2012年2月3日星期五

狗噏風波

北大教授單狗噏事件鬧得沸沸揚揚,網民紛紛發表評論,搞到我都有啲痕,忍唔住要學人講埋一份添。不過事先聲明,我份人冇乜涵養,如果講得唔啱聽就當我狗噏啦,要插就無謂嘞!

單嘢喺我去咗旅行之後發生,喺非洲呢啲蠻荒之地,連電話都費事開,所以香港發生乜嘢事,原本都唔會知道。都係多得一位身在非洲心在港嘅團友,全靠佢日日上網睇香港新聞,朝朝向大家做早餐匯報,我先知有單咁嘅嘢。呢位團友一連講咗幾日,鑊鑊都講到咬牙切齒。直到年初三,喺鬧爆孔教授同廣大國內同胞之餘,佢仲忿忿不平咁話:點解香港九七嗰時唔獨立呢!聽到呢度,我差啲啲就忍唔住,想開聲反駁佢。不過最後我都係冇出聲,初三赤口,費事搞咁多嘢啦。

真係唔明白,點解佢幾十歲人仲可以咁天真嘅呢,連香港獨立都噏得出。講大原則,香港根本唔應該獨立,而睇實際環境,香港亦冇條件獨立。其實呢位團友想唔做中國公民都應該冇乜難度,佢兩公婆年年用一百幾十萬去旅行,絕對係有米之人,要移民真係話咁易啦。有能力走又唔走,但係就日日喺度鬧,你話有乜謂呢。話時話,我相信香港有好多人都係咁嘅心態。

講番孔教授嘅言論,條片我返到香港先上網摷嚟睇,果然極盡挑釁之能事,話係狗噏都不為過。問題主要出喺佢嘅態度,簡直囂張跋扈到無倫,對於一啲自覺比國內同胞優越嘅香港人嚟講,當然係難以接受。但係睇清楚佢嘅論點,就會發覺唔係完全無的放矢。所以呢一番言論,極有可能代表咗一部份國內人嘅心聲。

事實上,孔教授並冇話所有香港人都係狗,佢仲講過香港都有好多好人添。佢亦提到香港有比國內優勝嘅地方,例如法制。根據我嘅理解,佢話係狗嘅香港人,主要有幾類。第一,唔肯承認自己係中國人嗰啲。第二,同國內人溝通,故意唔講普通話嗰啲。第三,自恃殖民地遺民身分,歧視、欺負國內同胞嗰啲。我睇嘅片係七分鐘完整版本,應該係最全面。如果大家睇嘅係某互動媒體嘅兩分鐘精選版本,觀感當然會完全唔同。

講到國民身分認同,香港真係有好多人唔承認自己係中國人。早排港大嘅一個有關民調就引起一場小風波,最後仲扯埋干預學術自由嚟講,都咪話唔搞笑。更搞笑嘅係政府想喺教育同宣傳上做啲嘢,增加港人對國家嘅歸屬感,但係咁都要俾人鬧,香港都算係舉世無雙喇。正如孔教授所講,香港已經優勢盡失,全靠阿爺照住。呢個係鐵一般嘅事實,國內人自然好明白。香港攞盡阿爺著數,但係偏偏有好多香港人唔肯認自己係中國人。以國內人嘅角度嚟睇,咁樣根本就係食碗底反碗面,真係唔嬲至奇啦。

至於普通話,又真係有好多香港人唔肯學或者唔俾心機學,完全搞唔清佢地係乜嘢心態。對於一個國家嚟講,有一種共通語言係理所當然嘅事,根本冇得異議。香港人唔識普通話,蝕底嘅最終都係自己。當然啦,呢種情況唔係喺香港先有。我去上海出差,當地同事講上海話,我一句都聽唔明。去北京出差,啲同事講嘢猛咁捲脷,我淨係聽到一半。講真,我覺得班友好討厭囉。呢種山頭主義,對任何人都唔會有好處。

以上兩點都未必係個中矛盾嘅主因,我覺得香港人對大陸人長期以嚟嘅歧視先係關鍵所在。由八十年代開始,香港人已經叫國內人做阿燦,後來又出現咗北姑、北嫂、大陸喱呢啲名詞,最近仲將啲同胞貶為蝗蟲添。如果易地而處,大家究竟會有乜嘢感受,又會點樣反應呢?當然啦,呢個問題已經有咗答案。但係喺插爆孔教授嘅同時,香港人又有冇諗吓,歧視咗人地幾十年就好地地,而家俾人鬧番一次就發晒癲咁,會唔會有啲嚴人寬己呢?算嘞,基於言論自由嘅大原則,鬧爆一個北大教授根本唔算得乜嘢。香港人一向自由慣,上至國家領導人,下至販夫走卒,總之鍾意鬧邊個就鬧邊個。不過搞到要圍中聯辦,又要迫北大炒孔教授,咁就有啲唔妥當嘞。人地話晒都係知名學府嘅教授,發言當然有作為學者嘅觀點,而家搞到向官方機關施壓,咁又係咪干預學術自由呢?淫人妻女笑呵呵,香港人果然優為之呀!

