縮水樓

既然講咗發水樓，咁又點少得縮水樓呢！

講到縮水樓，一般人會有兩種唔同嘅理解。第一種係指嗰房細窗台大，放咗張床已經冇位轉身嘅樓。而另外一種係指嗰實用率超低嘅樓，今日我想講嘅就係呢樣嘞。

大家都知道，舊樓（指樓齡20年以上嗰，不過阿茂樓除外）實用率比較高，一般都超過八成，大單位甚至可以接近九成添。而近年嘅新樓，如果實用率有八成（包括露台窗台）已經算好好架喇。不過大家有冇諗過，原來有樓嘅實用率竟然可以低到得三成幾！

話說幾年前元朗四季Ｘ園以呎價二千幾蚊開盤，用五六百萬就買到二千幾呎house（其實係半獨立屋）。有買家覺得好抵就扑槌買咗，但係到收樓時先知大鑊，原來室內面積只有大約800呎，實用率得嗰三成幾！業主覺得俾人咗笨，即刻傳媒入屋實地採訪，實行向發展商進行大控訴。

實用率低成咁，關鍵係喺發展商對「建築面積」嘅演繹。其實物業分為四層，地下係開放式車房同後花園，一二樓係住宅，上面仲有天台。建築面積係包括晒呢，仲要攤分公用面積，所以先有二千幾呎咁大。平心而論，呢個計法同一般慣例有好大出入，可以話相當有創意。不過咁，發展商亦提供咗物業嘅詳細資料，好似平面圖、室內同花園面積等等。事實上，對於建築面積嘅計法，行內從來都冇劃一標準。嗰個咁具創意嘅建築面積亦只係發展商嘅銷售技倆，令人產生好抵嘅感覺。你可以話發展商取巧，但係話人地明呃就點都講唔通。

睇番同類物業當時嘅成交資料，同屬元朗半獨立屋嘅Ｘ州花園，已經有十年樓齡，不過呎價就要成三四千蚊。新樓呎價竟然會比舊樓低四成，買家覺得抵之餘，係咪都應該諗吓點解會平得咁冇道理呢？講真，邊有咁大隻蛤乸隨街跳啫！

以下係爛生果嘅另一相關報導：
「買家恨錯未細看價單

已接獲收樓通知，但因事務繁忙暫仍未收樓的小業主黎女士，得悉四季Ｘ園實用率不足四成，反應錯愕，強調「唔知（實用率）咁低，知就唔買啦！」她憶述當日買樓時，只見現場墟冚，「手慢就冇」，心情好緊張，根本冇時間留意價單所列的各項面積資料。

她補充，當日入市四季Ｘ園，是貪屋苑空氣好，價錢2000多元一呎夠「抵」，在「羊群心態」下入市。黎女士指出，曾到現址睇樓，但只能在外面「望」，覺得用600多萬買入的洋房，「個600呎花園好細」。」

聽完「苦主」心聲，大家有冇寄予最深切嘅同情呢？我自己就冇嘞。買樓唔同去街市買斤菜，隨時講緊一千幾百萬，甚至有可能係一生人最大嘅投資，有乜可能只憑一個數字（呎價）就去馬？就算冇時間做功課，留意吓附近物業嘅行情，最起碼都要睇清楚目標樓盤嘅資料啩。自己連最起碼嘅都冇做到，又叫人地點同情得落呢？

真係難以理解，啱啱先經歷完世紀大跌市冇幾耐，人仲會好似97年咁篤手指買樓。講真，自己唔肯做功課，其實又怪得邊個呢？唔知點解香港人會變成咁，自己做咗傻事就話係奸商嘅錯、政府嘅錯、社會嘅錯，但係就永遠唔會係自己嘅錯！