藍與黑

唔記得邊年，海關放寬咗烈酒入境限制。咁啱又去完旅行，一於冇蝕底，喺香港機場買咗兩枝藍牌。

之前冇買過藍牌，因為實在太貴。當然，就算免咗稅我都覺得好肉赤，記得好似係$12XX一枝，係黑牌嘅幾倍價錢。

平時飲開黑牌，多數加冰，有時都會淨飲。感覺上加冰好，不過淨飲都OK。至於藍牌，當然係唔會加冰啦。咁啱嗰排有朋友上嚟，兩枝藍牌飲咗三次就冇晒。

藍牌係咪好飲到值得貴黑牌幾倍，老實講，我就唔多覺嘞。感覺上係比黑牌好，不過亦可能只係心理上先入為主，覺得貴一定好。至於人地講嗰淡淡嘅煙燻味同埋細緻嘅口感，我就真係點都飲唔出。如果你話係黑牌同紅牌，我就可以飲得出有分別嘅。

其實威士忌我只係間中飲吓，都係買嚟上倉。飲得最多嘅係餐酒，一年會開過百枝紅白酒，當然都係平啦。食飯飲餐酒真係幾好架，煮得唔好食嘅會覺得好味，而平價酒又會覺得好飲，可以話相得益彰。至於乜係aroma、body、同texture，真係佢識我，我唔識佢。總之飲落覺得OK就得啦，唔明點解味覺咁基本嘅都有一大堆學問。

最佩服人玩blind tasting，就咁飲幾啖就可以講得出隻酒嘅葡萄、產地、同年份，直頭好似玩魔術咁。不過我又唔覺得玩到咁出神入化有乜實際作用，打個比喻，就算你識玩魔術，都唔會無啦啦喺屋企露兩手啫。

雖然我自己唔得，但係我都相信有人真係可以拆解到葡萄酒嘅複雜味道。不過有一樣我就點都想像唔到，就係鹹味都可以有唔同層次。人話喜馬拉雅山嘅粉紅色岩鹽同法國海鹽好正，味道有豐富層次，鹹都鹹得好有個性。以前黃X如仲有喺壹仔寫嘅時候就成日推介。係咪真係咁正我就唔知，我淨係知道嗰鹽貴到識飛啫。提起黃X如又順便講兩句，佢唔貴嗰樣都唔介紹，普通一個煲都要成幾千蚊。唔通真係用個幾千蚊嘅煲煮會好食？

味覺係一種原始感官，人對味道嘅喜惡本來就好簡單直接。味覺唔敏銳嘅人一樣會好享受佢地覺得好食嘅，滿足感同一嘴尖嘅人食到頂級貨色完全冇分別。咁無啦啦做乜要訓練自己去適應一套人地認為有品味嘅標準呢？

後記：
呢幾年喺免稅店都係買黑牌，藍牌就連價錢都費事問。我諗以後都唔會買架喇，除非發咗達，錢多到使唔晒啦！