2011年6月18日星期六

剝光豬

琴日某八卦周刊有料到,封面標題雞乸咁大隻字寫住「ABC剝光豬等愛,XYZ趕收工撲火」,仲登咗幾張裸男相添。唔使睇都知,當然又係狗仔隊嘅傑作啦。呢本平時好少睇,不過見佢今期咁激,就即刻買咗本。

話說狗仔隊偷影到某小生喺租住火炭豪宅單位裏面嘅家居活動,仲有同某姐仔喺屋企嘅激吻相。原來小生喺屋企鍾意剝光豬走嚟走去,實行回歸大自然。

可能好多人會覺得小生有問題,喺屋企剝光豬咪益晒隔籬左右鄰居?抑或佢根本就有暴露狂?如果咁諗就錯嘞,因為喺正常情況下係唔會有人睇到嘅。小生租住嘅豪宅係嗰屏風樓,各座一字排開,唔會有樓望樓嘅情況。而其他屋苑住宅,最近嘅都距離幾百呎,正常情況下係唔會睇到單位裏面發生嘅。當然啦,正常情況係指用肉眼,如過用睇雀、甚至觀星嘅望遠鏡就另當別論。哈哈,估唔到喺火炭又真係有雀睇喎!

呢本周刊冇幾耐之前先偷影過另一對藝人情侶嘅閨房樂,而家咁快又有新料,佢地嘅狗仔隊真係效率驚人。除咗效率高,佢地嘅耐性都令人佩服。小生相係分開唔同日子影嘅,即係話班狗仔隊已經咗好耐,付出咗好多,咁嘅專業精神真係好難得。

狗仔隊交到功課,讀者又有睇,當然係皆大歡喜啦。不過又有冇人會諗下當事人同附近單位住客嘅感受呢?當事人都算嘞,始終成名係要付出代價。附近單位嘅住客先最無辜,佢地嘅閨房私生活隨時已經俾人順便埋。諗諗吓,住唔起豪宅都未嘗唔係好事,起碼冇明星鄰居,唔會無啦啦俾人埋。

講開又講,而家傳媒真係夠惡,鍾意影乜就影乜,鍾意寫乜就寫乜。如果有人質疑佢地嘅做法,就係妨礙新聞自由,剝奪公眾知情權。尤其是記協嗰隻肥豬乸,副嘴臉真係好Q乞人憎,次次喺電視見到佢都令人無名火起,想兜巴車埋去!總之所有記者(當然啦,愛國報紙嗰除外)都係神性不可侵犯,批評親都係死罪!

而家個社會就係咁,所有公認嘅核心價值都俾人無限放大,凌駕一切。講真,明星名人喺屋企做乜關人叉事咩,公眾又有乜知情權呢?用新聞自由做擋箭牌,將人地嘅私生活公諸於世,又算係乜傳媒操守呢?唔知肥豬乸又會唔會講吓佢嘅睇法呢?

當然,班友可以話佢地只係順應市場,如果冇人想睇呢,佢地就根本唔會做。無可否認,有咁嘅讀者就有咁嘅傳媒,但係呢個絕對唔係將侵犯他人私隱合理化嘅藉口。私煙夠大把市場啦,唔通友又可以大聲話私煙無罪咩?

點都好啦,有一樣我始終唔知道,究竟係有鍾意揭人私隱嘅傳媒先,定係有鍾意八人私隱嘅讀者先。呢個問題就好似問有雞先定係有蛋先咁,永遠唔會有答案。不過有一樣我可以肯定,呢個係惡性循環!

5 則留言:

  1. 連我呢啲不太懂科技的都知道,狗仔隊有超級長鏡,點解唔落窗簾?所以雖然我討厭偷拍的手法,但亦不同情當事人咯。

    回覆刪除
  2. 哈哈,古語有云:出得嚟行,預咗要還。小生嘅危機意識又真係弱咗嘅!

    回覆刪除
  3. 尤其是記協嗰隻肥豬乸,副嘴臉真係好Q乞人憎,次次喺電視見到佢都令人無名火起,想兜巴車埋去!

    原來我同你的觀感相同!果個女人講野真係好離譜,係咪係青山醫院走佐出黎架呢?當全世界D人無腦架!

    回覆刪除
  4. >>記協嗰隻肥豬乸...

    我都係勁憎佢噃,唔識嘢又扮晒嘢,不知所謂!

    回覆刪除
  5. 佛爺 & laulong:
    如果隻肥豬乸係一視同仁咁為所有記者爭取權益,我都唔會咁憎佢。話說有個愛國報女記者,喺採訪嘅時候俾長毛鬧係狗。個女記者走去記協投訴,竟然冇人為佢出頭!

    回覆刪除