2010年10月8日星期五

藍與黑

唔記得邊年,海關放寬咗烈酒入境限制。咁啱又去完旅行,一於冇蝕底,喺香港機場買咗兩枝藍牌。

之前冇買過藍牌,因為實在太貴。當然,就算免咗稅我都覺得好肉赤,記得好似係$12XX一枝,係黑牌嘅幾倍價錢。

平時飲開黑牌,多數加冰,有時都會淨飲。感覺上加冰好,不過淨飲都OK。至於藍牌,當然係唔會加冰啦。咁啱嗰排有朋友上嚟,兩枝藍牌飲咗三次就冇晒。

藍牌係咪好飲到值得貴黑牌幾倍,老實講,我就唔多覺嘞。感覺上係比黑牌好,不過亦可能只係心理上先入為主,覺得貴一定好。至於人地講嗰淡淡嘅煙燻味同埋細緻嘅口感,我就真係點都飲唔出。如果你話係黑牌同紅牌,我就可以飲得出有分別嘅。

其實威士忌我只係間中飲吓,都係買嚟上倉。飲得最多嘅係餐酒,一年會開過百枝紅白酒,當然都係平啦。食飯飲餐酒真係幾好架,煮得唔好食嘅會覺得好味,而平價酒又會覺得好飲,可以話相得益彰。至於乜係aroma、body、同texture,真係佢識我,我唔識佢。總之飲落覺得OK就得啦,唔明點解味覺咁基本嘅都有一大堆學問。

最佩服人玩blind tasting,就咁飲幾啖就可以講得出隻酒嘅葡萄、產地、同年份,直頭好似玩魔術咁。不過我又唔覺得玩到咁出神入化有乜實際作用,打個比喻,就算你識玩魔術,都唔會無啦啦喺屋企露兩手啫。

雖然我自己唔得,但係我都相信有人真係可以拆解到葡萄酒嘅複雜味道。不過有一樣我就點都想像唔到,就係鹹味都可以有唔同層次。人話喜馬拉雅山嘅粉紅色岩鹽同法國海鹽好正,味道有豐富層次,鹹都鹹得好有個性。以前黃X如仲有喺壹仔寫嘅時候就成日推介。係咪真係咁正我就唔知,我淨係知道嗰鹽貴到識飛啫。提起黃X如又順便講兩句,佢唔貴嗰樣都唔介紹,普通一個煲都要成幾千蚊。唔通真係用個幾千蚊嘅煲煮會好食?

味覺係一種原始感官,人對味道嘅喜惡本來就好簡單直接。味覺唔敏銳嘅人一樣會好享受佢地覺得好食嘅,滿足感同一嘴尖嘅人食到頂級貨色完全冇分別。咁無啦啦做乜要訓練自己去適應一套人地認為有品味嘅標準呢?

後記:
呢幾年喺免稅店都係買黑牌,藍牌就連價錢都費事問。我諗以後都唔會買架喇,除非發咗達,錢多到使唔晒啦!

5 則留言:

  1. >>味覺係一種原始感官,人對味道嘅喜惡本來就好簡單直接。味覺唔敏銳嘅人一樣會好享受佢地覺得好食嘅,滿足感同一嘴尖嘅人食到頂級貨色完全冇分別。咁無啦啦做乜要訓練自己去適應一套人地認為有品味嘅標準呢?

    對極呀!!我就是味覺唔敏銳嘅人,但完全無損我對食物的滿足感!

    回覆刪除
  2. 藍牌 Walker? 聽都未聽過,只知有黑牌同紅牌。至於嘴刁到可以分年期、產地真係非我族類咯!

    至於咸都咸得有層次,似乎愛黎形容男人貼切啲噃!

    回覆刪除
  3. Coffee,
    人地話胡塗是福,真係不無道理,太精明嘅人反而唔一定會開心!

    laulong,
    其實Johnnie Walker仲有金牌同綠牌添。至於blind tasting,早排睇電視就見到葉X堃同黃X澤喺法國玩呢味。個前高官都算嘞,黃X澤就點睇都係冇說服力,可能係我對明星仔有偏見啦。講到男人,點止鹹得有層次呀,有仲鹹得有個性,仲鹹得有品味添!

    回覆刪除
  4. 上個月參選過威士忌廠,試飲過幾款single malt,講真真喺都差唔多咁嘅味。最主要真喺太'啃',試啲啲就頂唔順,都喺咪搞我。不過喺蘇格蘭真喺有好多選擇,有平有貴。我有幾個同事夾份買一個barrel,好似可以飲N年之類。
    我最鐘意都喺gin and tonic,同埋各式嘅cocktail。
    最唔明喺用泥味之類唔食得嘅嘢嚟形容餐酒。。唔通佢地食過泥?
    黃X如個專欄我都有睇過,多數嘅食譜都喺用一個貴煲,煲滾啲水,放幾粒紅棗蓮子之類,喺啱啲平時唔煮飯嘅有錢女玩下,然後post啲相喺blog呀facebook呀咁。叫佢炒一碟青菜又睇下識唔識。

    回覆刪除
  5. Eric,
    嘩,真係好誇張呀,牛又成隻買,酒又成桶買!講到single malt,咁啱我嘅存貨之中就有一枝Glenfiddich 15年,不過仲未開。紅酒有泥味都幾搞笑吓。紅酒飲之前要聞吓先,如果聞到黃泥香,就真係大吉利是嘞!至於cocktail,我呢排鍾意飲vodka+Kahlua+Bailey's,係White Russian嘅變奏,用Bailey's係因為我屋企冇牛奶。黃X如嗰個專欄真係得啖笑,日等我寫吓佢先!

    回覆刪除