2010年10月10日星期日

咁教仔都得?!

早幾日喺Youtube睇到條標題叫做小器男嘅片,都幾搞笑吓。話說有個男人同兩個女搭地鐵,因為細路嘅毛公仔霸佔咗個座位而同一個阿婆發生爭執。個男人仲將過程拍低然後放上網,諗住聲討個阿婆。點知人算不如天算,個男人反而變成網民嘅圍毆對象,主要係話佢小器、唔敬老、同埋喺兩個女面前做埋咁嘅細教壞細路。其實不知幾多乜乜男乜乜女都試過拍放上網,結果就由原告變成被告。個男人竟然仲要以身試法,睇嚟佢唔止小器,仲好蠢吓添。

講到教壞細路,我都親身見識過。話說有一次由石家莊搭飛機返香港(當然係坐經濟艙啦),坐我後面係一個大約五六歲嘅𡃁仔,佢隔籬係個中年女人,應該係佢阿媽。佢地兩個都講普通話,我估係遊客或者新移民。個𡃁仔都不知幾活潑,由坐低開始就不停咁拍檯踢腳。佢拍一吓檯,我背脊就震一震,佢踢一吓腳,我個背脊又震一震,真係俾佢煩死。我都知細路唔懂事又貪玩,但係冇理由要我成程機都受咁嘅騷擾格,咁我咪擰轉頭同佢阿媽講囉。我當時講得好客氣,之前都提過啦,我連去7仔買都會講四聲唔該嘅。本來諗住咁簡單嘅開句聲就實掂架啦,點知事態發展竟然完全超乎我嘅想像。個女人同我講,話張檯係個𡃁仔嘅,佢鍾意點玩都得,呢個係佢嘅權利,我冇得過問!個𡃁仔知道我地講緊佢,就問個女人佢係咪做錯咗。個女人居然同佢講話佢冇做錯,叫佢繼續玩,仲話唔使理我添。我當時嘅第一反應係想兜巴星條八婆,不過好男不與女鬥,唯有嗗聲吞咗佢啦。其實呢禍國殃民嘅人,真係人人得而星之啦。話佢禍國殃民,絕對唔係無限上綱。佢咁教仔法,個𡃁仔第日實會好似佢咁,成為一個蠻不講理,自私自利嘅人。細路係國家嘅未來主人,佢地嘅品德係關乎整個民族嘅興衰。而家條八婆喺度荼毒我地國家嘅小主人翁,唔係禍國殃民係乜?!

另外一次又係搭飛機返香港(當然又係坐經濟艙啦),喺邊度返就唔記得嘞。一坐低就覺得背脊有異動,好有阿嬋feel,唔通航空公司換晒坐位做阿嬋按摩椅?不過諗吓,航空公司邊有咁好死,會咁益我地呢cheap cheap客啫。唔使再諗嘞,一定係後面有古怪,唔通後面真係有個阿嬋幫我做緊人肉按摩?擰轉頭一睇,原來唔係阿嬋,係一個十七八歲嘅𡃁妹。佢好似冇腰骨咁,坐到成個人墮晒落去,對膝頭就頂住我嘅椅背。頂都算嘞,佢仲要不停咁un吓un吓,原來阿嬋feel係咁樣嚟嘅。我又係好有禮貌咁同講,話佢頂到我好唔舒服。我諗大家都估到,個𡃁妹嘅回應又係激到人爆血管嗰隻。佢話唔知我舒唔舒服,不過佢就覺得好過癮嘞。真係俾佢吹到啤一聲!基於好男不與女鬥嘅原則,我又係嗗聲吞咗佢。同之前條八婆一樣,呢個𡃁妹都係蠻不講理,自私自利嘅人。好明顯,呢個係冇家教嘅結果。

睇返而家香港八九十後,好多都係極度自我中心,做從來唔會顧人地嘅感受,唔會理對其他人有乜影響。我相信呢係家庭教育失效嘅結果。事實上,而家好多父母都唔識點教仔,或者從來冇諗過要教。成日都喺新聞睇到,有人淨係顧住自己上大陸wet,連細路冇飯食都唔理,由得佢地自生自滅。有人就啱啱相反,過份愛錫仔女,佢地要乜都永冇say no。一係就過份保護,驚死仔女接觸吓出面嘅世界就會學壞。另外有就利益掛帥,教仔格言係千祈咪蝕底。

我一向都唔相信性善論或者性惡論,我只相信細路仔係一張白紙,張紙會變成點樣嘅圖畫,完全係睇大人喺上面畫乜。令人失望嘅係,好多人淨係識鬼畫符!

