2011年6月14日星期二

有病

呢排搞緊大鑊,忙到連blog都唔得閒寫。其實最大鑊嗰部分都仲未開始,直頭諗起都煩!不過睇完前晚嗰集「星期日檔案」,真係有不吐不快,就算點忙都要講兩句。

嗰集嘅主題係「港產內地B」,本來都冇乜好講。大量內地孕婦嚟香港生仔,佔用本地醫療資源,其實都唔係今日先發生。而且同我冇乜關係,我一向都係抱住隔岸觀火嘅心態嚟睇。不過對於節目裏面其中一個個案,我就有想講嘞。

話說有個本地孕婦抱怨喺私家醫院完全唔到位,淨係得番公立醫院先有位,搞到佢唔知點算,直頭好似世界末日咁。佢話覺得喺私家醫院生會安全,呢樣我唔會同佢拗。如果人有條件去私家醫院生,當然係好事,不過香港嘅公共醫療其實已經相當唔錯。總之一句講晒,有錢就有得揀啦。

如果個女人只係擔心醫療質素嘅問題,我都仲可以理解。最頂唔順係佢話如果喺公立醫院生,張出世紙上面就會有公立醫院個名,而呢個標籤會影響阿仔嘅前途。聽完佢呢番說話,我嘅評語只得兩個字:有病!

如果喺邊間醫院出世都可以成為一個標籤,會影響到一個人嘅前途,咁嘅社會唔止有病,簡直係病入膏肓!當然啦,世事無絕對,有病嗰個可能係我自己!

5 則留言:

  1. 真係有病!!

    我又分享個例子,有個阿媽日日送小一阿女上學,站在校門望住阿女入去時,都喊到生離死別咁,後來去接受治療時,講出原來以前細個被自己阿媽遺棄,一生的陰影!

    仲有個阿媽,買好多好多名牌衫褲給歲多二歲的女,多到著唔晒,因為自己細時家庭窮到冇得著。

    好多女人,在自己成為阿媽的時候,十分寵愛女兒,其實係不自覺地修補自己童年的缺憾。

    咩病都有!

    PS︰你多日不寫了,一切還好罷?

    回覆刪除
  2. Well,以呢個邏輯推論,我個仔注定冇前途!!

    Coffee,嘻嘻,我今日終於可以喺 lunch hour 睇吓其他人的 blog啦!

    回覆刪除
  3. 張出世紙寫住係公立醫院出世,媽咪可能擔心,將來囝囝囡囡談婚論嫁時,比親家睇少喎!嘻嘻!

    回覆刪除
  4. 生咗仔嘅就即刻變咗好識諗嘢嘅家長,同一當選就變咗好有智慧同好有道德嘅議員,一樣荒謬!

    回覆刪除
  5. Coffee,
    其實好多人都有病,只係自己唔知啫!哈哈,呢排搞緊大鑊,係就係煩,不過總算冇穿冇爛啦。

    SKII,
    唔怪得我成日覺得自己懷才不遇啦,可能真係同我張出世紙上面寫住「廣華醫院」有關喎!

    佛爺:
    中國人最講究門登戶對,如果喺立醫院出世,但係又想高攀嗰私家醫院貨色,梗係會遭人白眼啦!

    Laulong,
    哈哈,係呀!香港真係有好多怪獸家長同埋怪獸議員架!

    回覆刪除