2010年10月4日星期一

笨豬

Bungy jumping喺國內譯做蹦極,無論係意思或者讀音都譯得好貼切。不過我都係鍾意香港嘅譯法多,笨豬跳,真係既傳神又抵死!

據聞笨豬跳嘅發源地係一個位於南太平洋嘅小島,嗰度男人為咗展示自己嘅勇氣,就用樹藤綁住對腳,然後喺高台跳落嚟。喺網上睇過有關圖片,真係覺得好牙煙。個高台由樹枝搭成,起得好簡陋,直頭係唔掂佢都隨時會自己冧嗰隻。樹藤冇乜彈性,而且表面又粗鞋,咁樣喺高台跳落嚟,就算跌唔死都刮到對腳甩晒皮啦。要證明自己夠勇敢都唔使攞條命嚟教飛啫,你話係咪笨?

我地玩到嘅笨豬跳當然安全好多,不過嘥幾舊水試吓跳樓嘅滋味,唔係笨豬係乜?笨豬我都做過兩次,都係喺紐西蘭,仲係同一地點,不過就隔咗兩年。其實有一次去十渡(北京附近)都見到有得玩,不過呢帶有危險性嘅,始終唔係咁有信心喺祖國玩。俾人鬧我唔愛國都係咁話架嘞,點都係自己條命仔緊要!

第一次玩笨豬跳嘅時候都考慮咗一陣,唔係因為驚,而係覺得有唔好意思。等緊玩嗰全部都係十零歲嘅𡃁仔𡃁妹,而自己就超晒齡,感覺上好似喺遊樂場同班細路一齊玩滑梯咁。點都好啦,冇理由一場去到唔玩啫。

跳嘅地方係一個峽谷上面嘅吊橋,跳台喺橋中央,下面係條河。跳台距離河面大約有十二三層樓咁高,望落去唔算太恐怖。不過如果跌落去都一樣死得,因為我唔識游水。但係感覺上點都好,起碼唔會爆頭或者甩手甩腳。

排緊隊等玩嘅時候已經諗定一套高難度嘅翻騰動作,諗住可以大展身手。點知喺跳台邊望落去嘅時候竟然有腳軟嘅感覺,原先諗好嘅動作完全做唔到出嚟,嗰時先知道原來跳樓真係要好大勇氣。

隔咗兩年再去紐西蘭,又心思思走去玩多次,希望可以將個動作做好。今次就唔搞咁多高難度嘞,諗住求其好似人地玩高台跳水咁,簡簡單單做個魚躍就算數。結果做出嚟都係似跳樓多過跳水,真係好失望。

總結兩次經驗,其實跳嗰刻唔係咁享受,跟住條橡筋彈吓彈吓嗰陣都幾過癮,不過要幾舊水玩一次就唔多值。要俾錢試吓跳樓自殺嘅感覺,諗落真係有少少笨豬。不過跳樓自殺都好喇,如過係俾人推落樓就仲笨豬。

話說第一次玩嘅時候,喺我前面係一個大約20歲嘅架仔。佢出到跳台邊但係又唔敢跳,死揸實台邊嘅欄杆唔放,無論個工作人員點樣遊說都冇用。如是者糾纏咗好耐,後面嗰就個個等到變晒化石。喺我正想一腳伸佢落去之際,個虎背熊腰嘅工作人員終於出手嘞。只見佢一招老漢推車,個架子就好似斷線紙鷂咁飛咗出去,跟住聽到谷底傳嚟一聲淒厲嘅慘叫。呢個架仔真係唔抵可憐,明知自己畏高就咪玩呢啦。就算出到跳台先發覺自己真係唔掂,都仲可以放棄,水就冇得回架喇,但係起碼唔使搞到咁瘀。

真係唔明架仔,殺人放火就面不改容,玩咁簡單嘅就搞到醜態百出。我都話架啦,蘿蔔頭真係一個怪雞民族!


5 則留言:

  1. 哇,你咪搞我!上山就幾高都得,甚至華山長空棧我都夠胆過,但笨豬跳就俾錢我都唔制。

    除非有個我見到都口震流晒口水嘅美女,話我肯跳就以身相許喇!

    回覆刪除
  2. 你寫得好傳神!
    >>諗定一套高難度嘅翻騰動作
    哈哈!我見人跳時我都有幫自己咁諗架!!

    我曾經係機動遊戲的愛好者,嗱!我會提到東洋國喇,在富士急玩果啲機動遊戲,可以驚嚇到出眼淚喊!

    btw,唔識游水竟然玩笨豬跳!好嘢!

    回覆刪除
  3. laulong,
    係呀,笨豬跳呢家真係貼錢買難受!至於長空棧道,我去嘅時候二十出頭,仲係好大膽吓,一都冇驚過。不過其實真係幾危險吓架,聽聞每年都跌死幾件。

    Coffee,
    我雖然唔識游水,不過去旅行都有玩吓水上活動,好似揸快艇、水上電單車、浮潛、水底漫步、同埋rafting。總之著住救生衣我就敢玩架喇。至於機動遊戲,只要一路玩一路嗌就會冇咁驚。

    回覆刪除
  4. 水上電單車我反而覺得好玩,笨豬跳真係咪搞我啦!

    回覆刪除
  5. 佛爺:
    係呀,水上電單車真係好正!不過喺芭堤雅玩過就麻麻哋,馬力又細,又一定要由個泰仔揸,勁冇癮!喺峇里島玩嗰次就唔同嘞,馬力大成倍,又可以自己揸,超過癮!

    回覆刪除