講真,我只係以事論事,絕對無意幫孔教授護航。好似佢話香港人嘅質素係屬於全國比較差之列,我就唔多同意嘞。我當然唔會覺得香港人嘅質素高到識飛,事實上,嚴人寬己已經冇乜道德可言。唔理你認唔認都好,大家始終都係中國人,質素自然唔會有太大分別。你鬧吓我,我又插番你,大家半斤八兩,咁咪幾好囉!

Seal, Galapagos, Ecuador

11 則留言:

  1. 我都認同你觀點,大家都係中國人,何必呢?

    大家本身生活唔同,成長唔同,文化又有差異,所以走係一齊,總會有對對方不滿。

    回覆刪除
  2. 所謂先撩者賤,姓孔嘅點都唔爭得過。但人on居又跟人on居,走去反咬人地係蝗蟲,就真真正正on居居!!

    回覆刪除
  3. minor,
    係囉,除咗鬧完嗰刻條氣會順啲,互相謾罵根本無補於事。而且會令雙方分歧不斷擴大,對任何人都冇好處!

    Ebenezer,
    阿爺對香港特別照顧,而港人又唔識見好就收,其實一早令好多國內人睇唔過眼。孔教授今次一番狗噏,賤唔賤佢都好少理,反正已經成功出位,做咗民族英雄!

    回覆刪除
  4. 那孔狗獸徒有小智,卻思想大謬,如此素質卻是北大教授,叫人失笑!

    回覆刪除
  5. 我只係睇咗“傳媒版”,覺得佢好冇品,see this...

    http://sally-smallthoughts.blogspot.com/2012/01/blog-post_22.html

    但係你對“香港人”的睇法,我又認同。其實我自己一直好認同自己係“香港人”的身份,但我更覺得自己係中國人,基本上呢兩個身份唔係 mutually exclusive 的,但我亦好唔鍾意亦唔明,某部份自大又高傲的“香港人”,同我細個的經歷有關的,有時間又睇睇呢個吖...

    http://sally-smallthoughts.blogspot.com/2012/01/d-g.html

    回覆刪除
  6. Arm:

    你隻荷馬個口好大呀!嘻嘻!

    若果係加拿大咁樣登廣告「蝗蟲論」,果個人肯定會一身蟻!因為破壞佐政府既「河蟹」政策!連份報紙都有可能會周身蟻!

    私下點鬧都無人理你,上傳媒咁鬧,係言論咁自由既香港至得既!

    回覆刪除
  7. laulong,
    條友態度咁囂張,當然係博出位啦。不過撇開偏激嘅謾罵語句,佢嘅一番言論其實都傳遞咗一個信息:內地人已經對香港人好不滿!睇番香港人對內地人嘅攻擊,例如呢一年間嘅蝗蟲論,喺態度上根本同孔教授嘅狗噏冇乜分別。作為品格高尚嘅香港人,我地係咪都應該檢討吓呢?

    SKII,
    覺得自己係香港人當然冇問題,不過唔承認自己係中國人就講唔通嘞!應用set theory,香港人係中國人嘅subset,覺得自己係香港人,但係又唔承認自己係中國人,呢種思維根本就係自欺欺人囉!

    佛爺:
    哈哈,嗰隻唔係大詩人,係海狗嚟架!登個咁嘅廣告,根本就係秉承咗文革思維,想香港大亂,越亂越好啦!等班友仲唔認自己係中國人,你話係咪搞笑?!

    回覆刪除
  8. >>香港人嘅質素係屬於全國比較差之列

    佢都唔睇下而家海南島被中國叫宰人島,深圳見工被人問邊度人,如果湖北人,嘿嘿!......

    回覆刪除
  9. Coffee,
    條友咁講當然係為咗冧客啦,正如某啲政客不斷強調港人早就成熟到可以有普選一樣,總之信不信由你囉!至於海南島劏遊客嘅嘢,我都喺報紙睇過,但係深圳見工單嘢就唔知嘞,有冇條link可以睇吓呢?

    回覆刪除
  10. 唔係網上睇返嚟嘅。
    湖北人出名狡詐,最好笑是湖北人出外謀事,佢哋首先防的是自己湖北人,不像其他省、市的人會聯盟。

    回覆刪除
  11. Coffee,
    哈哈,原來係咁,湖北人果然最醒目!

    回覆刪除