2011年6月22日星期三

三棍合一

頂佢個心肝脾肺腎,嗰個三棍合一嘅政黨又走出嚟抽水喇!究竟係邊三棍?之唔係政棍、狀棍、同搞屎棍囉!

引述成報報導:「另外,公X黨建議把置安心計劃的單位轉為居屋,以及把北角邨、何文田山谷道、黃竹坑邨的地皮,把一半面積撥作興建居屋,預計可提供11,400單位,最快可以在2014年推出當中6,800多個,而綠白表申請比例應該訂為四比六。」

早兩日凸首放風話要復建居屋,狀棍幫就慌死蝕底,即刻走出嚟向佢地班選民獻媚,建議喺幾塊最優質嘅地皮攞一半出嚟起居屋。睇番呢個政黨一向嘅所作所為,佢地嘅目標選民應該係綜援人士,或者係嗰仲未畢業就已經計劃定買樓結婚嘅後生仔。真係唔明白,喺呢地皮起居屋,價錢都唔係上述人士可以負擔架啦。除非起好嘅時候,香港嘅樓價已經跌咗超過五成。不過世事嘅好難講,可能幾年之後,政棍搞到冇好搞,仲會關注埋綜援人士嘅置業需要添。

我一向唔贊成起居屋,資源用嚟起多公屋好過啦。樓係一種商品,具有投資價值,究竟點解要用公帑資助人買呢?公屋租平,已經俾咗人一個可以儲錢嘅環境,如果想改善生活,就努力做啦。不過咁,雖然我唔贊成,亦都唔係強烈反對。我最反對嘅係攞地王嚟起居屋!

眾所周知,賣地係政府嘅主要收入來源,錢係入咗庫房,不過最後都係會投放番喺民生福利或者基建上面。用靚地起居屋,只不過係資助少數人住另類樓王。相反,如果將賣地嘅錢用嚟做其他,受惠嘅人肯定多好多倍!

講到居屋樓王,又令我諗起紅灣半島,即係後來變身成為海景豪宅海X南岸嗰個居屋。用嗰塊臨海地王起居屋,直頭係荒謬到無倫。當時有好多人(其中包括好多所謂有識之士添)提出一個疑問:點解冇錢就唔可以住海景樓?其實我都想問:點解你兩萬蚊可以有無敵海景,反而我三萬蚊就只得無敵樓景呢?正如我前面提過,喺嗰塊地起居屋根本就係資源錯配。另一方面,亦違反咗多勞多得嘅香港精神。

後來香港樓市崩潰,政府將紅灣半島賣咗俾地產商。大家都知,地產商根本就唔係想要嗰幾棟樓,而係想拆咗嚟起豪宅。我係完全樂觀其成,因為咁先係撥亂反正。其實單同我一利益關係都冇,莫講話拆咗起過嘅豪宅我諗都唔敢諗,就算係後來化完妝,變咗身做海X南岸我都買唔起。

雖然買唔起,不過海X南岸嘅示範單位我又真係走去睇過喎。睇完之後,我嘅評語只有四個字:暴殄天物!示範單位喺高層位置,對正無敵維港煙花海景,本來真係正到無倫。不過窗又細又高,坐喺度根本就睇唔到個海。當然啦,如果你有姚明咁高就另當別論。如果想享受吓個無敵海景就一定要企高,你話係咪好荒謬?!咁唔係暴殄天物係乜?!

後來樓市有起色,班扮民議員唔抵得地產商賺大錢,就以環保為理由阻止拆卸,所以先有而家嘅海X南岸。就係由嗰時開始,我就再冇投票俾嗰班一時一樣、雙重標準、三刀兩面嘅扮民議員嘞。班友成日講合約精神,到人地根據合約真係可以拆嘞,又搬環保出嚟搞事。如果班友真係咁注重環保,我又想問一個問題,唔知佢地有冇呼吸嘅呢?班友日日製造咁多二氧化碳,加速地球暖化,佢地夠應該做番啦,例如從今以後停止呼吸!

而家狀棍黨又出嚟搞事,想整多幾個翻版紅灣半島,真係唔知佢地想搞到香港變成乜世界!呢咁嘅棍,絕對一存在價值都冇,直頭連地拖棍都不如!哈哈,攞地拖棍嚟同班友比較,真係有侮辱咗對人類有貢獻嘅地拖棍喎,我要向無辜嘅地拖棍致歉!

4 則留言:

  1. 一有咗代議政制,就走咗哩批人間三棍出黎咯!

    那個甚麼南岸,成萬蚊尺的居屋豪宅,簡直就係人间大笑話!

    回覆刪除
  2. 禮賓府夠大喇!不如將佢分成一百間房,分比街邊D犀利哥住!嘻嘻!

    回覆刪除
  3. 我而家冇用地拖lo,轉用舊毛巾蹲下去抺地板,當運動,地板又冇弄得咁濕。

    回覆刪除
  4. laulong,
    哈哈,而家政棍當道,類似紅灣半島嘅人間大笑話肯定陸續有嚟呀!

    佛爺:
    令我諗起「齊瓦哥醫生」添。俄羅斯變天之後,齊瓦哥醫生外父間豪宅就係分晒俾街坊住。而家民主紅衛兵當道,你講嘅情況會發生真係一都唔出奇喎!

    Coffee,
    哈哈,我知呀,好似「青春火花」咁!不過好辛苦啫!

    回覆刪除