2010年10月7日星期四

我愛肥牛

今年驗身,總膽固醇係6.29,又爆燈嘞!舊年都冇爆得咁犀利,都唔知係唔係因為轉食咗隻超高脂嘅加拿大肥牛。

以前一直覺得食物一定係新鮮嘅好,所以牛肉都係喺街市買。我買開嘅係牛柳邊,已經算係比較好嘅部位,不過如果煮到熟透,一樣係好鞋吓。最近試過隻加拿大急凍牛肉,覺得正好多,之後就冇再喺街市買嘞。

呢隻急凍牛肉價錢好合理,只係比新鮮牛柳邊貴少少,不過下欄就比較多。一舊買返嚟大約係2kg,但係切走咗表面嘅肥膏就得返八折。雖然話切得走嘅肥膏都切走晒,不過仍然係勁高脂,因為舊肉裏面都布滿雲石紋嘅油花。唔健康我都知,不過嗰種滿口油香嘅感覺真係好正。呢隻牛肉仲有一樣好,就係煮到熟透都唔會韌。

因為油香味實在太濃,攞嚟蒸其實唔係咁適合,最好係炒或者整串燒。今晚就整咗個XO醬蘑菇珍珠筍炒牛肉,味道好濃,配紅酒啱晒。

可能有人會覺得我好無聊,咁嘅普通料都講得一餐。鬼唔知和牛正好多咩,不過要食得起先得架!做任何都要量力而為,所謂知足常樂,勉強冇幸福!

5 則留言:

  1. 如果處理得好,急凍都唔輸蝕㗎。我喺加拿大時,就喺同同事夾份去農場買一隻牛,劏好之後一包包唔同部位分好急凍。一樣好好食,冇怪味冇黑色。最重要喺來歷清楚,又比超市平一半!

    回覆刪除
  2. 唔知點解,街市啲牛好似冇晒牛肉味一樣,又容易老!近半年都是轉食急凍肥牛了。

    回覆刪除
  3. 唔明啲人點解咁勁,新鮮或雪凍魚、肉、雞,都食得出有分別!

    回覆刪除
  4. 哇,唔好食咁多紅肉呀!對身體真係唔好。我有啲恣肉恣食嘅朋友,唔大得我好多,好幾年前已經馱住大大包藥做人,而且係一世都係咁!

    回覆刪除
  5. Eric,
    嘩,成隻牛又誇張咗喎!我買4kg就已經可以食成半年喇!

    Coffee,
    好有同感呀!細個時最鍾意食榨菜蒸牛肉,雖然牛肉只係普通貨色,不過就又滑又好味。而家唔止牛肉差咗,連榨菜都唔係好得。

    佛爺:
    魚同雞就一定分到,雪肉質比較霉,而且冇乜鮮味。係牛肉比較特別,急凍嘅都居然咁好食!

    laulong,
    我都知唔健康,所以都食得好節制吓,一個禮拜只係俾自己食一次咋!

    回覆刪除