9 則留言:

  1. >>而家條八婆喺度荼毒我地國家嘅小主人翁,唔係禍國殃民乜?!

    你的黑色幽默真係一流!
    話時話,做人阿媽真係好大壓力,當然呢啲咁禍國殃民的行為,我是一定打倒的,所以心力交瘁呀!

    回覆刪除
  2. Coffee,
    做人父母梗係唔容易啦,聽講話養大一件要成幾百萬!不過錢都唔係萬能嘅,有錢唔代表可以教得好仔女,睇吓成日上八卦雜誌嗰班二世祖就知啦!做人父母係好大嘅承擔,教仔更係勞心勞力嘅事。如果係冇責任感嘅人,真係唔生好過生,以免遺禍人間!

    回覆刪除
  3. 搭飛機被細路喺後面踢凳我都試過幾次,我通常都喺直接搵空姐,會比較有效。有一次仲upgrade去商務位,哈哈哈。

    以前我都會同嗰阿媽講,但通常一喺就好似你咁俾人鬧番轉頭,一喺嗰阿媽是但咁敷衍。冇乜嘢嘅,嗰細路大咗,佢嗰阿媽咪知味道囉,哈哈。

    回覆刪除
  4. 其實成班友自信心爆棚。有個朋友的大家姐,佢個仔搞壞了電腦,佢竟然周圍同人講,佢個仔好聰明,搞壞佐部電腦,無人救得番。

    回覆刪除
  5. 以上幾位︰

    很多阿媽咪覺得自己生個件,果三樣嘢都是香的,呢樣變化心態好普遍架!當然是有限期的,多數在幼稚園打前的階段。

    我?我冇!我唔正常呀嘛!

    回覆刪除
  6. 80年後出世o既朋友(包括我)真係原罪多多啊!

    其實世上惡人何其多,係你見得少o者。係香城三至一百歲o既好一部分都有問題架啦。正如香港有廿幾三十萬精神病人通街走,佢地唔病發你就察覺唔到o者!

    又,好多你講o既八九十後又好多都好正常o既。我始終相信大部分人都是正常o既,發神經的惡人始終佔少數。

    回覆刪除
  7. Eric,
    嘩,有得upgrade咁筍,直頭係因禍得福啦!雖然話好男不與女鬥,不過我都唔係嗰俾人踩到上心口都唔出聲嘅人嚟。如果情況冇改善,我自然有方法對付佢地。我相信因果報應,如果父母將仔女訓練成自私自利嘅人,佢地實會自嘗惡果。因為自私自利嘅人係唔識感恩嘅,所以亦唔會孝順父母。

    佛爺:
    哈哈,唔怪得而家咁多𡃁仔都係破壞王嚟啦,原來有家長係咁欣賞仔女搞破壞嘅!

    Coffee,
    所謂情人眼裏出西施,為人父母嘅都係一樣,覺得自己仔女乜係最好嘅。

    詩白爾:
    哈哈,稍安無躁,我都冇話所有八九十後都係咁。而且寫blog嘅為求得啖笑,梗係隱善揚惡架啦,唔使咁認真喎!

    回覆刪除
  8. haha, 寫得真精彩。Arma, 你也太善良了,俾我我頂完佢八彩後,會向空姐投訴咯。就算空姐搞唔掂,都可以近距雖吓啲靚空姐嘛!

    回覆刪除
  9. laulong,
    其實呢情況試過好多次,我都係會自己開聲同對方講先,咁係比較尊重對方。事實上通常都係講咗就搞掂,咁經典嘅人都係遇過兩次啫。

    回覆刪除