2012年2月20日星期一

自駕遊

雖然基本法保障咗港人表達意見嘅權利啫,都唔使個個禮拜日都搞遊行啩!唔通駕駛人士使用部分道路嘅權利就可以任意剝奪?琴日又有政黨同民間團體遊行去政府總部,要求無限期擱置粵港自駕遊計畫。

我連車牌都冇,其實呢單嘢完全唔關我事。而且自駕遊又唔見得有好大實質作用,就算擱置計畫我都冇乜意見。遊行人士就認為自駕遊會帶嚟空氣污染同交通安全等問題,其實唔係無中生有,不過程度上有冇佢地講得咁嚴重就唔知嘞。我始終覺得,對於有啲參與者嚟講,遊行根本就係反蝗運動嘅一部分。好似有人高舉嘅標語,上面竟然寫住「反簡體字」。其實簡體字關自駕遊乜事呢?而且,簡體字又有乜好反呢?話時話,我都好想大陸轉番用繁體字,不過咁同反簡體字係完全兩回事囉。

更離奇嘅係連豉油黨都玩埋一份,同政府打對台。仲有邊個敢話建制派唔重視民意?不過咁,豉油黨嘅訴求始終同其他遊行人士有啲分別。佢地唔係想煞停成個計畫,而係要求淨係俾港人自駕北上,唔俾大陸人揸車南下。黨主席瘤健儀話,喺呢單嘢上面,粵港唔需要對等喎。佢呢番偉論,真係聽到我無名火起,中港矛盾日益加深,就係因為某啲港人有咁嘅態度!

好多內地人唔妥香港,就係因為唔抵得港人有特權。隨住大陸改革開放,經濟起飛,內地人肯定會有一份自豪感,亦難免會有啲暴發戶心態。而另一方面,香港嘅重要性就已經大不如前。喺此消彼長之下,內地人自然唔會認同港人可以擁有特權。當然啦,呢個期實係歷史遺留落嚟嘅問題。不過內地人普遍認為香港嘅殖民史係喪權辱國,而港人竟然因此得到特權,甚至覺得自己高高在上,佢地又有乜理由唔反感呢。

對於內地人嚟講,自由行嘅意義唔單止係購物同觀光,更係國家主權嘅體現。中國嘅土地,有乜理由中國人反而要禁足呢?將心比心,假設你係國內人,你又會點諗?而家瘤主席居然話自駕遊只准北上,唔准南下,咁喪權辱國嘅不平等條約,我就諗唔到點解啲同胞會受嘞。如果唔想大陸人揸車落嚟,就應該成個計畫拉倒,而唔係提出啲咁嘅無理要求囉。好心啲人唔好再製造啲新嘅中港矛盾啦,真係嫌未夠煩咩!

香港真係越嚟越民粹,而家連建制派都中埋毒添!再係咁落去,香港好快會自我邊緣化,套用Dr. Dylan嘅名句:The city is dying!

South Island, New Zealand

5 則留言:

  1. 港人以一次性簽證自駕回內地,冇乜作用,中國咁大,去得邊,如果在深圳一帶,費事啦,一過關同香港的路向就相反嘅,熟習得軚盤來時,仲要了解內地人揸車脾性,要共融架。索性一次過大家都唔好搞咁多嘢。

    不過,內地來自駕遊的吸引力就大好多,方便行街購物,一架七人車,三姑六婆坐晒入去一氣搞掂,所以即使路向唔一樣,都大把人要嚟,方便呀!

    回覆刪除
  2. 該可以咁諗:香港就唔俾你地自駕遊來港。至於你撤唔撤除香港往內地自駕遊限制,就由內地決定咯,話唔定佢地好想呢!

    回覆刪除
  3. 其實一向兩地都可以互相駕車往還架啦,只係從前可以通行嘅成本相當貴之嘛!

    無啦啦,挖笪瘌做乜?

    回覆刪除
  4. 古代就男上女下,今天就可以女上男下架嘛!香港人全部都係傳教士咩?一定唔可以比上邊D人騎落黎!嘻嘻!

    回覆刪除
  5. Coffee,
    除非係諗住時時落嚟大量購物,否則南下自駕遊亦睇唔到有特別大嘅吸引力。如果會嚴重加深中港矛盾,我就覺得應該擱置個計畫。至於嗰啲單方向嘅不對等建議,我就一定反對囉!

    laulong,
    如果咁做,一樣會挑起國內人嘅不滿情緒,亦睇唔到人地點解會受。為免製造爭端,不如無限期擱置個計畫算啦!

    Ebenezer,
    成日需要往返粵港嘅人,相信好多都已經有咗中港車牌,所以自駕遊嘅實質作用應該唔會好大,真正意義其實係在於粵港融合呢個概念。不過咁,如果香港要玩自我邊緣化,相信粵方又唔會介意囉!

    佛爺:
    哈哈,而家係親戚到呀,總之就閉門不納啦,無論乜嘢體位都冇得傾!

    回覆刪除