗰時冇返深圳落仔,而佢個女又步佢後塵,一早俾人搞掂咗。話時話,唔知佢而家係咪已經四代同堂呢?

當然啦,太早生仔未必係好事,除咗要承受各方面嘅壓力,仲要放棄好多嘢,包括學業同前途。好似嗰位女同學咁,十幾歲就開始做師奶,都咪話唔攞命。不過佢肯承擔責任,自然可以心安理得,無論日子過得如唔如意,起碼都有覺好瞓先啦!


9 則留言:

  1. 我中五果年,真係有同班男女同學搞大咗肚喎。

    回覆刪除
  2. Ebenezer,
    哈哈,又證明你後生過我好多嘞!我地個年代,啲中學男生真係好薯嘜架!

    回覆刪除
  3. 吾! ..... 我估豺大媽可能係 ..... 係少女時懷孕,中年來懷春,所以失了常性,露出獸性。

    吾! ..... 會唔會佢流哂口水?佢又想招狼入舍,來一度「豺狼」相交呢?hea!

    回覆刪除
  4. 黌宮孽史實在太多,學生與學生的有,學生跟老師的也有,部分更令作為老師的我也感汗顏!

    唉,攪乜鬼呢?教乜鬼呢?

    回覆刪除
  5. 我對乜史物史冇興趣,但可唔可以搵人解下咩係黌宮呀?

    回覆刪除
  6. 佛爺:
    哈哈,豺大媽係咪想招狼入舍就唔知,不過佢老公就真係引豺入室嘞!自爆埋啲咁嘅嘢,佢幾個女隨時會俾人笑到面都黃啦,都唔知佢有冇考慮過啲女嘅感受!

    laulong,
    平時喺報紙已經睇到好多咁嘅嘢,相信冇爆出嚟嘅仲要多好多倍!所謂家醜不出外傳,可能好多家長都寧願帶個女返深圳搞掂!要你客串做番老本行添,唔該晒!

    Coffee,
    哈哈,我對歷史都冇乜興趣架,好彩上到中四唔使再讀啫!另外補充一下,「黌」讀「紅」,普通話拼音就係「hong2」。

    回覆刪除
  7. 真係好笑﹐第一胎都可以賴落一孩政策啊﹖
    仲有﹐大陸而家已經好開明﹐超生最多都係罰錢或者無戶籍咋嘛﹖當然﹐你要墮胎又真係無人阻你的。
    至於農村仲開心﹐假如你第一胎係女﹐六年後(有些省份是四年後)就可以合法生多個﹐如果第二個都係女﹐六年後又可以再執多件(前提係你老婆仲有生育能力la﹐笑)...所以大陸有D家庭﹐大女同個細女相差十幾歲。

    回覆刪除
  8. 文少:
    豺大媽落四次仔,根本就完全同中國嘅一孩政策冇關係,佢只係乘機抽水啫!講真,中國執行一孩政策已經算有個譜架喇。以前喺印度,就試過有男人瞓瞓吓覺俾人拉咗去絕育,都咪話唔得人驚!

    回覆刪除