2010年10月1日星期五

想飛

唔知點解近排冇乜發夢,會唔會係老人痴呆症嘅先兆呢,有驚添。夢呢家真係好神奇,夢境有時感覺上仲真實過現實生活。整吓整吓,邊係夢境,邊係真實經歷,連自己都分唔清。人地話「日有所思,夜有所夢」,夢境會唔會真係反映咗一連自己都唔察覺嘅潛意識呢?

以前成日發夢,發得最多係俾鬼追同識飛,好多時更係因為俾鬼追所以先至飛。至於點解會成日俾鬼追,我自己就冇深入研究嘞。而飛就係由細細開始已經好嚮往嘅。

細個時好鍾意睇超人(鹹蛋超人)同小飛俠(阿童木),覺得識飛真係好正。不過好奇怪,我對美國嗰個超人又冇乜興趣喎。講開Superman,真係試過有細路披住張床單就由窗口飛咗落街。我當然冇咁傻仔,不過就證明咗好多細路都係好似我咁,好想飛。

飛嘅感覺係點,一直都好想試,好想搭吓飛機。不過嗰時屋企好窮,連荔園嘅低能飛機仔都冇機會玩。直到大學第三年嘅暑假,先有機會搭飛機。嗰次由廣州飛桂林,搭嘅係一架安24螺旋槳機。不過第一次飛嘅經歷,絕對係驚嚇多過興奮。首先,嗰種完全唔係我想像中飛嘅感覺。而且隻機全程震到想散咁,真係驚佢會飛飛吓跌落嚟。

出咗嚟做之後,間中會去吓旅行,搭過唔同嘅飛機。但係無論大型、中型、抑或小型飛機、甚至直升機,都唔係我想要嗰種飛嘅感覺。總之只要係坐喺機艙裏面就冇feel啦。試過有段時間成日要上大陸出差,直頭搞到好憎搭飛機添。

為咗追求嗰種飛嘅感覺,去親旅行都會留意吓有冇特別玩。試過坐熱氣球,感覺比飛機好,起碼真係覺得自己身處半空。不過熱汽球始終都係飄,而且飄得太慢,同飛爭好遠。

又試過玩要拋個身出去嘅。喺紐西蘭就玩過笨豬跳,唔算好好玩,感覺上似跳樓多。當然啦,跳樓我都冇試過,只係憑空想像啫。又試過喺黃金海岸玩過一隻叫做Flycoaster嘅,講得簡單,其實係一個超高嘅韆鞦。不過玩嘅時候唔係企喺度或者坐喺度,而係用一條V形嘅鋼纜吊住,身體同地面成平行。首先要將個人向後面扯,到高度接近支架頂部嘅時候就放開,個人就會蕩嚟蕩去,原理同打韆鞦一樣。呢隻都算幾好玩,相當刺激吓,真係有少少飛嘅感覺。不過蕩極都係一條弧形軌跡,俾條鋼纜限死咗,唔夠free。

講起free就一定要提吓skydiving嘞,freefalling嘅感覺真係好正吓。話就話係以高速下跌緊,不過感覺上就好似飄浮喺半空咁,非常過癮!雖然好玩,但係始終都唔似飛。而且事前準備工夫太多,跳嘅時候一陣就玩完,唔係好夠喉。跳一次要成二千幾蚊,都幾貴吓,不過包埋影相同video,都算係咁啦。

玩過最有飛翔feel嘅都算係滑翔降傘嘞,即係香蕉形嗰隻。開始嘅時候要喺懸崖衝出去,不過都唔算好驚,點都冇玩skydiving喺飛機跳出去嗰吓咁驚。飛咗出去之後就海闊天空,直頭free過carefree,正!原來滑翔降傘都好靈活吓,可以掟彎,可以打白鴿轉,仲可以爬升添,真係估佢唔到。雖然唔係親自控制,都絕對可以收貨。幾舊水玩十幾分鐘,都算物有所值。事隔兩年,再去紐西蘭嘅時候又玩多一次。不過個coach偷工減料,乜花式都唔玩,幾分鐘就落咗地,真係俾佢吹脹!

滑翔降傘雖然好正,不過都未係想像中最有飛翔feel嘅。最想玩嘅係滑翔風箏,但係一直都未有機會試。我個人好懶,見到有得玩就玩,見唔到就算,唔會特登走去。總之一切隨緣啦!



5 則留言:

  1. 你對飛好有研究喎!亦經驗豐富呢!
    我細時都常夢見自己識飛,無啦啦又飛幾嘢果隻。大咗之後就再冇發識飛的夢了,不過我怕搭飛機。

    回覆刪除
  2. Coffee,
    哈哈,我諗仲有好多人都係咁架,發夢發到識飛!其實我都好唔鍾意搭飛機,不過去旅行唔搭又唔得,冇計!

    回覆刪除
  3. 嘩你差唔多玩晒可以喺空中玩嘅嘢!我好細膽,淨喺試過熱氣球咋!
    我喺連過山車都唔敢坐嘅人嚟。後生時已經唔敢,越大越細膽。
    不過有一樣喺我敢試嘅,就喺室內摹擬跳傘,有一個特大風扇喺地下吹起人嗰種。離地三米,又有厚墊,我就唔會嚇到賴尿。

    回覆刪除
  4. 你真係夠哂刺激!連Eric講的兩種遊戲,我都唔敢玩,只係坐過山車咋!

    回覆刪除
  5. Eric,
    哈哈,瀨尿?有冇咁激呀!我諗你係唔鍾意刺激嘅動態遊戲啫。你講嗰隻大風扇我諗都會幾好玩,不過就未見過邊度有得玩。

    佛爺:
    其實過山車都可以好刺激架。喺Edmonton嘅Westmall玩過一隻過山車,其中一個位連我都覺得驚,我自問都好大膽吓架喇。

    回覆刪除